Məmmədova Milana Elşən qızı

Məmmədova Milana Elşən qızı 1999-cu il martın 19-da Rusiya Federasiyası Moskva şəhərində anadan olub. Məktəbə gedənə qədər yazıb oxumağı bacarıb. Bu işdə ona anası böyük köməklik göstərib. Milananın uşaqlıqda bir çox sevimli məşğuliyyətləri olub. Bunlardan ən çox sevdiyi isə cizgi filmlərinin qəhrəmanlarının, gəlinciklərin şəkillərini çək­mək olub. Artıq gələcəkdə həyat tərzinə çevriləcək sevimli işinə doğru addım­la­rını atırdı...
İlk təhsilini Əsəd Ələs­gə­rov adına 244 nömrəli tam orta məktəbdə alıb. Milana hər za­man dərslərində fəal iştirak edib. Riyaziyyat və biologiya fənlərini xüsusi hə­vəslə oxuyub. O, hələ orta məktəbdə oxuyan zaman Bi­nəqədi rayonunda məktəblər­arası rəsm müsabiqələrində və  sərgilərdə iştirak edib. 
Gənc qızın ən böyük uğur­larından biri 2013-cü ilin 31 may - 9 iyun tarixlərində Azərbaycan Dövlət Rəssamlıq Akademiya­sın­da keçirilən «Saf rənglər-I» Bey­nəl­xalq Uşaq Yaradıcılıq Fes­ti­valında iştirak etməsi və diplomla təltif olunmasıdır. Milana 2013-cü ildə Azərbaycan tele­radiosunda «Esmeralda» stu­diyasından müəllimi Esmeralda Tağızadə və bir neçə tələbə ilə birlikdə iştirakı edib. Bu onun gələcək yaradıcılığı üçün stimul rolunu oynayıb.
2014-cü il Milana üçün xüsusilə yaddaqalan olub. O, 2014-cü ilin aprel ayında Gənclər Fondunun maliyyə, Azərbaycan Tələbə Gənclər Təşkilatları İttifaqının təşkilati dəstəyi ilə həyata keçirilən «Çirkli rəsm» ekoloji rəsm müsabiqəsində iştirak edib və Sertifikata layiq görülüb.
Həmin ilin mayında «Damla» İctimai Birliyi ilə əməkdaşlıq et­diyinə və layihədə fəal iştirakına görə ona xüsusi təşəkkürnamə verilib. 
2014-cü il iyunun 1-də Azərbaycan Dövlət Rəssamlıq Akade­miyasında keçirilən Uşaq və Yeniyetmələrin «Saf rənglər-II» Beynəlxalq Rəsm Yara­dıcılıq Festivalında iştirakına görə III yer və diplomla təltif olunub. 
2015-ci il noyabrın 25-27-də Azərbaycan Respublikası Mədə­niy­yət və Turizm Nazirliyinin «İslam sivilizasiyası uşaqların gözü ilə» mövzusunda keçirdiyi müsabiqədə yüksək nəticə əldə edib – III dərəcəli diploma layiq görülüb. Eyni zamanda Milananın rəsm əsəri afişada fon olaraq seçilib. 
Yaşının az olmasına baxmayaraq, uğurları ilə fərqlənən gənc rəssama 2016-cı il mayın 16-da Heydər Əliyevin anadan olmasının 93-cü il dönümünə həsr olunmuş «İrəliyə doğru» sərgisində iştirak etdiyinə görə sertifikat təqdim edilib. 2017-ci il martın 17-də «Novruz bayramı» münasibəti ilə keçirilən sərgidə fəal iştrakına görə diplomla mükafatlanıb. 
Həmin il mayın 12-də Mədəniyyət və Turizm Nazirliyi, Azər­baycan Dövlət Rəsm Qalereyası, “Xətai” Sənət Mər­kəzinin birgə təşkilatçılığı ilə baş tutan «Bura Azərbaycandır» adlı rəsm müsabiqəsinin yekun sərgisində iştirakına görə diplomla təltif olunub. 
2017-ci il mayın 30-da mükafatlarının sırasına biri də əlavə olunub. Ona Azərbaycan İncəsənət Konsulluğu Gənclər Şəbəkəsinin keçirdiyi «Xatirələr» sərgisində iştirakına görə sertifikat təqdim olunub.
2018-ci ildə Azərbaycan Dövlət Rəssamlıq Akademiyasının nəzdində Əzim Əzimzadə Kollecini «Rəngkarlıq» ixtisası üzrə bitirib və diplom müdafiəsini edib. Hazırda Azərbaycan Dövlət İqtisad Universitetinin «İnformasiya texnologiyaları» ixtisasında qiyabi təhsil alır və rəssamlıqla yanaşı Developia, «Engineering academy», «Java», «Skratch» proqramlaşdırma dili və «Innjoy» kursunda general english ilə də məşğul olur.
Milana əldə etdiyi uğurlara görə valideynlərinə, ilk ustadı Esmeralda xanıma, həmçinin İncəsənət Kollecinin müəllim kollek­ti­vinə borclu olduğunu bildirib. Valideynləri onu hər zaman dəstəkləyib, bu yolda köməkliklərini əsirgəməyiblər.
Sevindirici haldır ki, istedadlı müəlliminin zəhmətlərini yüksək qiymətləndirir. Belə ki, Milana Esmeralda xanıma oxşamağa və onun kimi dəqiq, diqqətcil, məsuliyyətli olmağa çalışır. 
Asudə vaxtlarında eskizlər hazırlamağı, musiqi dinləməyi və kitab oxumağı sevir. Daha çox portret, mənzərə, gül, şüşə üzərində rəsm (qarışıq texnika ilə) çəkməyə üstünlük verir. Surrealizmin ən çətin janrlardan biri olduğunu deyən Milananın fikrincə, heç də hər rəssam bu janrda əsərlər yaratmağı bacarmır. Onun ən böyük arzularından biri də elə bu janrdakı uğuları ilə rəssamlığa təsadüfi olaraq gəlmədiyini, konkret sahənin, həqiqətən, alın yazısı oldu­ğunu sübut etməkdir. Fırçasını bir an belə olsa əlindən yerə qoymaq barədə düşünmür. Müsahibələrinin birində dediyi kimi: “Surre­alizm çətin janrdır. Zirvəyə qalxan yol çətinliklərdən keçir. Çətin­likləri dəf etmək üçün isə addım-addım irəliləmək lazımdır. Mən o zirvəni fəth etməyə calışacam.”

Quliyeva Zəhra Zülfüqar qızı

Quliyeva Zəhra Zülfüqar qızı 5 oktyabr 2006-cı ildə Bakı şəhərində anadan olub. Zəhra körpəlikdən çox ağıllı, sakit, səbirli və təmkinli bir uşaq olub.  Hələ bağçaya getməmişdən əvvəl gözəl və maraqlı şəkillər çəkməyi bacarırdı. Yaşının az olmasına baxmayaraq bu onda çox uğurlu alınırdı. Zəhra körpəlikdən hər şey ilə maraqlanan aktiv bir uşaq olub. Hər gün yeni məlumatlar əldə etməyi çox sevir. Özündən böyük bacıları Zəhraya bu mövzuda köməklik göstərirlər. Onun qavrama qabiliyyəti olduqca güclüdür. Zəhra şeirləri böyük məharətlə tez bir zamanda əzbərləyir və intonasiya ilə söyləyir. Zəhra 261 saylı məktəbdə təhsil alır. O, dərslərinə çox çalışır və bunun nəticəsi olaraq yüksək qiymətlər alır. Ən çox sevdiyi fənlər – Azərbaycan dili və Riyaziyyatdır. Zəhra məktəblərində və siniflərində keçirilən tədbirlərdə iştirakçı qismində çıxış edib. Zəhranın bir çox sevimli məşğuliyyətləri var. Şeir söyləmək, rəqs etmək isə onun ən sevimli məşğuliyyətidir. Zəhra üçün ən maraqlı və uğurlu gün məktəbə ilk qədəm qoyduğu gündür. Əldə etdiyi uğurlara və nəaliyyətlərə görə öncə valideynlərinə, sonra isə müəllimlərinə borclu olduğunu bildirir. Zəhra böyüyəndə atasına oxşamaq istəyir. O, atası kimi ağıllı savadlı, çalışqan olmaq istəyir. Zəhranın əsas amalı oxumaq, öyrənmək, dunya görüşünü artırmaq, daima yüksək nəaliyyətlər əldə etməkdir. O, böyüyəndə prezident olmaq istəyir. Öz savadına, biliyinə, bacarığına güvənən Zəhra bu məqsədinədə nail olacağına əmindir. O, prezident olub xalqına maddi, mənəvi dəstək olmaq istəyir. Zəhranın istəklərindən biri də xalqının yaxşı, firavan yaşaması, inkişaf etmiş ölkələrin sırasına qoşulması və abadlaşmasıdır. O, vicdanla, düzgünlüklə, ağılla irəli getməyin tərəfdarıdır. Zəhra asudə vaxtlarını  səmərəli keçirməyə çalışır. Beləliklə o maraqlı, intelektual seviyyəni yüksəldən kitablar oxumağı və şeirlər əzbərləməyi çox sevir. Zəhra tarixdə silinməz iz qoymaq niyyətindədir.

Salahov Cəmil Məmməd oğlu

Salahov Cəmil Məmməd oğlu 2010-cu il yanvarın 27-də  Bakı şəhərində anadan olub.  “Cəmil” – bu adın mənası “gözəl” deməkdir. Onun adını anası Nurlanə xanım gördüyü bir  yuxuya əsasən qoyub. Cəmil körpəlikdə ağıllı, sakit və təmkinli bir  uşaq olub.  İntelektual səviyyəsinə, hazırcavablığına, aktivliyinə  görə yaşıdlarından hər zaman seçilib. Cəmilin bir çox sevimli məşğuliyyətləri var. Bunlardan ən çox sevdiyi məşğuliyyəti isə şəkil çəkmək və rəqs etməkdir. Yaşının az olmasına baxmayaraq Cəmil  hesab əməllərini yerinə yetirməyi, rus dilində yazıb-oxumağı bacarır. Uşaq baxçasına getdiyi vaxtlarda da qeyri-adi bacarığı sayəsində müəllimlərinin sevimlisinə çevrilib. Müəlllimləri tərəfindən onun aktyorluq qabiliyyəti də üzə çıxıb. O, çoxlu şeirlər, nağıllar bilir və bütün tədbirlərdə də fəal iştirak edir. Baxçada keçirilən şənliklər də müxtəlif rollarda oynayıb və öz rolunun öhdəsindən də böyük məharətlə gəlib. Onun ən çox sevdiyi rolu isə “Dovşan” obrazı olub. Cəmil çox vətənpərvər, mehriban və qayğıkeş bir uşaqdır. Vətənini bu qədər sonsuz məhəbbətlə sevməsi səbəbsiz deyil. Çünki Cəmil hərbiçi ailəsində böyüyür. Atasının Vətənimizin keşiyində durması, torpaqlarımızın bütövlüyünün qorunması uğrunda göstərdiyi mərdliklərin şahidi olan Cəmilin vətənpərvərlik hissləri buradan qaynaqlanır. Ürəyi yumşaq, mərhəmətli olan Cəmil babası Aydın müəllim kimi heyvanları çox sevir. O, küçə də gördüyü sahibsiz heyvanlara kömək edir, onlara yemək, su verməkdən də xüsusi zövq alır. Cəmil milli adət ənənələrimizə çox bağlıdır. O, milli rəqslərimizi peşəkarcasına öyrənməyə çalışır. Bu yolda ona Tural müəllimi böyük köməklik göstərir. Cəmil Uğur məktəbəqədər təhsil mərkəzinin şagirdidir. Onun ən sevimli fənni məntiq fənnidir. Asudə vaxtlarında cizgi filminə baxmağı, rəqs etməyi sevir. Əldə etdiyi nəaliyyətlərə görə öncə valideynlərinə, daha sonra müəllimlərinə borclu olduğunu bildirir. Cəmilin ən böyük arzusu həkim olmaqdır. O, həkim olub xəstələrə şəfa vermək, vətəninə, millətinə yararlı bir vətəndaş olmaq istəyir.

Sorokina Darya Romanovna

Sorokina Darya Romanovna 29 noyabr 2002-ci ilə Bakı şəhərində dünyaya gəlib. Uşaqlığında ağıllı və olduqca aktiv olan Dərya bir çox sahələrə maraq göstərirdi. Marağını çəkən hər şeylə bağlı suallar verirdi. Nağıllara qulaq asmağı, cizgi filmlərinə baxmağı, rəsm çəkməyi, təbiət qoynunda olmağı, əyləncəli oyunları, rəqs və idman etməyi çox sevirdi. Məktəbə getməmişdən öncə ABVQDK məktəbəqədər hazırlıq kursunda sadə biliklərə yiyələnmişdir. Spartak idman cəmiyyətində müxtəlif idman növləri ilə tanış olmuş, gimnastika ilə məşğul olmağa başlamışdır. İlk təhsilinə isə Bakı şəhəri, Nərimanov rayon 193 saylı orta məktəbdə başlamışdır və hazırda da orada təhsilini davam etdirir. Dərslərində çox fəal, nizam-intizamlı şagirddir. Ən sevimli fənni isə xarici dildir. Asudə vaxtlarında italyan dilini öyrənir. Məktəbdə keçirilən bütün bayram şənliklərində, tədbirlərdə, mərasimlərdə, bədii gimnastika üzrə keçirilən yarışlarda fəal iştirak edir. 2013-cü ildən bədii gimnastika üzrə Milli komandanın üzvüdür və həmin ildən etibarən Milli gimnastika arenasında məşq edir. Arenanı o, ikinci evi hesab edir, çünki gününün  demək olar ki, böyük hissəsini burada keçirir. Hazırda Dəryanin idman üzrə dərəcəsi idman ustalığına namizəddir. Dərya hesab edir ki, onun həyatının ən uğurlu günü 2015-ci ilin may ayında Belarusiyanın Minsk şəhərində keçirilən Avropa çempionatında çıxış etdiyi gündür. Orada o, birlikdə qatıldığı 4 iştirakçı qızla birgə 4-cü yeri qazanmışdır. Əldə etdiyi uğur və nailiyyətlərinə görə özünü Əlizadə Nurlana, Nərimanova Natalya və Əliyeva Kristina  məşqçi-xanımlara borclu bilən Dərya onların əziyyətini yüksək qiymətləndirir. Bundan başqa, məşqçiləri Qaratova Lalə, Bəkirova Vəfa, Marianna Vasilyevnanın da rolu Dəryanın qazandığı nailiyyətlərdə danılmazdır. Onların qayğısı və tələbkarlığı sayəsində Dərya öz üzərində daha çox çalışaraq indiki səviyyəyə gəlib çatmışdır.

Azərbaycan Bədii Gimnastika Federasiyasının gimnastika üzrə bütün yarışları televiziyada işıqlandırılır. Minsk şəhərində keçirilən yarışdakı qələbəsindən sonra Dərya Sorokina ATV və İdman Azərbaycan kanallarında yayımlanan verilişlərdə iştirak etmişdir. Bundan əlavə, AGF internet saytında Milli komandanın hər bir üzvü haaqında məlumatlar yerləşdirilmişdir. Dərya gələcəkdə Marina Duninda kimi gimnast olmağı arzulayır. Bu arzusu Dəryaya həm də imkan verəcək ki, o, Olimpiya çempionu olsun və bununla da Azərbaycanın bayrağını yüksəklərə qaldırsın. Hazırda bütün fəaliyyətini bu məqsəd uğrunda istiqamətləndirən Dərya öz arzusuna çatmaqda iddialıdır. 

Əliyev Rüstəm Mikayıl oğlu

Əliyev Rüstəm Mikayıl oğlu 7 sentyabr 2006-cı ildə Bakı şəhərində anadan olmuşdur. Rüstəm körpəlikdən ağıllı, cəld, çalışqan uşaq olub. Rəsm çəkmək, rəqs etmək sevimli məşğuliyyətlari olmuşdur. Hələ məktəbə getməmişdən öncə bağça müəllimələri tərəfindən yazmağı ve oxumağı öyrenmişdi. Rüstəm bağçada keçirilen kiçik tədbirlərdə, səhnəciklərdə iştirak edərək rəqsə daha da çox marağı artmışdı.

H.Hüseyin adına 83nömrəli məktəbin 4c sinifdə təhsil alır. Bütün dersliklərinə eyni maraqla yanaşmasına baxmayaraq ən sevimliləri arasında riyaziyyat və həyat bilgisi fənnləridir. Məktəbin qabaqcıl sagirlərindən biri kimi tədbirlərdə, gül bayramlarında fəal iştirak edib.

Rüstəmin ən uğurlu günü 2012-ci il Bakı şəhəri İcra hakimiyyətinin başcısı Hacıbala Abutalıbov tərəfindən verilmiş tərifnaməni aldığı gündür. Rəqslə bağlı İctimai kanalın 10 illiyinə həsr edilmiş gecədə, ATV kanalında, ANS tele kanallında bayramlarla elaqədər cıxışlarda fəal içtirak etmişdi. Rüstəm Türkiyədə 23Nisan çoçuklar şənliyində Azərbaycanın milli rəqslərini təmsil edərək 1ci yeri tutmuşdu. 2012ci ildə daha bir festivalda 1ci yere layiq görülmüşdü. Bu festival 2012-ci il İdman ili çərçivəsində 1 İyun Uşaqların Beynəlxalq Müdafiəsi Günü münasibəti ilə "rayon məktəbə qədər tərbiyə" müəssisəsində uşaqlar arasında "cırtdan bədii əyləncəli idman festivalında" keçirilmisdi.

Aktyor olmağı, pilləcə yüksəlməyi arzu edən Rüstəm, Heydər Əliyev haqqında çəkilən kinoda rol aldığına görə özünü çox şanslı hiss edir. İstəyi, bu kinonun çox böyük mükafata layiq görülməsi ve özünün olduğu rolun çox bəyənilməsidir.

Rüstəm əldə etdiyi uğur ve naliyyətlərə görə özünü müəllimlərinə, anasına, atasına borclu olduğunu bildirir. Bu sahədə qazandığl uğurlarla birlikdə gələcəkdə zabit olmaq arzusundadır. Bizdə ona hər bir arzusuna çatmasını, heyatını gözəl və rəngarəng keçirməsini daha böyük naliyyətlərə yiyələnməsin arzulayırıq.

Bayramova Vüsalə Mustafa qızı

Bayramova Vüsalə Mustafa qızı 29 sentyabr 2004-cü ildə Bakı şəhərində dünyaya gəlmişdir. Hələ körpə yaşlarından sakit, öz dünyası olan bir uşaq olmuşdur Vüsalə. Rəsm çəkər, heyvanlar aləminə olan marağını kağız üzərində çəkdiyi rəsmlərdən bilmək olardı. Hazırda Bakı şəhər Nərimanov rayonu 82 saylı tam orta məktəbdə oxuyur. Dərsə başladığı ilk vaxtlardan yenə də rəsm dərslərində öz baracığını göstərmişdir. Mərziyə müəllimənin sevimli şagirdlərindən biridir Vüsalə. Həm tərbiyəsi, həm  dərsə olan marağı, həm də çəkdiyi rəsmlərlə müəllimlərinin gözündə ucalmağı bacarmışdır.  2013-cü il iyun ayının 1-də təşkil olunmuş sərgidə o, öz çəkdiyi rəsmlərə görə diplomla təltif olunmuşdur. Vüsalənin əsil məqsədi də bu uğurlarını davam etdirmək, rəsm çəkmə qabiliyyətini inkişaf etdirərək Rəssamlıq Akademiyasına qəbul olmaqdır. Bunun ardınca isə ölkənin tanınmış rəssamları sırasına öz adını yazaraq beynəlxalq sərgilərdə iştirak etmək Vüsalənin qarşısında duran əsas vəzifədir. Uğur səninlə olsun!

Əliyeva Məryəm Ruslan qızı

Əliyeva Məryəm Ruslan qızı 20 fevral 2004-cü il Bakı şəhərində anadan olub. Məryəm körpəlikdə musiqiyə və rəsmə xüsusi maraq göstərib. Əlinə karandaş düşən kimi mütləq bir şeylər cızma-qara etməyi sevib. Şeir oxumağa marağı böyük idi. Çox iti hafizəsi ilə fərqlənib. Yanında şeiri bircə dəfə demək kifayət edirdi ki, həmin şeiri əzbərə söyləsin. Kəndə gedəndə özündən balaca uşaqları başına yığıb “müəllimlik” etməyi sevirdi. Ümumiyyətlə, Məryəmdə liderlik qabiliyyəti güclüdür. Məktəbə gedəndə əlifbanı və iyirmi dairəsində hesabı artıq öyrənmişdi. Məryəm gözünü açandan hər zaman ətrafindakıların mütaliə etdiyini görüb. Ona görə də o, boş vaxtlarını oxumağa sərf etməyi uşaqlıqdan vərdiş edib.

 Məryəm ilk təhsilini 47 saylı orta məktəbdə alıb. Hazırda Avropa Azərbaycan məktəbinin VI sinfində oxuyur. Məryəm V sinifdə yeddi fənn üzrə məktəb birincisi olub və təhsil haqqından yüz faiz azad edilib. Hazırda da təhsilini uğurla davam etdirir. Dəqiq elmlərə xüsusi maraq göstərir. Rəsm, musiqi və ingilis dilinə xüsusi marağı var. Məktəbdə keçirilən tədbirlərdə çıxışlar edir. Rus dram klubunun fəal üzvüdür. Baş rollarda çıxış edir. Bundan başqa, rəsm sərgilərində də aktiv iştirak edir.

 Əldə etdiyi uğurlara görə özünü valideynlərinə borclu bilir. Valideynləri istəyirlər ki, Məryəm cəmiyyətdə özünə şərəfli yer tutsun və ölkəmizin adını dünyada layiqincə təmsil etsin. Məryəm istəyir ki, orta məktəb müddətində dəqiq elmlər sahəsində dünya olimpiadalarına qatılsın.

 Gələcəkdə mühəndisliyin texnologiyalarla bağlı müasir sahəsində mütəxəsis olmaq arzusundadır. Son dövrlər daim yenilənən texnologiyalar onun da marağını çəkir. BIG DATA informasiyanın BULUD-a daşınması artıq insanların həyatını dəyişib. O da yeniliklər yaratmaq, insanların həyatını yüngülləşdirmək istəyir.

 Asudə vaxtlarında musiqi ilə məşğul olur. Gitarada mahnılar ifa edir və oxuyur. Həftə sonları at sürməyi çox sevir.

 Gələcəkdə Massacuset texnologiyalar universitetində (MİT) təhsil almağı hədəfə alıb. Araşdırıb ki, bu universitet dünyada seçilən üniversitetdir. Ancaq Amerikada oxumaq üçün çox çalışmaq lazım olduğunu da bilir. Cəmiyyətdə tutacağı mövqeyi ilə vətənə göstərəcəyi xidmətlə tarixin yaddaşında qalmaq arzusundadır.

 Uğurlar sənə!

Quliyeva Həcər Emin qızı

Quliyeva Həcər Emin qızı 27 iyun 2007-ci il tarixdə Bakı şəhərində anadan olub.

 Həcər uşaqlıqda hər şeylə maraqlanıb. Sevdiyi məşğuliyyətləri çox olub. Ən sevdiyi məşğuliyyət isə qab-qacaqla oynamaq, onları bir-birinə vurmaqla müxtəlif səslər çıxartmaqdan, musiqi səsli oyuncaqlarla oynamaqdan ibarət olub. Kitablara marağı artıq 6 aylığından var idi. Rəngli, böyük şəkilli kitabları oxumağa çalışıb. İki yaşından isə artıq sərbəst nağıl danışıb və şerləri əzbər söyləyib. Kiçik yaşlarından pal-paltarından və müxtəlif oyuncaqlardan istifadə etməklə nağıllardakı müxtəlif bədii obrazları canlandırmağa çalışıb. Musiqi alətlərinə də çox marağı olub – kiçik qarmon, nağara, gitara, ksilofon və digərləri. Bir yaşında evdə olan pianinoda var-gəl edirdi və artıq iki yaşında “Cücələrim” mahnısına bənzər melodiyanı ifa etməyə çalışıb.

Məktəbə gedənə qədər 4 yaş yarımlıqdan artıq heca ilə sözləri oxumağı bacarıb. Oxumağı anasından öyrənib. Yazmağı isə məktəbəqədər hazırlıq kurslarında öyrənib. Lakin yazmağı o qədər də çox sevmir.

Musiqiyə marağı erkən yaşlarından yaranıb. Maraq öz-özünə yaranıb, lakin genetik amillər, ailə mühiti də böyük rol oynayıb. Çünki Həcərin ailəsində tanınmış musiqiçilər çoxdur – onun ata babası Azərbaycan Respublikasının xalq artisti, görkəmli tarzən, professor Ramiz Quliyev, əmisi beynəlxalq müsabiqələr laureatı, dirijor Əyyub Quliyevdir. Babası uşaqlıqdan Həcərə tarda müxtəlif uşaq və xalq mahnılarını ifa edib. Əmisi isə onunla ilk fortepiano ilə tanışlığına şərait yaradıb.

Birinci sinfə Bakı şəhəri Səbail rayonu 160 saylı klassik gimnaziyada gedib. Hal-hazırda da bu məktəbdə təhsil alır. Eyni zamanda Üzeyir Hacıbəyli adına Bakı Musiqi Akademiyası nəzdindəki Məktəb Studiyanın fortepiano sinfində təhsil alır. 

Dərslərini yaxşı oxuyur. Əksər aldığı qiymətlər əla və yaxşıdır. Məktəbdə ən çox sediyi fənnlər – Təsviri sənət, Musiqi, İnformatika, Ana dili və ingilis dilidir.

 Məktəbdə keçirilən teatrlaşdırılmış tədbirlərdə böyük maraqla iştirak edir. Bir neçə kiçik tamaşalarda baş rol alıb. Musiqi məktəbində də əlamətdar musiqi hadisələrində iştirak edib və 2015-ci ilin aprel ayının 6-10-da Məktəb-Studiyanın keçirdiyi “Üzeyir Hacıbəylinin milli lad sistemi gənc musiqiçilərin tədris repertuarında” I Respublika festivalında fortepiano sinfi üzrə laureat adını alıb. Həmin festivalda çıxış etdiyi xor ansamblı isə xüsusi diploma layiq görülüb. 

 Onun  üçün ən maraqlı və uğurlu hadisələrdən - ilk dəfə olaraq 160 saylı gimnaziyanın səhnəsində “Buratino” tamaşasındakı tülkü Alisa rolunu canlandırmağı və əlbəttə Bakı Musiqi Akademiyasının səhnəsində ilk dəfə bir neçə əsərlə çıxışıdır. Əldə etdiyi uğurlarına görə müəllimlərinə və valideynlərinə borcludur. 

 Fəaliyyətindən dolayı babası Ramiz Quliyevə oxşamaq istəyir.  

Onun əsas zirvəsi odur ki, seçdiyi hər hansı bir sənətdə yüksək peşəkar mütəxəssis olmaq. 

Onun maraq dairəsi çox geniş olduğuna görə  hələ ki, gələcəkdə hansı peşənin sahibi olacağına dair qəti qərar verməyib. Çünki o, həm fortepianoda ifa etməyi, vokal sənəti ilə məşğul olmağı, səhnədə müxtəlif obrazları canlandırmağı, nağıllar yazmağı, rəsm çəkməyi sevir, həm də təbiətlə bağlı olan elmlərə böyük marağı var.   

 Asudə vaxtlarında fortepianoda cizgi filmlərindən yadımda qalan musiqi parçalarını ifa etməyi, çoxlu rəsm çəkməyi və bədii ədəbiyyat oxumağı xoşlayır. Hətta bəzən ev tapşırıqları yerinə ədəbiyyat oxuduğuna görə danlandığı da olub.  

 Həm rəssamlıqda, həm də musiqidə təbiətin müxtəlif çalarlarını, fəsillərin bir-birini əvəz etməsini, heyvanların davranışını göstərən əsərləri çox sevir.

 Gələcək planları dərslərini yaxşı oxumaq, gimnaziyanın və məktəb studiyanın həyatında fəal iştirak etmək və əvvəl-axır gələcək peşəsiylə bağlı seçimini dəqiqləşdirmək və müəyyən olunmuş məqsəd istiqamətində hərəkət etməkdir. 

http://vesti.az/news/231341#ad-image-0

http://azertag.az/ru/xeber/V_Baku_otkrylsya_I_Respublikanskii_festival_Nacionalnaya_ladovaya_sistema_Uzeira_Gadzhibeili_v_uchebnom_repertuare_molodyh_muzykantov-843825