İbrahimov Kamal İlham oğlu

Əliyev Yasin Araz oğlu

Dəmirova Türkan Minbər qızı

Qəhrəmanımızın adının qoyulmasında atasının rolu böyükdür. Minbər bəy oxuduğu ədəbiyyatlardan birində Türkan Şoray haqda məqaləyə rast gəlir. Və bu adı yeni dünyaya gələn qızına qoymağı qərara alır.

Türkan balacalıqda çox sakit uşaq olub. Demək olar ki, hər şeylə maraqlanır, çoxlu suallar verər, cavabları isə diqqətlə dinləyərdi. Yaşıdları ilə müqayisədə daha çox məlumatlı idi. 3-4 yaşlarında babası muğam dinləyəndə onunla birgə radio qarşısında əyləşər və saatlarla bütün diqqətini musiqiyə verərdi. Maraq göstərdiyi işdən diqqətini yayındırmaq qətiyyən mümkün deyildi. Çox inadkar və iradəli idi. Yuxudan qalxandan axşama qədər daim nə iləsə məşğul olardı: musiqi, rəsm, oyun, kitablar və s. Məktəbə gedənə qədər demək olar ki, tam sərbəst yazıb-oxumağı bilirdi. Ailənin dördüncü uşağı olduğundan böyüklər ev tapşırığını yerinə yetirəndə Türkan da həvəslə onlara qoşulurdu. Hətta kənd kitabxanasındakı uşaq ədəbiyyatının çoxu kiril qrafikası ilə olmasına baxmayaraq onları da oxumağa çalışırdı. Əlifbaları səhv salmasın deyə qoyulan qadağaları nəzərə almayaraq, inadkarlıq göstərib kiril qrafibası ilə yazılmış kitabları da artıq 5 yaşında oxumağı öyrənmişdi. Həm ailədə, həm də qonşular arasında hamının sevimlisi idi. Böyüklər ona sual verməyi çox xoşlayırdılar. Çünki verilən suallara böyüklərə məxsus ciddiyətlə və məntiqlə cavab verirdi. İbtidai sinifdə oxuyarkən tənəffüslərdə evə verilən bütün tapşırıqları cəld yerinə yetirər və evdə həll ediləsi məsələ, tapşırıq saxlamazdı.

1995-ci ildə Quba rayonunun Aşağı Xuc kənd orta məktəbinin I sinfinə qəbul olunmuşdu. Məktəbə gedəndə xarici görünüşcə səliqəli, çox sakit, cılız bir qız idi. Az vaxtda fəallığı ilə diqqət cəlb etmişdi. Oxumağa böyük həvəs göstərirdi. Həmişə qabaqcıl olmağa səy göstərirdi. Dostları ilə səmimi, mehriban idi. Türkan günü-gündən fəallaşırdı. Verilən tapşırıqları yerinə yetirməklə bərabər müəllimdən əlavə tapşırıqlar verilməsini xahiş edərdi. Hər gün bütün dərslərə hazırlıqlı idi. Frontal sorğularda həmişə fəal idi. Bilik yarışmasında həmişə qalib çıxırdı. Dəfələrlə təhsildə qazandığı müvəffəqiyyətə görə fəxri fərmanlarla təltif olunmuşdu. Riyaziyyata xüsusi meyl göstərirdi. Proqram materialları ilə kifayətlənməzdi. Əlavə testlərlə çox məşğul olurdu. Türkan müəllim ailəsində anadan olmuşdu. O, valideynlərindən çox şey görüb götürmüşdü. Yüksək mədəniyyətə, gözəl nitq qabiliyyətinə malik idi. Türkan həm də təbiət vurğunu idi. O, gördüklərini çəkdiyi rəsmlərdə təsvir etməyə çalışırdı.

Türkan Minbər qızı Dəmirova 1989-cu ildə Quba rayonunun Aşağı Xuc kəndində anadan olub. 2006-cı ildə Nəsib Dadaşov adına Aşağı Xuc kənd orta məktəbini bitirib ADNA-nın kimya texnologiyası fakultəsinə daxil olub. Hazırda ADNA-nın II kurs magistr pilləsində təhsil alır.

Gəlin Türkanın dediklərinə də diqqət ayıraq: “ - Texniki fənlər üzrə təhsil almağı uşaqlıqdan arzulamışdım. Böyüdükdə mühəndis olacağımı düşünürdüm. Amma məhz neft emalı üzrə mühəndis olmağı X sinifdə qərara aldım. Qara qızılın Azərbaycan xalqının tarixində necə əhəmiyyətli rola malik olduğu hamıya məlumdur. Neft emalı üzrə peşəkar mühəndis olub, bu sənaye sahəsində xalq üçün işlər görmək mənim ən böyük arzumdur. Seçəcəyim ixtisas qrupunu çoxdan qərara alsam da, orta məktəbdə fənlər arasında seçim etməyi xoşlamırdım. Bütün fənlərə marağım vardı və hamısına hazırlıqlı olmağı vacib bilirdim. Nadir hallarda mənim 4 qiymət aldığım olardı. 11 illik təhsilimi bütün fənlərdən əla qiymətlərlə başa vurmuşam. Sinif nümayəndəsi kimi sinfimin daim məktəbin bütün tədbirlərində, yarışlarında, ictimai işlərində iştirak etməsinə çalışırdım. Yarışlarda daim yüksək nəticə əldə etməyə səy göstərirdim. V-XI siniflər arasında ilin şagirdi seçilmişdim. VIII sinifdə rayon olimpiadasında yüksək nəticə əldə etdiyim üçün fəxri fərmanla təltif olunmuşdum.

Ali məktəbdə sevib seçdiyim ixtisasa qəbul olunduğum üçün çox xoşbəxt idim. Ali məktəbdə də bütün fənlər üzrə yüksək qiymət almağa, ixtisasım üzrə mümkün qədər çox bilik almağa çalışırdım. Bir çox elmi konfranslarda, tədbirlərdə iştirak etmiş və yaxşı nəticə əldə etməyə çalışmışam. 2009-cu ildə ADNA-da keçirilən elmi konfransda II yerə layiq görülmüşəm. 4 dəfə ARDNŞ təqaüdçüsü seçilmə şərəfinə nail olmuşam. Hazırda da ARDNŞ-nın həyata keçirdiyi təqaüdçü tələbələrin əsl mütəxəssis kimi yetişməsinə yardımçı olan yay təcrübəsi proqramının iştirakçısı kimi şirkətin nəzdində olan “Azərneftyağ” Neft Emalı Zavodunda təcrübə keçirəm.  

İxtisasımı seçimim sərbəst olub. Bəlkə də mühəndis ola biləcəyim yaxınlarımdan kimsənin ağlına gəlməzdi. Lakin onlar məni hər zaman, hər addımda dəstəkləmişlər.

Hazırda mənim ən böyük arzum təhsilimi başa vurduqdan sonra neft iqtisadiyyatının idarə edilməsində, neft sənayesinin gücləndirilməsində və xalqımızın gələcək həyatının gözəlləşdirilməsində qəti mövqeyi olan ARDNŞ-da işləməkdir. 2010-cu ildə ARDNŞ-nın həyata keçirdiyi yay təcrübəsinin iştirakçısı olduğum zaman fəaliyyətimlə bağlı “İki sahil” qəzetində məqalə dərc olunmuşdur”.

Teymurzadə Dürdanə İsmayıl qızı

Babayev Orxan Namiq oğlu

Bu ailədə 80-ci illərin məşhur türk müğənnisi Orxan Gəncəbay çox sevilirdi. Bu səbəbdən də ailədə dünyaya gələn yeni üzvü məhz müğənninin şərəfinə Orxan adlandırdılar.

Orxan qeyri-adi uşaq olub. Yaşına görə çox ağıllı hərəkətləri, düşündürücü sualları, məntiqə söykənən cavabları ətrafdakı insanları həmişə heyrətləndirirdi. Elə bir sahə yox idi ki, onun marağını cəlb etməsin. 4 yaşından musiqi ilə maraqlanardı, 5 yaşında fortepianoda bir neçə mahnı çalırdı. Qəribəsi bu idi ki, bu mahnıları ona heç kim öyrətməmişdi. 6 yaşında Azərbaycanın coğrafi xəritəsini, “Əlifba”nı, 100-ə qədər riyazi hesablamaları, Azərbaycanın dahi şair və yazıçılarını, şifahi xalq ədəbiyyatından nümunələri əzbər bilirdi. Ən çox xoşladığı məşğuliyyəti futbol oynamaq olub.

Sonralar müxtəlif illərin poçt markalarını, xırda pulları, daha sonra isə breloklar toplayıb. İdmanın basketbol, şahmat və üzgüçülük növü ilə məşğul olub. 2004-cü ildə keçirilən şahmat üzrə respublika təsnifat turnirində Nəsimi rayonu üzrə I yeri tutub. Məktəbə gedənə qədər yazmağı da, oxumağı da bilirdi. Məktəbə 6 yaşında gedib. 1994-cü ildə 6 yaşında yaşında uşaqları məktəbə götürmürdülər. Ona göə də sentyabr ayında Orxan məktəbə getməmişdi. Lakin 211 saylı orta məktəbin direktoru Ofelya Abdullayeva ibtidai sinif müəllimləri ilə bərabər, Orxanın bilik səviyyəsini yoxladıqdan sonra 1994-cü ilin noyabr ayında onu I sinfə qəbul etdilər. Orxan Namiq oğlu Babayev 1988-ci iyulun 3-də Şamaxı şəhərində anadan olub. I sinfi Nəsimi rayonu 211 saylı, II-III sinifləri Xətai rayonu 56 saylı, IV-XI sinifləri isə Binəqədi rayonu 157 saylı orta məktəblərdə oxuyub. I sinifdən XI sinfi qurtarana kimi əla qiymətlərlə oxuyub. Orta məktəbi bitirəndə qırmızı attestata layiqli namizəd olsa da, məlum olmayan səbəblərdən haqqını ala bilməmişdir. Sevimli fənləri riyaziyyat və coğrafiya olub. Məktəbin ictimai işlərində fəal iştirak etdiyinə görə valideynləri dəfələrlə təşəkkür məktubları almışlar. XI sinifdə oxuduğu zaman Binəqədi rayon Gənclər, İdman və Turizm İdarəsi tərəfindən fəxri fərmanla təltif edilmişdir. Elə həmin ildə Xəzər Universtetinin XI sinif şagirdləri arasında keçirdiyi olimpiadada riyaziyyat fənni üzrə III dərəcəli diploma layiq götürülmüşdür.

2005-ci ildə orta məktəbi əla qiymətlərlə bitirib 644 balla Azərbaycan Dövlət İqtisad Universitetinin ümumi iqtisadiyyat ixtisasına qəbul olub. Bakalavr pilləsini 2009-cu ildə bitirib və ADİU-nun MBA proqramı maliyyə ixtisası üzrə magistraturaya qəbul olub. Həmin ildə əsgəri xidmətə getmişdir. 2010-cu ilin iyul ayında əsgəri xidmətini müvəffəqiyyətlə başa vurub. Hazırda təhsilini magistraturada davam etdirir. Təhsildən əlavə həm işləyir, həm ingilis dilindən kursa gedir, həm də idmanla məşğul olur.

İxtisası ilə bağlı maraq onda IX sinifdən yaranıb. Bu ixtisası seçməyin səbəb geniş, maraqlı sahə olması, dövlətimizə məhz bu sahədə xeyir verəcəyini deyərdi. Bu sahəyə marağı onda valideynləri oyadıb. Ali məktəbin bakalavr pilləsini qırmızı diplomla bitirmişdir. 2006-cı ildə “Pofessional birja fəaliyyətinə hazırlıq” təhsil proqramı çərçivəsində “Universal” treyninq kursunu, 2007-ci ildə “Praktik mühasibət” kursunu, 2008-ci ildə Azərbaycanın Prezidenti yanında Qiymətli Kağızlar üzrə Dövlət Komitəsinin keçirdiyi “Qiymətli kağızlar bazarı” mövzusunda kursu, Distant  Təhsil Mərkəzi və Təcrübə və İşədüzəltmə Şöbəsi tərəfindən təşkil edilən “Elektron mühasibət proqramı”na dair təlim kurslarını müvəffəqiyyətlə başa vurmuşdur. 2008-ci ildə “Vətəndaş Cəmiyyətində Debat” ictiami birliyinin təşkil etdiyi tələbə debat turnirinin iştirakçısı olmuşdur. ADİU-nun 2007-ci ildə keçirdiyi tələbələrin elmi tədqiqatları müsabiqəsində III yeri tutmuşdur. 2008-ci ildə 4 ay “Rabitəbank” Açıq Səhmdar Cəmiyyətinin xəzinədarlıq departamentində təcrübə keçmişdir.

Ali məktəbi bitirdikdən sonra hansısa bir bankda işləməyi arzu edirdi. Hazırda “Bank standart”da “İpoteka” filialının kredit şöbəsinin mütəxəssisi kimi işləyir. Xaricdə təhsil aldıqdan sonra ixtisası üzrə ölkəmizdə tanınmış mütəxəssis olsa, özünü xoşbəxt edəcəyini düşünür.

Asudə vaxtlarında futbol oynayır və detektiv ədəbiyyatı oxuyur.

e-mail:  babayev_orxan@yahoo.com

İsmayılova Solmaz Elçin qızı

Solmaz nənəsinin adının daşıyır. Körpəlikdə çox mülayım, sakit uşaq olub. Uşaqları çox sevirdi. Ətrafdakı bütün uşaqlarla dil tapmağı bacarırdı. Bu xüsusiyyətini indiyə kimiyə saxlayıb.

Solmaz təhsilə olan marağından dolayı hələ məktəbə gedənə qədər qardaşı Anarın köməyilə yazıb-oxumağı, çoxlu şeirlər öyrənmişd. Bilmək istədiyi hər hansı şey haqqında təfsilatlı öyrənənə qədər çoxlu suallar verirdi.

Solmaz Elçin qızı İsmayılova 4 fevral 1997-ci ildə Bakı şəhərində anadan olub. Valideynləri Cəbrayıl rayonunda məcburi köçkündür. II sinifdən sinif nümayəndəsidir. Musiqi ilə məşğuldur. Pianino ifa etməyi bacarır.

Müəllimi Sevil Ağayeva: “ - Solmaz Laçın şəhər 1 saylı Uşaq Musiqi Məktəbinin VI sinfində fortepiano şöbəsində təhsil alır. Savadı, çalışqanlığı, məsuliyyəti ilə bütün şagirdlərdən seçilir. Məktəbdə keçirilən hesabat konsertlərində məhşur bəstəkarlar V. Motsartın “Türk marşı”, T. Quliyevin “Sənə də qalmaz”, Ü. Hacıbəyovun “Cəngi” əsərlərini məharətlə ifa edərək məktəbimizin müəllim və şagirdlərinin dərin rəğbətini qazanmışdır”.

Sinif rəhbəri Qaraqız Hüseynova: “ - Solmaz oxuduğu müddət ərzində özünü bacarıqlı, tərbiyəli bir şagird kimi tanıtmışdır. Dərs əlaçısıdır. Geri qalan yoldaşlarına həmişə kömək edir. Məktəbdə keçirilən bütün tədbirlərdə həvəslə iştirak edir. Nəzakətli və xoşrəftar olduğu üçün həm müəllim kollektivinin, həm də sinif yoldaşlarının dərin hörmətini qazanmışdır. Ölkəmizdə, dünyada baş verən hadisələri diqqətlə izləyir və yoldaşlarını məlumatlandırır. Ən böyük arzusu Qarabağ torpaqlarının işğaldan azad olması və valideynlərinin doğulduğu torpağı görməkdir”.

Solmazın özünü dinləyək: “ - Bütün dərslərimdən əla qiymətlər alıram. Cəbr, ingilis dili, Azərbaycan dili və ədəbiyyatı isə xüsusi sevdiyim fənlərdir. Məktəbimizdə keçirilən bütün tədbirlərdə iştirak etməyə çalışıram. Adətən aparıçı kimi, bəzən də şeir söyləyir, piaonada ifa edirəm.

İlk uğurum III sinifdə “Oxu” musabiqəsində I yer tutaraq fəxri fərman qazanmağımdır. Musiqi məktəbində keçirilən konsertdə iştirakıma görə diplomla təltif olumuşam. Uğur qazandığıma görə valideynlərim və hörmətli müəllimim Sevil Ağayevaya özümü borclu bilirəm. Eyni zamanda uşaq bağçasındakı müəllimlərim Xuraman və Xalidə xanımın da rolu böyük olub.

Motsart, Ü. Hacıbəyov, E. İbrahimova, Şəfiqə Axundova kimi sənətinin ustadlarını özümə ideal seçmişəm.

Uşaqlıqdan nənəm və anam kimi həkim olmaq istəyirəm. Nənəm və anam uğurlu, bacarıqlı həkim olduqları üçün bu peşəni sevirəm.

Kitab oxumaq və piano çalmaq asudə vaxtlarımın məşğuliyyətidir. Xoşbəxtliyi mehriban ailədə, səmimi insanların əhatəsində olmaqda görürəm. Yaxşı həkim və yaxşı insan olmaq, ali məktəbə daxil olmaq ən ümdə istəyimdir”. 

Vəliyev Ramil Ramiz oğlu

Sərdarlı Nicat Əflatun oğlu