Tağıyev Abbas İslam oğlu

Tağıyev Abbas İslam oğlu 17 fevral 1997-ci ildə Bakı şəhərində dünyaya göz açmışdır. Körpəlikdən aktiv uşaq olan Abbas hər bir məlumatla maraqlanan, güclü yaddaşa malik, saysız-hesabsız suallar verən uşaq olmuşdur. Daim biliyini artırmağa çalışırdı. Sakit, ünsiyyətcil və mehribanlığı ilə öz həmyaşıdlarından seçilirdi. Kiçik yaşlarından bağçaya getməyə başlamışdı. Məktəbəqədərki dövrdə artıq bütün hərfləri və rəqəmləri bilib, sərbəst yazıb-oxumağı bacarırdı. Artıq 2003-cü ildən məktəbə getməyə başlamışdır.

Əvvəlcə 247 saylı məktəbdə təhsilə başlamış, sonralar 2006-cı ildən sonra isə Binəqədi rayonundakı Ə. Ələsgərov adına 244 nömrəli tam orta məktəbində təhsilinə davam eləmişdir. Kiçik olmasına baxmayaraq yaşıdlarından güclü yaddaşı, hazırcavablığı, çalışqanlığı ilə seçilirdi. Dərslərində olduqca çalışqan, gündəlik tam hazır olan şagird məktəbin fəallarından biri olmağı da bacarmışdır. İbtidai sinif  müəllimi olan Fəridə  xanım onun unudulmaz və sevimli müəllimlərindəndir. Sinif rəhbəri olmuş Zərnişan və Pəri xanım daim rəğbət, sevgi, hörmət hisləri duyduğu müəllimlərdəndir. Dərslərinə olduqca çox zaman ayıran Abbas ən çox coğrafiya, ingilis dili, tarix fənnlərinə maraq göstərmişdir. Bu marağın yaranmasına səbəb isə fənləri sevməsi olmuşdur. Coğrafiyanı tədris edən - Yaşar müəllimin, ingilis dilini tədris edən - Pəri  xanımın, tarix fənnini tədris edən - Yaygül xanımın Abbasın bu fənlərdən dolayı savadlanmasında mühüm rolu olmuşdur.

2014-cü ildə 503 balla Azərbaycan Dövlət İqtisadiyyat Univesitetinin maliyyə fakültəsinə daxil olmuşdur. Hazırda təhsilini uğurla davam etdirməkdədir. Xarici dilləri bilən istedadlımız ingilis, rus dillərini mükəmməl bilmək istəyi vardır. Magistr təhsilini isə Amerikada davam etdirmək arzusundadır. Təhsili ilə yanaşı, idmana da böyük marağı olmuşdur. Özünü həm təhsil, həm də cüdo sahəsində ideal görən Abbas həqiqətəndə bunu sübut etmişdir. Əldə etdiyi uğurlar, qələbələr nəticəsində istedadı öz təsdiqini tapmışdır. 13 yaşından idmana marağı getdikcə artmağa başlamışdır. Olimpiya oyunlarına daxil olduğu üçün, ağıla və ən üstünlük verilən idman olduğuna görə, enerjisini düzgün sərf etmək üçün, həvəsi və marağı olması ilə bağlı Abbas cüdo idman növü ilə çox maraqlanmışdır. 2012-ci ildən Tofiq Bəhramov stadionun nəzdində fəaliyyət göstərən idman klubunda Elşən İsmayılov, Səhliman müəllimlərdən dərs almışdır. Qısa zamanda böyük uğur və nailiyyətlər qazanmışdır. 23-27 iyul 2012 tarixində keçirilən Avropa çempionatında 14-15 yaş qrupu üzrə 60 kq çəki dərəcəsində II yer tutduğuna görə-diplomla; 24-26 sentyabr 2012-ci il tarixində keçirilən dünya çempionatında 14-15 yaş qrupu üzrə 60 kq çəki dərəcəsində III yer tutduğuna görə-diplomla; 06-10 may 2013-cü il Qusarda keçirilən Heydər Əliyevin anadan olmasının 90 illik yubileyinə həsr olunmuş universal döyüş üzrə beynəlxalq turnirdə 16-17 yaş qrupu üzrə 65 kq çəki dərəcəsində III yer tutduğuna görə-diplomla; 15-18 iyul 2013 tarixində Qusarda keçirilən Avropa çempionatında 16-17 yaş qrupu üzrə 65 kq çəki dərəcəsində II yer tutduğuna görə-diplomla; Gənclər və İdman Nazirliyinin keçirdiyi yarışda universal döyüşdə 14-15 yaş qrupu üzrə 60kq çəki dərəcəsində II yer tutduğuna görə-diplomla;  2014-cü ildə keçirilən atletika üzrə yarışda II yer tutduğuna görə-diplomla; Binəqədi rayon Gənclər və İdman İdarəsi və Bakı şəhəri Təhsil İdarəsinin təşəbbüsü ilə Heydər Əliyevin anadan olmasının 91-ci ildönümü münasibətilə “Heydər Əliyev irsinin öyrənilməsi” mövzusunda Binəqədi rayon orta ümumtəhsil şagirdləri arasında keçirilmiş seminarlarda fəal iştirakına görə-fəxri fərmanla; 2012-ci tarixində keçirilən respublika çempionatında I yer tutduğuna görə-medalla; 23-27 iyul 2012 tarixində keçirilən Avropa çempionatında 14-15 yaş qrupu üzrə 60 kq çəki dərəcəsində II yer tutduğuna görə-medalla; 24-29 sentyabr 2012-ci il tarixində Anapa şəhərində keçirilən dünya çempionatında III yer tutduğuna görə-medalla; “Azərbaycan Qərblə Şərq arasında nəqliyyat dəhlizi kimi” mövzusunda seminarda H. Əliyevin imzası ilə təltif olunmuşdur.

Asudə vaxtlarında mütaliə etməyi çox sevən Abbas xarici ədəbiyyata daha çox üstünlük verir. Dostoyevski, Alber Kamyu, Frans Kafka kimi görkəmli yazıçıların əsərlərini davamlı olaraq oxuyur. Bundan başqa gitara, klassik musiqi, dram filmləri onun maraq sahələrindəndir. Qaranlığı lənətləməkdənsə, bir şam yandır - deyən gənc istedadlımız hər zaman zamanını düzgün sərf etməyə çalışır. Onun həyatında təhsilin və idmanın mühüm yeri var.

Atası İslam Tağıyev, anası İradə Tağıyeva həmişə Abbasa hər zaman dəstək olurlar. Onların arzusu övladının əsl insan olaraq yetişməsi və sənət sahəsində yüksək zirvələrdə olması, tanınmış dövlət işçisi kimi görməkdir. Abbas ən yaddaqalan günü kimi 2014-cü ildə məktəbi bitirməsi münasibilə keçirilən “Son zəng” gününü qey edir. Gələcək arzusu karyera qurmaqdır. Əgər həyatında heç bir dəyişiklik yoxdursa, deməli xoşbəxtsən - söyləyən istedadlımız gələcəkdə də uğur və nailiyyətlərini davam etdirmək arzusundadır. 

Yusifli İdris Pərviz oğlu

Gənc istedadlarımızdan biri də Bakı şəhəri 160 saylı klassik gimnaziyanın şagirdi Yusifli İdris Pərviz oğludur. O, hələ körpəlikdən sakit, dinc uşaq olub. Şahmata böyük maraq göstərir, saatlarla şahmat oynayanlara tamaşa etməyi sevərdi. Məktəbə gedənə qədər yazıb-oxumağı uşaq bağçasında öyrənən İdris burada keçirilən şahmat dərslərində həvəslə iştirak edirdi. Onun şahmata olan marağı getdikcə artaraq bu sahədə uğurlar qazanmasına yol açdı. Belə ki, 10-19 oktyabr 2010-cu ildə Xızıda təşkil olunan Uşaq-Gənclər Şahmat Məktəbləri komandalarının respublika birinciliyində iştirak edən komandanın üzvü kimi uğurlu çıxış etmişdir. Komanda bu yarışda II, İdris III yeri tutmuşdur. Bundan başqa 2007 və 2008-ci illərdə 31 Dekabr Dünya Azərbaycanlılarının Həmrəylik gününə həsr olunmuş turnirdə I yeri tutaraq diplom və mükafatla təltif olunmuşdur. 15 iyun 2008-ci ildə Milli Qurtuluş Gününə həsr olunmuş təsnifat turnirində III yerə sahib olunmuşdur. 12-17 noyabr 2009-cu ildə “Uşaq ili”nə həsr olunmuş gənclər arasında keçirilən şahmat turnirində birinci yer tutduğu üçün təltif edilmişdir. 18-27 mart 2011-ci ildə Novruz bayramına həsr olunmuş şahmat üzrə gənclər arasındakı təsnifat turnirində birinci dərəcə uğrunda yarışda birinci yer tutaraq mükafatlandırılmışdır. 2011-ci ilin mayin 6-da Heydər Əliyevin anadan olmasının 88-ci ildönümünə həsr olunmuş şahmat seansında fərqləndiyinə görə təltif olunmuşdur. 2012-ci ildə Bakı şəhər məktəbliləri arasında keçirilən XXV spartakiadanın proqramına daxil olan şahmat yarışında qalib gələrək I yerə çıxmışdır. 31 yanvar 2013-cü ildə Bakı şəhəri ümumtəhsil məktəbləri şagirdləri arasında keçirilmiş şahmat yarışında II yeri əldə etmişdir. 16 may 2013-cü ildə respublika ümumtəhsil və ilk peşə ixtisas təhsilli müəssisələri şagirdlərinin VII spartakiadasının şahmat idman növü üzrə final yarışlarında birincilik qazanmışdır.

İdrisin ən böyük arzusu qrossmeyster olmaqdır. İdmanın zəka tələb edən bu növü ilə məşğul olmaqla yanaşı o, dərslərini də yaxşı oxuyur və nümunəvi şagirdlərdəndir. İdrisin ən çox sevdiyi fənlər fizika və Azərbaycan tarixidir.

Onun asudə vaxtları az olur. Boş vaxtını da səmərəli keçirməyə çalışır. Bunun üçün ya şahmat oynayır, yaxud da musiqiyə qulaq asır. Bir vaxtlar İdris rəssamlığa da maraq göstərirmiş, bu zaman daha çox təbiət mövzusuna üstünlük verirmiş.

Əldə etdiyi uğurlara görə ən çox anasına minnətdar olduğunu bildirsə də, heç kimə oxşamaq istəmir. Onun fikrincə hər kəsin özünəməxsus cığırı olmalıdır.

Yuxarıda sadaladığımız qabiliyyətləri barədə jurnal və qəzetlərdə məlumat verilib. Gənc istedadımızla fəxr edir və gələcəkdə beynəlxalq yarışlarda qələbə qazanmağı arzulayırıq.

Aysun Telman qızı Cəbrayılova

Aysun Telman qızı Cəbrayılova 17 iyun 1999-cu ildə Lənkəran şəhərində anadan olmuşdur. Bakı şəhəri Binəqədi qəsəbəsindəki Rövşən İmanov adina 205 saylı orta məktəbdə oxuyur.

Aysun oxuyan, kitablarla maraqlanan, bir şagirddir. Oxuyub-yazmağa, ümumilikdə təhsilə marağı əsasən anasının tövsiyələri ilə yarandığını desək yəqin ki, yanılmarıq. Eyni zamanda təhsildəki nailiyyətlərini daha da inkişaf etdirməkdə müəllimlərinin danılmaz əməyi olub.

Aysunun çox sevdiyi fənlər tarix, ədəbiyyat, Azərbaycan dili olub. O, məktəbdə  əlaçı şagird olaraq oxuyub, məktəb tədbirlərində aparıcı rolunu oynayırdı.

Aysun Əldə etdiyi nailiyyətlərə gorə anasına borcludur.

Aysunun ən böyük istəklərindən biri tərcüməçi olmaqdir. Ona bu həvəsi Azərbaycan dili müəllimi Hökümə xanım yaratmışdır. Məqsədi gələcəkdə ali məktəbə qəbul olmaq, magistr pilləsini də başa vurub tərcüməçi olmaqdır. Gələcək planlarından biri isə tanınmış, iz qoymuş arxeoloq olmaqdır.

Asudə vaxtlarını kitab oxumaqla keçirir. Ən çox sevib, dəyər verdiyi kitab isə N. Gəncəvinin “Xəmsə”sidir . 

İsmayılova Aysel Fərhad qızı

İsmayılova Aysel Fərhad qızı 25 fevral 2004-cü ildə Bakı şəhəri Şüvəlan qəsəbəsində dünyaya göz açmışdır. Hələ məktəbə getməmişdən öncə hərfləri tanıyır, amma yazmağa bir o qədər maraq göstərmirdi. 7 yaşından Ayselin rənglərə marağı yaranmağa başlamışdı. Hər şeyə rəssam gözü ilə baxmağa başlamışdı, gördüyü maraqlı şəkillərə baxıb onları çəkməyə başlamışdı.

İlk təhsilini Şüvəlan qəsəbəsində yerləşən İlqar Muradov adını daşıyan 237 saylı məktəbdə almağa başlayır. Rəsm və riyyaziyyata daha çox maraq göstərirdi. Ayselin istedadı istər məktəb,istərsə də məktəbdənkanar tədbirlərdə özünü göstərirdi.

2012-ci ilin mart ayının 1-də ”Sirlər dünyası” adlı fərdi sərgisi təşkil olundu. Bakı Şəhər Mədəniyyət və Turizm İdarəsi tərəfindən fərdi sərgisinin təşkilinə görə fəxri fərmanla təltif edilib. “Mədəniyyət” qəzetində sərginin təşkili, müəllifi işıqlandırılıb. 2012-ci ildə martında dərnək üzvləri arasında keçirilən əl işlərindən ibarət sərgidə II yeri tutduğuna görə Əhməd Baxşıyev adına 38 saylı Texniki Yaradıcılıq Mərkəzi tərəfindən diplomla təltif edilmişdir. 2013-cü il martın 5-də sərgilərdə, respublika və beynəlxalq səviyyəli tədbirlərdə iştirakına görə Yaradıcılıq Mərkəzi tərəfindən fəxri fərmanla təltif olunmuşdur. 2013-cü il dekabr ayının 21-də Yaponiya beynəlxalq müsabiqəsində, respublika baxış müsabiqəsində fəal iştirakına görə və dəfələrlə rəsmləri Yaradıcılıq Mərkəzində sərgiləndiyinə görə Azad Həmkarlar İttifaqı Xəzər rayon Komitəsi tərəfindən fəxri fərmanla təltif edilmişdir.

Aysel dərslərini yaxşı oxuyur, çünki atacağı addımlarda təhsil onun üçün önəmli yol göstəricisinə çevriləcək. Asudə vaxtlarında rəsm çəkməklə yanaşı, həmçinin muncuqla maraqlı əl işləri hazırlamağı sevir.

Bu günə qədər əldə etdiyi uğurlarda istər valideynləri, istərsə də müəllimi Rəfiqə xanımın rolu danılmazdır.

Aysel orta məktəbi uğurla bitirib öz seçdiyi sahə üzrə ali təhsil almaq arzusundadır. Arzudan arzu yaranır, incəsənətdə, rəssamlıqda bütün zirvələrə, pillələrə addım-addım qalxmağı, ucalmağı qaşısına məqsəd qoyan musahibimiz bu yolda inamla addımlayır.

Biz də arzu edirik ki, Aysel öz uğurlar silsiləsini beləcə davam etdirsin!

Səfərli Şükufə Şahin qızı

Səfərli Şükufə Şahin qızı 1999-cu il 20 aprel tarixində Bakıda anadan olmuşdur.Adını babası qoydu,nənəsinin adıyla adlandırılan balaca Şükufə. Sevimli məşğuliyyəti gəlinciklərlə oynamaq idi,onlara paltar tikir, saçlarını darayır,qayğı göstərirdi. Bu onun mehribanlığından irəli gəlirdi. Ən çox mehrini babasına salmışdı,hətta balaca Şükufəyə şahmat oynamağı da babası Sabir Səfərov öyrətmişdi. 2005-ci ildə Nərimanov rayonunda yerləşən 82 saylı məktəbin I sinfinə daxil oldu.

10 yaşından futbola marağı yaranmağa başladı. Futbol onun həyatının ayrılmaz bir hissəsinə çevrilmayə başladı. İspaniyanın Real-Madrid kulubunun azarkeşidir. Hətta parça üzərinə işlədiyi əl işlərində də müxtəlif futbol komandalarının loqolarının təsvirini həkk etdirir.

Şükufə dərslərini yaxşı oxuyur. Məktəbdə müxtəlif tədbirlərdə onun yeri əvəzedilməzdir. Kompüterdə müxtəlif təqdimatların hazırlanması onun sevimli işidir. M.Ə.Rəsulzadənin, Zərifə Əliyevanın yubileylərinə hazırlanmış tədbirlərdə bu vəzifəni ona həvalə etmişdilər. Şükufə də öz səyi sayəsində bu öhdəliyi məsuliyyətlə yerinə yetirib bir daha ona olan ümidləri doğrultdu. Hazırda o, X sinifdə təhsil alır.

Boş vaxtlarında müxtəlif təsvirləri muncuqlarla,sapla parça üzərində işləməyi sevir. Əsas məqsədi ali məktəbə daxil olmaqdır. Doğrudur,onun peşə seçimi elə də asan olmamışdı. Əvvəllər həkim olmağa can atırdı, lakin sonradan humanitar fənnlərə olan meyli onun fikrini dəyişdirdi. Tarixçi və ya tərcüməçi olmaq arzusundadır. Ailəsi, yaxınları onun hüquqşunas olmasını istəyir, amma bu qərarı o, özü verəcək.

Gələcək planlarında İspaniyaya səfər də mühüm yer tutur. Ancaq Real-Madridə olan sevgisi üçün. Biz də Şükufəyə uğurlar arzu edirik,açdığı bütün qapıların uğura açılması diləyi ilə!

Günay Vasif qızı Abbaszadə

Bu qəhrəmanımızın adı Günaydır. Günay körpəlikdə sakit uşaq olub. Bütün qız uşaqları kimi xoşladığı məşğuliyyəti gəlinciklərlə oynamaq idi. Eyni zamanda rəsm çəkməyi də çox sevirdi. Məktəbə gedənə qədər hərfləri şifahi bilirdi. Yazı yazmağı da nənəsinin sayəsində öyrənmişdi.

Günay Vasif qızı Abbaszadə 2002-ci il aprelin 1-də Bakı şəhərində anadan olub.

2008-ci ildə Abşeron rayonundakı Hüseyn Axundov adına Saray 3 saylı tam orta məktəbin I sinfinə daxil olub. Hazırda həmin məktəbdə oxuyur. Əlaçıdır. Ən çox sevdiyi fənn ana dili, riyaziyyat, ingilis dilidir. Novruz bayramında, Yeni il şənliyində, “Əlifba” bayramında fəal iştirak edir. Həyatında ən maraqlı, uğurlu gün məktəbə getdiyi gündür.

Müəllimləri də Günay barədə ağızdolusu müsbət fikirlər söylədilər. Onun həm təlimdə, həm də tərbiyədə seçilən şagirdlərdən olduğunu xüsusi vurğuladılar. Məhz bu keyfiyyətlərinə görə Günay məktəbdə həm müəllimlərinin, həm də sinif yoldaşlarının rəğbətini qazana bilib. Günay məsuliyyətli şagird, etibarlı dost, hər çətinlikdə yoldaşlarının köməyinə çatmağa çalışan humanist bir qızdır. Günay eyni zamanda Sumqayt şəhər Uşaq və Yeniyetmələrin Yaradıcılıq Mərkəzində rəsm dərnəyinin üzvüdür.

Təhsildə və ümumiyyətlə məktəb həyatında uğur qazanmağında ilk müəlliminə borcludur. Gələcəkdə dizayner olmaq istəyir.

Rəsm çəkməyi xoşlayır.

Babayeva Aytən Rafiq qızı

Babayeva Aytən Rafiq qızı 30 iyul 1999-cu ildə anadan olub. Kiçik yaşlarından şıltaqlığı ilə həmyaşıdlarından çox seçilirdi. Hələ kiçik yaşlarından nənəsindən, bacısından öyrəndiyi şeirləri tez qavrayıb, yüksək intonasiya ilə söyləməyi bacarırdı. Elə lap körpəlikdən Aytən incəsənətə olan marağını müxtəlif mahnılar oxumaqla, şəkillər çəkərək albomlar düzəltməklə biruzə verirdi. İlk təhsilini Nərimanov rayonunda yerləşən 82 saylı məktəbdə almağa başlayır. Qədəmlərini məktəbə basdığı andan məktəbdə hamının, xüsusiylə öz müəllimələrinin sevimlisinə çevrilib. I sinifi bitirmək münasibəti ilə keçirilən tədbirdə Aytən şeirlər deyərək, müxtəlif obrazları canlandıraraq öz bacarığını nümayiş etdirmişdir. Bu çıxışından sonra Aytənin məktəb tədbirlərində iştirakı silsilə təşkil etməyə başladı.

Onun həzin səsi hamını valeh edirdi. Bu hələ istedadın ilk işartıları idi. Valideynləri bu istedadı görüb onu bu sahəyə yönəltdilər. Aytən 2010-cu ildə Q. Qarayev adına 11 illik Uşaq Musiqi Məktəbinə seçim yolu ilə daxil oldu. Fortepianonun dilləri onun ürək döyüntüləri ilə ahəngdar döyünürdü. Məktəbdə olduğu kimi burda da öz xoş siması  ilə hamının rəğbətini qazandı. Müəlliminin tövsiyyəsi ilə o, xor kollektivində oxumağa başladı. 2012-ci ildə Respublika usaq xor yarışmasında I dərəcəli diplomla təltif olundu. 2014-cü ildə Heydər Əliyevin 90 illik yubileyinə həsr olunmuş gül bayramında dövlət başçısı İlham Əliyev qarşısında çıxış etmiş, bu tədbir dövlət televiziyasında yayımlanmışdır.

Aytən məktəb dərslərini də ikinci plana keçirmirdi. Məktəblərarası keçrilən bilik yarışmasında biologiya fənni üzrə II yerə layiq görülmüşdür.

Aytənə uğurlar arzu edirik! Onu gələcəkdə tanınmış musiqiçi olacağına şübhə etmirik!

Əliyev Mirhəsən Fərman oğlu

Azərbaycanın gənc və istedadlı vətəndaşlarından biri də Əliyev Mirhəsən Fərman oğludur.  Mirhəsən 8.05.2005-ci ildə Bakı şəhərində dünyaya göz açmışdır. Valideynlərinin dediyinə görə Mirhəsən çox dəcəl olmuşdur. 3-6 yaşlarında 38 saylı bağçaya getmiş, yazıb oxumağı da məhz orda öyrənmişdir. Bir vətənpərvər kimi böyütməyə cəhd edən valideynləri əməklərinin bəhrəsini görmüş, Mirhəsənin ilk rəsm əsəri “20 yanvar” şəhidlərinə həsr olunmuşdur. Rəsmlə yanaşı o, bədii qiraətlə də məşğul olur. Gözəl nitq qabiliyyəti ilə məktəbdə təşkil olunmuş tədbirlərdə şer demişdir. Mirhəsən ilk təhsilini Aslan Ağaverdiyev adına 31 saylı məktəbdə başlamış. Hal-hazırda isə Vaqif Mustafazadə adına 2 saylı incəsənət məktəbinin 1 sinfində oxuyur. Mirhəsənin rəsmə olan marağı onu heç də dərslərdən uzaqlaşdırmır, əksinə o məktəbdə dərslərini əla oxuyur. Ən çox sevdiyi fənnlər isə Azərbaycan dili, riyaziyyat və rəsm dərsidir. Mirhəsən gələcəkdə vətənə layiqli bir övlad olacağını düşünür. Onun üzərində əməyi böyük olan valideynlərinə isə sonsuz minnətdarlıq bildirir. O tarixin yaddaşına rəssam olaraq düşmək və silinməz iz buraxmaq arzusundadır . Əli boş vaxtlarında rəqslə məşğul olmağı unutmur. Bir vətənpərvər kimi isə rəsm əsərlərində əsgər, döyüş səhnələrinə yer verir. Bizə uğurlar deyirik Mirhəsənə. Ümid edirik ki, o vətənə layiq bir əsgər, bir rəssam olar...