Mirzəzadə Akif İlham oğlu

Mirzəzadə Akif İlham oğlu 20 avqust 2005-ci ildə Goranboy rayonunda anadan olub. Ağıllı və sözəbaxan uşaq olması ilə seçilən müsahibimizin uşaqlıqda  sevimli məşğuliyyətləri cizgi filmlərinə, köhnə Azərbaycan filmlərinə, uşaq verilişlərinə baxmaq olub. Məktəbə gedənə qədər artıq hərfləri və rəqəmləri tanıyır, yazmağı və oxumağı bacarırdı. Bunları anasının sayəsində öyrənmişdi. 5 yaşında onun rəsm üzrə istedadı özünü büruzə verməyə başlayıb. Bu, Akifin bağçadakı müəllimlərinin köməyi ilə aşkar edilib. Məşğələlərdə fəal iştirak etməklə rəsm qabiliyyətini üzə çıxarıb. 2012-ci ildə Abşeron rayonu, Masazır qəsəbəsində Ə.Vahid adına 1 saylı tam orta məktəbin I sinfinə qəbul olunan Akif, hazırda həmin məktəbin Va sinif şagirdidir. Dərslərini əla qiymətlərlə oxuyur. Ən çox riyaziyyat, Azərbaycan dili, Azərbaycan tarixi və ədəbiyyat fənlərini xoşlayır. 

Diplomla təltif edildiyi günləri ən uğurlu günlər hesab edən müsahibimizin uğurlarını təqdim edirik: I sinifdə oxuyanda Əlifba təlimini müvəffəqiyyətlə başa vurduğuna görə diplomla, III sinifdə təlimdə qazandığı uğurlara və nümunəvi davranışa görə fəxri fərmanla təltif edilib. Məktəbdə təşkil edilən Əlifba bayramı, Yeni il, Novruz bayramı şənliklərində də fəal iştirak edib. 

Qazandığı uğurlara görə valideynlərinə, ibtidai sinif müəllimi Kəmalə Qasımovaya, həmçinin ikinci sinifdən onlara rəhbərlik edən Günay Abdullayevaya borclu olduğunu bildirir. Fəaliyyəti ilə bağlı yüksək zirvələri fəth etmək arzusundadır. Dünyada tanınan bir insan olmaq istəyir. 10 yaşından hüquqşünas olmaq barədə düşünür. Asudə vaxtlarını kompüterdə əlavə faydalı məlumatlar tapmaqla, bəddi kitablar oxumaqla və dostları ilə birgə vaxt keçirməklə dəyərləndirir. Rəsm çəkməyi xoşlayır və rəsmlərində müxtəlif mövzulara toxunur. 

Gələcəkdə məktəbi uğurla başa vurub ali təhsil ocağına qəbul olmaq istəyir. Hüquqşünas olub xalqına xidmət etməklə və Azərbaycana layiq vətəndaş olmaqla adını tarixin yaddaşına yazacağına inanır. 

Biz də redaksiyamız adından Akifə arzularının çin olması yolunda inamla addımlamağı tövsiyyə edir və gələcəkdə qazandığı uğurlar sayəsində onun adını tez-tez eşidəcəyimizə ümid edirik.