Abbaslı Cavid Ramil oğlu

Abbaslı Cavid Ramil oğlu 2007-cil martın 28-də Bakı şəhərində doğulmuşdur. Cavidlə söhbətimizdən əvvəl onun valideynləri ilə danışdıq. Cavidin anası onun körpəlikdən çox sakit uşaq olduğunu qeyd edir. Cavid maşın oyuncaqları ilə oynamağı çox sevib. Balaca qəhrəmanımız  2 il məktəbəqədər hazırlıq kurslarına getmiş və onun təlim-tərbiyəsi ilə evdə anası da məşğul olub. Cavid 4 yaşında məktəbə hazırlaşarkən onun  güclü zehni olduğunu və məntiqi tapşırıqların öhdəsindən tez və asan gəldiyini aşak edən valideynləri övladları ilə fərəhləndiklərini bildirdilər. Ağıllı müsahibim məktəbə getməzdən əvvəl yazıb-oxumağı bacarırdı. Cavid hal-hazırda Bakıxanov qəsəbəsində 72 saylı riyaziyyat təmayüllü litseyin 4-cü sinfinin rus bölməsində təhsil alır. Bu dəfə də qaydamızı pozmayıb balaca qəhrəmanımıza suallar ünvanladıq. Cavid özü haqda bizimlə aşağıdakıları paylaşdı:

 “Mən artıq üç ildir ki, sinif əlaçısıyam. ən çox sevdiyim fənlər riyaziyyat, Rus dili, Azərbaycan dili və informatikadır. 1-ci sinfi başa vurarkən Əlifba Bayramında iştirak etmişəm. Buradakı rolum isə “Qlupıy serıy mışonok” nağılındakı siçan rolu olub. Bundan başqa 11-ci siniflərin buraxılış tədbirində mahnı və şeirlərlə çıxış etmişəm. 1-ci sinfi bitirəndə “Müvəffəqiyyətlə bitirmə” diplomuna laiq görülmüşəm. Mən uğur və nailiyyətlərimi dərslərimdə çalışqan və məsuliyyətli olmağımla əlaqələndirirəm. Hələ ki, gələcək seçimlərimlə bağlı fikrim yoxdur. Asudə vaxtlarımda bəzən şəkil çəkir, bəzən kompüterdə astronomiya, xüsusilə də Mars planeti haqqında, qalaktikada baş verən hadisələr barədə məlumatlarla maraqlanıram”.

Biz də Cavidə gələcək həyat fəaliyyyətində uğurlar arzulayırıq.