Şamxal Ravil oğlu Baybekov

Bu günün istedadlı poliqlotu və mühəndisi Şamxal Ravil oğlu Baybekov 13 avqust 1997-ci ildə Bakı şəhərində anadan olub. H. Hüseynov adına 83 saylı məktəb-liseyi bitirdikdən sonra Qafqaz Universitetinin kimya mühəndisliyi ixtisasında təhsil alır. Məktəbdə əlaçı olmadığını etiraf edən Şamxal, aktiv şagird olduğunu deyir. Dəqiq elimləri sevdiyini deyən gənc mühəndis bütün həyatını kimyanın bütün sahələrini araşdırmaqda görür. Şamxalın sözlərinə görə onun inkişafında sinif rəhbəri Nuridə xanımın əməyi çox olub. Məktəb vaxtı bütün tədbirlərdə iştirak edib, indisə o tədbirləri həyatının xoş anları kimi xatırlayır. Şamxalın uğurları tələbəlik illərində də davam edir. 2016-cı ildə Gənc Tədqiqatçıların IV Beynəlxalq elmi konfransında iştirak edib, bundan başqa bir neçə tədbirdə fəallığı ilə öndə olub.

Əslində heç kimə oxşamaq istəməyən Şamxal ona bütün fəaliyyətlərində dəstək olduqlarına görə valideynlərinə borclu olduğunu deyir. Məqsədi ən azı kimya üzrə fəlsəfə doktoru, daha sonra isə professor olmaqdır. Kimyaçı olmaq və eyni zamanda kimyadan dərs demək istəyən Şamxal VIII sinifdən artıq bu qərara gəldiyini deyir. Anasının onun üçün aldığı müşahidə aparatları qəhrəmanımızın bu sahəyə meyl göstərməsinin əsas səbəbi olub.

Asudə vaxtlarını elmi araşdırmalarla keçirir, kainata, elmi-kütləvi informasiyalara aid sənədli filmlərə baxmağı xoşlayır. Kimyaya aid elmi məqalələr oxuyur, bundan başqa oriqami ilə maraqlanır.

Rəssam ruhlu mühəndisin sözlərinə görə rəsm çəkməyi bacarmış olsaydı təbiətin və kainatın rəsmini çəkərdi. Mümkün qədər tez təhsilini bitirmək, tezliklə iş həyatına başlamaq istəyən Şamxal universitetdə işləmək, araşdırmalarını orada davam etdirmək istəyir. Eyni zamanda Azərbaycanda kimya sahəsinin inkişafına öz töhfəsini vermək istəyir.

Valideyinlərinin sözlərinə görə Şamxal körpəlikdə də çox maraqlı uşaq olub. Həm nadinc, həm də tərbiyəli. 4 yaşında Azərbaycan əlifbasını öyrənmiş və artıq heca ilə sözləri sərbəst oxuyurdu. 5 yaşında isə rus dilində həm yazır, həm oxuyur, paralel olaraq ingilis dilini öyrənirdi. Maşınlarla maraqlanır və nişanlarla modellərini tapırdı. Çox gözəl rəsmlər çəkirdi (ailə arxivində saxlanılır).

Məktəbə gedəndə artıq üç dildə danışır və oxuyurdu. 4 yaşından Zabitlər Evinin “АБВГ-Дейка”, 5 yaşında isə ingilis dili qrupunda məşğul olub. Və bütün bu illərdə ingilis dili üzrə uğurlarının təməlini Reyhan müəllim qoyub.

Şamxalın valideynləri belə hesab edir ki, bütün uşaqlar bu dünyaya istedadlı gəlir, sadəcə onlarla məşğul olmaq lazımdır. Bütün uşaqlar saf bir mələkdirlər, onlara düzgün istiqamət verib qorumaq lazımdır. Uşaqlar çox həssasdırlar səmimiliyi hiss edirlər və bu zaman nəticə tez bilinir.

Biz də redaksiyamız adından gənc mühəndisimizə uğurlar arzu edirik!