Ayla Mamed qızı Ağalarova

Azərbaycan istedadlı gəncləri ilə həmişə tanınmışdır.  Belə gənclərimizdən biri də Ayla Mamed qızı Ağalarovadır.  Valideynləri deyir ki, Ayla körpəlikdə  çox sakit, ağıllı bir uşaq olub. O, cizgi filmlərinə baxmağı, onların səsi ilə danışmağı, nağıl qəhrəmanlarının şəkillərini çəkməyi, plastilindən cürbəcür əşyalar düzəltməyi çox xoşlayırdı.

Məktəbə gedənə qədər bütün hərfləri tanıyır, qısa-qısa sözlər yaza bilirdi və bütün bunları o, özü öyrənmişdi. Kömək lazım olarsa  o, valideynlərinin yanına gedir, onlardan kömək istəyirdi.

Onun yazıb-oxumağa, nələrisə çəkməyə cox marağı vardı.  Aylada yazıb-oxumaq həvəsinin yaranmasında özündən altı yaş böyük olan bacısı Elviranın böyük rolu olmuşdur.

Ayla 2009-cü ildə 102 saylı məktəbin I sinfinə daxil olub, hazırda da 102 saylı məktəbin VI sinfində təhsil alır. O, dərslərini əla oxuyur, müəllimlərinin etimadını hər zaman doğruldur. O, məktəblərində təşkil olunan bütün tədbirlərdə fəal iştirak edir. Üzgüçülüklə, voleybolla, rəsmlə məşğul olur və bir çox tərifnamələrə layiq görülüb. Ayla rəsm işlərindəki  uğurlarına görə atasına borclu olduğunu düşünür.

Ayla asudə vaxtlarında şirniyyatlar bişirməyi, plastilindən müxtəlif əşyalar düzəltməyi xoşlayır. Onun əsas məqsədi tarixin yaddaşında insanlara kömək edən bir insan kimi qalmaqdır. Ayla “Mən də  uşaq olmuşam” verilişində aparıcı rolunda iştirak edib, burada onun müsahibi rəqqasə Aliyə xanım olmuşdur. Arzuları,  məqsədi böyük olan Aylaya biz də  uğurlar arzu edir, dərslərində müvəffəqiyyətlər diləyirik.