İsayev Hüseyn Vasif oğlu

Hüseyn hələ yaşı az olandan istedadlı uşaq olduğunu, yaşıdlarından fərqləndiyini hərəkətləri, davranışları, hadisələrə reaksiyası ilə biruzə verib.O, 4-5 yaşlarından öz təşəbbüsü və anasının köməyi ilə yazıb-oxumağı  öyrənmişdi. Hətta avtomobillə yolda sürətlə hərəkət etdikdə belə cəld bir şəkildə yol kənarındakı yazıları oxumağı bacarırdı.Əlbəttə hələ məktəbə getməyən azyaşlı bir uşaq üçün bu, böyük nailiyyətdir. Hüseyn uşaqlıqda sakit təbiətli, mehriban, yüksək intellektual səviyyəyə sahib, əlavə məlumatlarla maraqlanan bir uşaq olmuşdur. Sevimli məşğuliyyətləri ensiklopediyalar, xarici və yerli uşaq ədəbiyyatları oxumaq, pazlla oynamaq, konstruktordan evlər düzəltmək (bu oyunu çox sevdiyinə görə valideynləri onun nə vaxtsa hətta inşaat mühəndisi olacağını düşünmüşlər), futbol oynamaq olub. Valideynləri hesab edir ki,Hüseynin əsas istedadı onun zəkasıdır, təhsildəki uğurlarıdır və  o gələcəkdə də əgər hər hansı bir zirvəyə qalxsa, bu, onun biliyinin, savadının sayəsində olacaq. Təhsilə maraq isə onda elə birinci sinifdən yaranmışdı. Hüseyn ziyalı ailəsində böyüdüyündən bu marağı onda yaratmağa heç ehtiyac da yox idi. O artıq kiçik yaşlarından bunu dərk etmişdi və ailənin digər üzvləri də bu yolda ona daima dəstək olurlar.

Hazırda Elitar Gimnaziyada təhsil alan Hüseyn dərslərini əla qiymətlərlə oxuyur və  həmişə əlaçı olmuşdur.Bununla yanaşı o təhsil aldığı tədris müəssisələrində təşkil olunan tədbirlərdə hər zaman böyük fəallıqla iştirak etmişdir. Kiçik yaşlarından bağça tədbirlərində həmişə baş rollarda iştirak etmişdir. Məsələn, tədbirlərin birində  şah obrazını canlandırmışdır. Məktəbdə də bir sıra tədbirlərdə iştirak etmiş, rəqs etmiş  və  tamaşada Xosrov şahı canlandırmışdır.

Hüseyn həm də cüdo ilə məşğul olur.Çoxtərəfli istedadı olan qəhrəmanımız idmanda da çoxlu nailiyyətlər əldə etmişdir. Karate üzrə göy kəməri əldə etdiyi günü həyatının ən uğurlu günü hesab edir. Ondan sonra bir sıra uğurlar qazanmasına  baxmayaraq, bu onun  ilk uğuru olduğundan və tamamən fərqli hislər yaşadığından həmin günü unudulmaz hesab edir. Yaşının az olmasına baxmayaraq müasir dövrün tələblərini düzgün qiymətləndirməyi bacaran istedadımız gələcəkdə proqramçı olmaq arzusundadır. Özünün dili ilə desək “Bu sahə haqqında öyrəndikdən sonra bu fikrə düşdüm. Çünki hazırki dövrdə texnologiyalar durmadan inkişaf edir və cəmiyyətin bizdən bunu tələb edir.”