Yüzbaşeva (Quliyeva) Dilbər Tofiq qızı

 

Dilbərin adını anasının adını yaşatmaq məqsədilə babası Yusif bəy qoyub. Dilbər körpəlikdən sakit uşaq olub. Böyüdükcə çox ağıllı və mehriban uşaq olacağı hiss olunurdu. Uşaq bağcasında tərbiyə aldığı illərdə şəkil çəkməyi, rəngləməyi xoşlayırdı. Evdə Azərbaycan dilində danışılmasına baxmayaraq, uşaq bağcasında rus dilini öyrənmişdi. Gözəl yaddaşa malik olduğundan bayramlarda böyük həcmli şerləri söyləmək ona tapşırılırdı.

Dilbərin 5 yaşı olarnda bacısı Leyla I sinifdə oxuyurdu. Leyla “Əlifba” və “Ana dili” kitablarındakı şeirləri öyrəndikcə Dilbər də bütün şeirləri əzbərləmiş, yazmağı da öyrənmişdi. Dilbər I sinifdə oxuyarkən müvəffəqiyyətlərini görən valideynləri imtahan verərək III sinifə keçirilməsi üçün direktora müraciət edir. Lakin Dilbərin ilk müəllimi Aliyə xanım belə etmək lazım olmadığını bildirmişdir. Sonralar Aliyə xanım etiraf edir ki, uşağı çox istədiyindən onun sinifdən getməsini istəməmişdi.

Dilbər Tofiq qızı Yüzbaşova 22 iyun 1983-cü ildə Bakı şəhərində anadan olub. 1990-cı ildə Qaradağ rayonundakı 106 saylı orta məktəbin I sinfinə daxil olub. 1995-ci ildən 1999-cu ilədək Nərimanov rayonundakı Bağça-Məktəb-Lisey Kompleksinin nəzdindəki 43 saylı liseydə orta təhsilini davam etdirib. XI sinfi 2000-ci ildə 139 saylı orta məktəbdə qırmızı attestatla bitirib, elə həmin ildə Azərbaycan Tibb Universitetinin müalicə-profilaktika fakültəsinə daxil olub. 2006-cı ildə unversiteti bitirib internatura keçdikdən sonra Təcili Yardım Xidmətində işə başlayıb. Əvvəl 15 saylı Təcili Yardım Stansiyasında səyyar həkim, qısa bir müddətdən sonra reanimasiya briqadasında həkim kardioloq kimi çalışıb. Hazırda 15 saylı TYS-nın filialında böyük həkim, həmçinin böyüklərin anestezioloji-reanimatoloji briqadasında həkim kimi fəalyyət göstərir.

Dilbər: “ - Həmişə həkimliyi ali bir peşə hesab etmişəm. Bu sənəti seçməkdə valideynlərimin böyük rolu olub. Onlar məndə həm maraq yaradıb, həm də çox dəstəkləyiblər.

Orta məktəbdə dərslərimdən əla qiymətlər almışam. Həmişə çalışmışam bütün fənləri oxuyum. Sevdiyim fənlər kimya, riyaziyyat, fizika, biologiya, insan və cəmiyyət olub. Məktəblilərin fənn olimpiadalarında iştirak etmiş, 1998-ci ildə IX sinifdə oxuyarkən fənn olimpiadalarının respublika turunda kimya fənni üzrə III dərəcəli, 1999-cu ildə II dərəcəli diplomla təltif olunmuşam.

Belarusiyanın Minsk şəhərində keçirilən kimya üzrə beynəlxalq Mendeleyev olimpiadasında Azərbaycanı təmsil etmiş, diplomla təltif olunmuşam. Olimpiadadan qayıtdıqdan sonra bizi təhsil naziri M. Mərdanov qəbul etmiş və respublikamızı uğurlu təmsil etdiyimiz üçün təşəkkür elan etmişdir. Bundan başqa dəfələrlə məktəbdə keçirilən ingilis dili gecələrində iştirak etmiş, tərifnamə ilə təltif olunmuşam.

Ali məktəbdə sevdiyim fənlər insan anatomiyası, normal fiziologiya, daxili xəstəliklərin propedevtikası olub.

Sevdiyim ixtisasa yiyələnməkdə anam Rübabə xanımın böyük rolu olub.

Ali məktəbi bitirdikdən sonra ideyalarım böyük idi, lakin bu günümə də şükür edirəm. İşimdə məsuliyyətli olmağa, fəqlənməyə çalışıram. BŞT və TTYS-nın müdiriyyəti də bunu diqqətdən kənar qoymayıb. 2010-cu il 8 mart ərəfəsində səmərəli və qüsursuz fəaliyyətimə görə fəxri fərmanla təltif olunmuşam. Ümüd edirəm ki, uğurlarım bununla bitməyəcək.

Asudə vaxtlarımda kitab oxumağı, bilgisayarda çalışmağı, ailə üzvlərimlə istirahət etməyi xoşlayıram. Haqqımda “Azərbaycan müəllimi” qəzetinin 2 aprel 1998-ci il və 1-7 aprel 1999-cu il buraxılışlarında yazılar olub”.

e-mail: physician83@mail.ru