Əmiraslanov Zahir Müşfiq oğlu

Əmiraslanov Zahir Müşfiq oğlu Qaradağ rayon Ələt qəsəbəsindəki E. Rzayev adına 127 saylı məktəb VI sinif şagirdidir.

Zahir körpəlikdə çox sakit uşaq olub. Uşaqlıqdan at minməyə çox həvəsi var idi. Elə indi də kəndə babasıgilə gedib, at minmək üçün yay tətilini səbirsizliklə gözləyir. Məktəbə gedənə qədər yazıb-oxumağı bacarmırdı, amma on minə qədər ədədləri asanlıqla toplaya və çıxa bilirdi. Zahir bütün günü babasının yanında olurdu. Babası müəllim işlədiyi üçün Zahirdə dərslərə maraq lap körpəlikdən yaranıb.

Zahir: “ - Dərslərimi yaxşı oxuyuram. Bütün fənləri sevirəm. Ən çox sevdiyim fənlər Azərbaycan dili və riyaziyyatdır. Əlifbanı öyrəndikdən sonra biz Əlifba bayramını qeyd etdik. Mən çox sevinirdim, çünki artıq yazıb-oxumağı bacarırdım. Həyatımda ən maraqlı gün ilk dəfə məktəbə getdiyim gün idi, mən həm sevinirdim, həm də çox həyəcanlı idim. Əldə etdiyim nailiyyətlərə görə valideynlərimə və ilk müəllimim Ziyarət Rzayeva olmaqla, bütün müəllimlərimə özümü borclu bilirəm. Təhsilin ən yüksək zirvəsinə yüksəlmək, görkəmli bir elm xadimi olmaq istəyirəm.

Asudə vaxtlarımda velosiped sürürəm və idmanla məşğul oluram. Rəsm çəkirəm, adətən heyvanların və təbiət aləminin rəsmini çəkməyə üstünlük verirəm. Ən böyük arzum universitetə daxil olmaqdır. Vətənimizin keşiyində durmaq, millətimizin qayğısına qalmaq üçün ən yüksək səviyyədə təhsil almağa çalışıram.”