Əliyev Rəsul Təmraz oğlu

Azərbaycan, son illər ərzində təhsil sisteminə xüsusi diqqət ayıran dövlətdir. Paytaxtımız Bakı ilə yanaşı, ayrı-ayrı bölgələrdə də təhsil keyfiyyətinin yaxşılaşdırılması istiqamətində addımlar atılır, təhsil islahatları həyata keçirilir. Bu istiqamətdə cənab prezident İlham Əliyevin imzaladığı Təhsil Strategiyasının da töhfələri göz önündədir. Məhz həyata keçirilən tədbirlərin nəticəsidir ki, son illərdə orta məktəblərdən məzun olan abituriyentlərin böyük qismi yaxşı nəticələr əldə edərək, ali təhsil ocaqlarına qəbul olub, tələbə adı qazanırlar.

Təkcə öz ölkəmizdə təhsil almaqla kifayətlənmək istəməyən məzunlarımız bəzən xarici ölkələrə üz tutaraq, oradakı universitetlərdə təhsilini davam etdirməyə nail olurlar. İndi haqqında danışacağımız gənc dostumuz da belələrindəndir.

Əliyev Rəsul Təmraz oğlu 17 avqust 1999-cu ildə Bakı şəhərində anadan olub. Valideynləri ilə söhbət zamanı onlar Rəsul haqqında həmişə müsbət fikirlər eşitdiklərinə görə ondan razı olduqlarını bildirdilər. Elm-təhsil həyatına ilk dəfə “Tərəqqi” liseyində qədəm qoyan Rəsul, beşinci sinifdən başlayaraq Elitar gimnaziyada təhsilini davam etdirib və XI sinfi də elə həmin gimnaziyada başa vurub. Şagird olduğu illər ərzində müəllimlərinin razılığını qazanan Rəsul, elm sahəsində uğurla addımlayan yeniyetmələrdən olub. Belə ki, dəfələrlə müəyyən fənlər üzrə təşkil edilən bilik yarışlarında iştirak edib. Məsələn, 2015-ci ildə Sərhədsiz Riyaziyyat Beynəlxalq Turnirində bürünc medala layiq görülüb. 2016-cı ilin aprel ayında yenə də Sərhədsiz Riyaziyyat III Beynəlxalq Turnirində birinci yerə layiq görülüb. Bu qalibiyyətinə görə  həm sertifikat əldə edib, həm də medalla təltif olunub.

2016-cı ildə Elitar gimnaziyanın məzunu olduqdan sonra Türkiyəyə təhsil almağa yollanıb. Hazırda Orta Doğu Texniki Universitetində təhsil alır - I kurs tələbəsidir.

Gənc yaşda bir sıra nailiyyətlərə imza atan, hazırda ailəsindən uzaqda - ölkə xaricində ali təhsil alan Rəsula redaksiyamız adından uğurlar arzu edir və ümid edirik ki, gələcəkdə də yeni uğurlarla yaxınlarını sevindirəcək.