Fərzəliyeva Günel Elçin qızı

 

Günel Elçin qızı Fərzəliyeva 1992-ci il sentyabrın 25-də Quba şəhərində anadan olub. Uşaq vaxtı şəkil çəkməyi və konustruktordan müxtəlif fiqurlar hazırlamağı çox xoşlayıb. 1998-ci ilin sentyabrında Quba şəhərindəki 4 saylı orta məktəbinə gedib. 2009-cu ildə orta təhsilini müvəffəqiyyətlə başa vurub, 567 balla Bakı Dövlət Unversitetinin mexanika-riaziyyat fakultəsinə qəbul olub.

2000-ci ildə Quba şəhər Uşaq İncəsənət Məktəbinə daxil olmuş və 2007-ci ildə məktəbin tam kursunu fortepiano ixtisası üzrə bitirmişdir.

Günel: “ - Riaziyyat fənni həmişə mənim üçün ən sevimli və maraqlı fənn olub. Hələ aşağı siniflərdən riaziyyat dərsinə böyük maraq göstərirdim. Riaziyyat mənim üçün roman oxumaq və ya macəra filminə baxmaq qədər maraqlıdır. Bu sahəyə maraq göstərməmin əsas səbəbkarı atamdır. Atamın ixtisas mühəndis olduğu üçün yaxşı riaziyyatçıdır. Atam bu fəndən qiymətlərimlə xüsusi maraqlanır və bu fənni dərindən mənimsəməm üçün əlindən gələni edirdi. Yuxarı siniflərdə riaziyyatçı olmaq qərarına gəldim. Sözün həqiqi mənasında peşəkar riaziyyatçı olmaq üçün səylərimi səfərbər etdim.

Orta məktəbdə həmişə əla qiymətlərlə oxumuşam. Məktəbin nümunəvi şagirdlərindən olmuşam. Bütün tədbirlərdə fəal iştirak etmişəm. Bir sıra tədbirlərdə aparıcılıq etmişəm. Ən sevimli fənlərim riaziyyat, ingilis dili, fizika, kimya, ədəbiyyat idi. Bir neçə dəfə rayon üzrə keçirilən “İlin ən yaxşı şagirdi” müsabiqəsində iştirak etmişəm. 2006-cı ildə bu müsabiqədə III yeri tutduğuma görə təltif edilmişəm. Bundan əlavə 2006 və 2008-ci illərdə yüksək göstəricilərimə görə təltif edilmişəm. Məktəb üzrə keçirilən yarışlarda və olimpiadalarda iştirak etmişəm. Ali məktəb də yüksək göstəricilərlə oxumuşam. Bakı Dövlət Unversitetinin mexanika-riyaziyyat fakultəsinin tələbəsi adını qazanmaq üçün çox çalışmışam və indi bu adı daşımaqdan qürur duyuram. Bu ada layiq olmaq üçün yorulmadan və həvəslə çalışıram. Çox xoşbəxtəm ki, məhz BDU-nun tələbəsiyəm. Çox savadlı, yüksək intelektə malik müəllimlərim var və onlardan dərs almaq mənə zövq verir. Sevimli fənlərim cəbr və həndəsədir.

Həyatımın ən uğurlu günü unversitetə daxil olduğumu öyrəndiyim gündür. Çünki həmin gün mənim hələ kiçik yaşlarımda arzuladığım tələbə adını qazanmaq arzum yerinə yetmişdir.

Valideynlərim və müəllimlərim qəbul imtahanlarında yüksək nəticə göstərdiyim üçün əllərindən gələni edirdilər. Valideynlərim məni bunu bacaracağıma inandırır, ruhlandırır və hər cəhətdən yardım edirdilər. Bu günün özündə də mənim yaxşı insan və bacarıqlı mütəxəsis olmağım üçün əllərindən gələni edirlər. Müəllimlərim isə yorulmadan və böyük səbr göstərərək bizə elmlərin sirlərini öyrədir, bizi təkcə unversitetə yox müstəqil həyata hazırlayırlar.

Ali məktəbə qəbul imtahanının nəticələri çıxan gün biz avtobusla toya gedirdik. Sinif yoldaşım yolda zəng eləyib dedi ki, unversitetə daxil olmusan. Tez bir zamanda bütün avtobus bunu bildi və hər kəs məni təbrik etdi. Mənimsə sevincimin həddi-hüdudu yox idi. O günü heç vaxt unutmayacam.

Xoşbəxtliyi sevdiyim insanların həmişə yanımda olmasında, xoşbəxt ailə həyatında, parlaq karyerada görürəm. Əgər hər zaman dayaq olan, fəxr ediləsi ailən, sevərək məşğul olduğun sənət və vəfalı dostların varsa deməli xoşbəxt insansan.

Asudə vaxtlarıma əsas məşğuliyyətim kitab oxumaqdır. Kitab oxumağı çox sevirəm. Xüsusilə də xarici bədii ədəbiyyatı. Dünya ölkələri haqqında kitabları oxumağı xoşlayıram. Dünya xalqlarını tanımaq, onların adətlərini öyrənmək mənim üçün çox maraqlıdr. Şəxsi kitabxanamı yaratmaq arzusundayam.

Həyatda Balzakın çox bəyəndiyim bir fikrini meyar tuturam: “Biliyin ağası olmaq üçün zəhmətin köləsi olmalısan”.