SAKİT, MƏDƏNİ, DƏQİQ (Əhmədova Tənzilə Rövşən qızı)

Ata nənəsi öz adını Tənziləyə qoyub. Körpəlikdə çox sakit uşaq olub. Ata və anasından ayrı qalmağı xoşlamazdı.

Anası Nuriyyə xanımın dediklərindən: “ - BDU-nun biologiya fakültəsinin V kursunda oxuyanda Tənzilə anadan olub. Mən V kursda diplom işi ilə əlaqədar herbari hazırlamaq üçün otlardan və çiçəklərdən ibarət material toplayırdım. Tənziləni də lap körpə yaşlarından hara aparırdımsa əsas məşguliyyəti ancaq otları və çiçəkləri toplamaq olurdu. Yüksək qavrama qabiliyyətinə malikdir. Mən ona hələ 3 yaşında ikən M. Ə. Sabirin “Dinmə uşaqdır, uşağım”, “Yat-yat bala lay-lay” kimi satirik şeirlərini axıra qədər çox asanlıqla öyrətmişdim. Məktəbə gedənə qədər həm latın, həm də kiril qrafikası ilə yazıb-oxuyurdu. Lap uşaq yaşlarında şəkillər çəkirdi. Meşədən yığdığı quru mamırlar, ağac göbələkləri və otlardan xüsusi mənzərə tabloları düzəldirdi. Parça üzərində şəkillər çəkir və tikmə tikirdi”.

Orta məktəbə getdiyi gündən sinif yoldaşlarından yüksək qavrama qabiliyyəti və savadı ilə fərqlənib. Həmişə dərslərindən “əla” qiymət alıb. Yalan danışmağı xoşlamır. “4” alanda evə girməmiş valideynləri onun neçə qiymət aldığını bilirdilər. Bir dəfə sinifdə oxuyanda riyaziyyat dərsindən “4” aldı. Dərsdən gəlib qapının ağzında durub qorxudan ağlayırdı. Elə bil cinayət törətmişdi. Sakitləşdirib evə gətiriblər.

Yay tətillərində uşaqlarla həyətdə oynamağa can atırdı. Günün əksər vaxtlarını imla, ifadə və inşa yazmaqla, kitab oxuyub, çəkillər çəkməklə keçirirdi. İngilis dilinə çox həvəsi var idi. Bu həvəsi onda ingilis diıli müəllimi oyatmışdı. Yüksək musiqi duyumuna malikdir. Hələ musiqi məktəbinə getməmiş eşitdiyi mahnıları pianoda çalmağı bacarırdı.

Tənzilə Rövşən qızı Əhmədova 29 iyun 1990-cı ildə Bakıda anadan olub. 244 saylı orta məktəbdə təhsil alıb. Orta məktəblə yanaşı, “Zirvə” hazırlıq kursunda ali məktəbə hazırlaşıb. 2008-ci ildə orta təhsili başa vuran Tənzilə 596 balla Bakı Dövlət Universitetinin Azərbaycan dili və ədəbiyyatı ixtisasına qəbul olunub.

11 saylı Uşaq Musiqi Məktəbini fortepiano ixtisası üzrə bitirib. Hazırda BDU-nun filologiya fakültəsinin tələbəsidir.

Orta məktəbdə dərslərini əla oxuyub. Ən sevimli fənləri tarix, Azərbaycan dili, ədəbiyyat, ingilis dili, riyaziyyatdır. Məktəbdə keçirilən kütləvi tədbirlərdə, olimpiadalarda fəal iştirak etmiş, bu tədbirlərdə aparıcı olmuş və ya şeirlər söyləmişdir. Həyatında ən uğurlu günü ali məktəbə qəbul olduğu gündür.

Gələcəkdə savadlı bir dil mütəxəssisi - dilçi, ədəbiyyatçı olmaq istərdi. İngilis, fars, ərəb, ispan, italyan dillərini öyrənməyə böyük marağı var. İkinci ali təhsil kimi isə hüquq fakültəsində oxumaq istərdi. Bu ixtisasa böyük marağı var.

Musiqiyə qulaq asmaq, rəsm çəkmək, pianoda ifa etmək onun boş vaxtlarındakı məşğuliyyətidir. Bədii əsərlər oxumaq da asudə vaxtlarının əsas hissəsini təşkil edir.

Xoşbəxtliyi həyatda arzularına çatmaqda, sevdiyi insanların əhatəsində olmaqda görür. İstədiyi sahə ilə bağlı cəmiyyətdə yüksək zirvəyə qalxmaqla xoşbəxt olacağını düşünür. Sınaq imtahanlarında topladığı yüksək ballar, arzuladığı universtetə daxil olmaq onun ilk uğurlarıdır. Gələcək planları universteti bitirib, ondan sonra sənəti ilə pillə-pillə zirvəyə qalxmaqdır.

Gələcəkdə yaxşı insan, istedadlı şəxsiyyət olmaq üçün savadı, biliyi, istedadı ilə zirvələrə qalxmaq fikrindədir.

İngilis dili müəllimi Hüseyn Hüseynov: “ - Tənziləyə dərs dediyim ilk günü indi də çox gözəl xatırlayıram. Hələ ilk gündən onun birinci partada oturması və “uzunmüddətdir ona dərs deyirmişəm” kimi davranması diqqətimi çox çəkdi. Günlər keçdikcə onun haqqında yanılmadığım özünü təsdiqlədi.

Tənzilədə yüksək dinləmə və qavrama bacarığının olması keçdiyi fənləri dərindən öyrənməsində böyük rol oynayırdı. Dərs dediyim müddət ərzində onun bircə gün belə dərsimə hazırlıqsız gəldiyinin şahidi olmadım. Bu keyfiyyətlər onun gələcəkdəki uğurlarından xəbər verir. Və mən də buna səmimi qəlbdən inanıran”.

Azərbaycan dili və ədəbiyyatı müəllimi Məlahət xanım: “ - Tənzilə ilk gündən nəinki mənim, elə bütün müəllimlərin diqqətini cəlb etmişdi. Ədəbiyyata olan marağı, suallara ən çox onun cavab verməsi digərlərindən fərqli bir şagird olduğunu göstərirdi. Hər keçən gün onun savadına, biliyinə, tərbiyəsinə daha çox qiymət verirdim. Ona dərs dediyim illərdə bir dəfə də olsun dərsə hazırlıqsız gəldiyini görməmişəm. X-XI siniflərdə sınaqlarda da gözlənilən nəticəni verməsi məni çox sevindirdi. Hər zaman fərqliliyi qoruyub saxlayan sevimli şagirdimə gələcək işlərində uğurlar arzulayıram. Tənzilə mənim müəllimlik fəaliyyətimdə xatirimdə ən savadlı, tərbiyəli bir şagird kimi qalacaq”.

Riyaziyyat müəllimi Əliyeva Nüşabə: “ - Tənziləyə V sinifdən dərs keçirəm. Bu müddət ərzində onun sakit, mədəni, dəqiq bir şagird olduğunu görmüşəm. Dərs vaxtı fikri həmişə dərsdə olub, dərsə çox məsuliyyətli yanaşırdı. Bütün bu keyfiyyətlər birlikdə onun nümunəvi şagird kimi sevilməsinə səbəb olub”.

Ədəbiyyat müəllimi Əli Əsədov: “ - Mən inanıram ki, Tənzilə bilik və bacarıqları üzərində gələcəkdə də ciddi işlərsə, müntəzəm olaraq yeni elmi informasiyalar əldə etsə, daha yüksək nailiyyətlər qazanacaq.

Tənziləni başqa həmyaşıdlarından fərqləndirən əsas cəhət onun təmkinlliyi, mövzular üzərində dəqiq və konkret işləməs i- bir sözlə, əzmkarlığıdır”.