Mikayılov Ziya Fikrət оğlu

Ziya işıq, nur deməkdi. Həyatı işıqlı, nurlu olsun deyə Fikrət bəy övladına bu adı seçib.

Ziya körpəlikdə çox dəcəl, həm də çox həssas və səliqəli uşaq idi. Maşınlarla çox maraqlanırdı. Ən çox xoşladığı məşğuliyyətlər futbol oynamaq, televizorda futbol, idman xəbərlərini izləmək, filmlərə baxmaq olub. Rəsm çəkməyi də çox xoşlayırdı. Nənəsinin nağıllarına həvəslə qulaq asırdı. Məktəbə gedənə qədər yazıb-oxumağı bilirdi. Yüksək qavrama qabiliyyəti ilə fərqlənirdi.

Ziya Fikrət oğlu Mikayılov 14 oktyabr 1989-cu ildə Şuşa rayonunda anadan olub. 1996-cı ildə Xətai rayonundakı S. Həsənov adına 63 saylı orta məktəbin I sinfinə qəbul edilib. 2007-ci ildə oranı yüksək qiymətlərlə bitirərək 642,5 balla Azərbaycan Dövlət İqtisad Universitetinə daxil olub. 2011-ci ildə ali təhsilin bakalavr pilləsini maliyyə və kredit ixtisası üzrə fərqlənmə diplomu ilə bitirib. Elə həmin ildə magistr imtahanlarında yüksək (89 və 122) bal toplayaraq ADİU-nun və Böyük Britaniyanın Essex Universitetin mühasibat uçotu və maliyyə ixtisası üzrə magistr pilləsinə qəbul olub. Hazırda təhsilini “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində İngiltərədə davam etdirir.

İxtisasımı özüm seçmişəm. Müasir dövrdə bazar iqtisadiyyatı şəraitində daha praktik və çevik ixtisas kimi mən maliyyə və kredit ixtisasını seçdim və bu sahədə ölkəmizdə lider olan ADİU-a qəbul olundum.

Ziya: “ - Orta məktəbi əla qiymətlərlə oxumuşam. Hətta ibtidai sinifdə sinif rəhbərimiz mənim hüsnxətt dəftərimi nümunə kimi fəxrlə digər müəllimlərə göstərirdi. Bütün dərslərə maksimum dərəcədə ciddi hazırlaşırdım, əla qiymətlər alırdım. Amma riyaziyyatın yeri tam başqa idi. Babam da riyaziyyatçı olub. Onun uşaqlıqda öyrətdiyi əyləncəli riyaziyyat məsələləri məndə məntiqi-riyazi təfəkkürün oyanmasında mühüm rol oynayıb.  Məktəb illərində də özümü məhz riyaziyyatda tapırdım. Bunda orta məktəbdə mənə cəbr-həndəsə dərsi demiş Cavanşir Quliyevin rolu böyük olub. Coğrafiya, fizika və biologiya da ən sevdiyim fənlərdən idilər. Demək olar ki, hər tədris ilinin sonunda fəxri fərmanlarla təltif olunurdum.  Məktəb üzrə stolüstü tennis yarışlarında da qalib gəlmişdim. Həmçinin Şuşa Uşaq Musiqi Məktəbinin tar sinfini bitirmişəm.

Zəhmətimin bəhrəsi olaraq qəbul olduğum ali məktəbdə də dərslərimə ciddi yanaşırdım, ixtisas fənlərinə daha çox maraq göstərirdim. Tələbəlik illərində təşkil olunan müxtəlif elmi konfranslarda, treninqlərdə, təbirlərdə iştirak edirdim.

Bizə maliyyə fənnini tədris edən prof. Saleh Məmmədov mənim bu sahəni sevməyimdə böyük rol oynayıb. O, tək nəzəri bilikləri ilə deyil, həm də praktik fəaliyyəti ilə özünü sübut etmiş bir mütəxəssisdir.

Ən başda valideynlərimə minnətdaram. Onlar mənim uğur qazanmağım üçün lazımi mühiti yaratmışdılar. Sözsüz ki, nəticəmdə müəllimlərimin də rolu danılmazdır, xüsusilə də Rafil İmanovun. O, tək riyaziyyat müəllimi kimi deyil, həm də bir məşqçi kimi bizi imtahanlara hazırlayırdı. Mən də daxil olmaqla minlərlə gənc uğurlarına görə ən başda Rafil müəllimə minnətdar olmalıdır. Həmçinin Təranə xanım, Nəzakət xanım, Püstə xanım, Səhabət xanım və başqa müəllimlərin də əməyini xüsusi qeyd etmək lazımdır.

Orta məktəbdəki saf, mehriban abu-hava şəraitində qəbul imtahanlarına bir komanda kimi hazırlaşdıq.

İxtasasımın praktik olmağı ömrü boyu karyera yüksəlişinə şərait yaradır. İş barədə sözsüz hədəflər bəllidir, amma səylə çalışmağı da dayandırmaq olmaz.

Asudə vaxtlarımda dostlarımla görüşür, domino, nərd, tennis, voleybol, futbol oynayırıq. Hərdən internetdə də vaxt keçirirəm, maraqlı filmlər izləyirəm”.