Günay Vasif qızı Abbaszadə 2002-ci il aprelin 1-də Bakı şəhərində dünyaya göz açıb. Günay körpəlikdən sakit uşaq olub. Bütün qız uşaqları kimi xoşladığı məşğuliyyəti gəlinciklərlə oynamaq idi. Eyni zamanda rəsm çəkməyi də çox sevirdi. Məktəbə gedənə qədər hərfləri tanıyırdı. Yazı yazmağı nənəsinin sayəsində öyrənmişdi. 2008-ci ildə Abşeron rayonundakı Saray qəsəbəsi Hüseyn Axundov adına 3 saylı tam orta məktəbin I sinfinə daxil olub. Hazırda həmin məktəbdə oxuyur. Əlaçıdır. Ən çox sevdiyi fənləri ana dili, riyaziyyat, ingilis dilidir. Novruz bayramında, Yeni il şənliyində, “Əlifba” bayramında fəal iştirak edib. Həyatında ən maraqlı, uğurlu gün məktəbə getdiyi gündür. Müəllimləri də Günay barədə ağızdolusu müsbət fikirlər söylədilər. Onun həm təlimdə, həm də tərbiyədə seçilən şagirdlərdən olduğunu xüsusi vurğuladılar. Məhz bu keyfiyyətlərinə görə Günay məktəbdə həm müəllimlərinin, həm də sinif yoldaşlarının rəğbətini qazana bilib. Günay məsuliyyətli şagird, etibarlı dost, hər çətinlikdə yoldaşlarının köməyinə çatmağa çalışan humanist bir qızdır. Günay eyni zamanda Sumqayt şəhər Uşaq və yeniyetmələrin yaradıcılıq mərkəzində rəsm dərnəyinin üzvüdür. Təhsildə və məktəbin ictimai həyatında uğur qazanmasında ilk müəlliminə borcludur. Gələcəkdə dizayner olmaq istəyir. Rəsm çəkməyi xoşlayır.