Əkbərli Nuray Siyavuş qızı

Əkbərli Nuray Siyavuş qızı 2004-cü il noyabrın 24-də Bakı şəhərində dünyaya göz açmışdır. O, körpəlikdə çox sakit, sözəbaxan uşaq olub. Valideynlərinin daim sevimli övladı olmağa çalışır. Nuray digər yaşıdlarından fərqlənərək 6 yaşı tamam olmamış Təhsil Nazirliyinin xüsusi komissiyasından keçərək məktəb həyatına ilk addımlarını atıb. Onun ilk təhsil aldığı 20 saylı məktəb-lisey olub. Hazırda da həmin məktəb-liseydə distant təhsil alır. Nuray bütün fənləri çox sevir. Yalnız ən çox xoşladığı fənlər ana dili, ədəbiyyat, həyat bilgisi və coğrafiya fənnidir. Hər il məktəbi əla qiymətlərlə başa vurur. Nurayın yaşı az olduğuna baxmayaraq xüsusi istedada malikdir. O, T. İsmayılov adına Uşaq- gənclər yaradıcılıq sarayında rəsmlə məşğul olur. Onun çox gözəl əl qabiliyyəti vardır. Bu istedad onda uşaq yaşlarından özünü göstərmişdir. Nuray çox gözəl şəkillər çəkir. 29 mart 2015-ci il tarixində Nurayın “Bir diləyim var” adlı fərdi sərgisi keçirilmişdir. O, çəkdiyi şəkillərdə ən çox təbiət mənzərəsinə üstünlük verir. Nurayın rəsm çəkmək qabiliyyətindən başqa xüsusi bir istedadı da var. O, ”Cücələrim” rəqs ansamblında çıxış edir. Nurayın çox gözəl rəqs etmək qabiliyyəti var. Nuray Kukla Teatrının nəzdində fəaliyyət göstərən “Oyuq” uşaq teatrının da üzvüdur. Nuray bu istedadları olduğuna görə dəfələrlə bir çox şənliklərdə, tədbirlərdə iştirak edib. O, hər il “Hesabat” adlı sərgidə iştirak edir. Vergilər Nazirliyinin təşkil etdiyi “Vergilər uşaqların gözü” ilə rəsm müsabiqəsində dəfələrlə iştirak edib. 20 Yanvar və Xocalı soyqırımına həsr olunan rəsm sərgisində öz əl işlərini nümayiş etdirib. Onun nailiyyətləri günü-gündən artır. İki dəfə rəsm müsabiqəsində I yer əldə edib. Saray 2 saylı uşaq evində isə talassemiyalı uşaqlara dəstək məqsədilə keçirilən tədbirdə rəqslərlə çıxış edib. O, bu tədbirlərin hər birindən diplomla, sertfikatla qayıtmışdır. Nuraya Xocalı soyqırımının 20-ci il dönümünə həsr edilmiş sərgidə iştirakına görə “LN” incəsənt mərkəzi tərəfindən diplomla təltif edilmişdir. İkinci diplom isə Daşkənd şəhərində keçirilmiş “Özbəkistan Azərbaycan uşaqlarının gözü ilə” adlı sərgidə iştirakına görə almışdır. Nuray Xətai sənət mərkəzində keçirilən “Yaddaşlarda yaşayan Xocalı” sərgi-aksiyada iştirakına görə sertfikatla təltif olunmuşdur. 2014-cü ildə isə Azərbaycan qan donorluğunun inkişafına dair rəsm müsabiqəsində I yerə layiq görüldüyünə görə sertfikat qazanmışdır. Nurayı sevindirən 29 mart 2015-ci il tarixində keçirilən “Bir diləyim var” adlı rəsm sərgisinə görə “İlin balaca rəssamı” adı ilə təltif olunduğu diplomu almasıdır. Nurayın ən uğurlu günü isə fərdi sərgisi keçirilən gündür. Az yaşı olmasına baxmayaraq həyatında bir çox yaddaqalan hadisələr baş vermişdir. Ən maraqlı hadisə isə 7 yaşı olarkən Kapital bankın Kempinskidə keçirilən talassemiyalı uşaqlara dəstək məqsədilə keçirilən rəsm müsabiqəsində I yerə çıxması olub. Nuraya noutbook hədiyyə edilib.

 O, həyatında əldə etdiyi uğurlara görə özünü valideynlərinə və müəllimlərinə borclu hesab edir. “Oyuq” uşaq teatrının rəhbəri Səidə müəllimə oxşamaq istəyir. Nurayın hədəflədiyi zirvə isə dərsləri ilə yaxşı məşğul olub, bütün işlərində uğurla irəliləməkdir. O, gələcəkdə psixoloq və rəssam olmaq fikrindədir. Onun ən böyük arzusu anasının psixoloq peşəsini davam etdirməkdir.

 Asudə vaxtlarında Azərbaycan bədii filmlərinə baxır, anasına ev işlərində kömək edir.

 Nuray 1 İyun Uşaqların Beynəlxalq Müdafiəsi Günü münasibətilə keçirilən İctimai televiziya, Lider telekanalı, Azərbaycan telekanalında canlı yayımda rəqs etmişdir.

 Nurayın fikrincə, hər bir işə istəklə və məsuliyyətlə yanaşmaq lazımdır.