Həbibli Fatimə Faiq qızı 14 sentyabr 2007-ci ildə Bakıda Xəzər rayonu Buzovna qəsəbəsində dünyaya göz açıb. Fatimə uşaq vaxtdan aktiv, dəcəl və yaşından böyük təsir bağışlayan uşaq olub. Şəkil çəkməyi və sınan oyuncaqlardan yeni oyuncaqlar düzəltməyi sevirdi. Balaca yaşlarından bağça və hazırlıqlara getməsi bu gün əldə etdiyi uğurlarında ona çox kömək olub. Üç yaşından şəkil çəkir bu sahəyə marağı atasından yaranmışdır.

Hazırda 125 saylı məktəbin III sinif şagirdidir. İncəsənət məktəbinin isə rəssamlıq üzrə II sinif şagirdidir. Dərslərini yaxşı oxuyur, rəsm, texnologiya və informatika ilə daha çox maraqlanır. Rəsmə olan marağı balaca Fatimədə gələcəyin tanınmış rəssamı olmaq istəyini də yaradır. “Narkomaniyaya son”, “Xocalı faciəsi”, “Nizami Gəncəvi haqqında”, “Uşaq hüquqları” və s. bu kimi rəsm sərgilərində iştirak edib. Fatimənin ən sevincli günü isə yaşının az olmasına baxmayaraq rəssamlığa qəbul olması idi. O günü Fatimə həyatının arzularının reallaşmasına doğru dəyişdiyi gün hesab edir. Atasına və məşhur rəssam Mircavad Cavadova oxşamaq istəyir. Ən böyük arzusu tanınmış rəssam olmaqdır. Uşaq vaxtlarından yaranan həvəs illər sonra arzusuna çevrili. İndi isə tanınmış rəssam olub öz vətənini dünyada təmsil etmək ən böyük məqsədidir.

Bədii ədəbiyyatla məşğul olmasa da, dahi ədəbiyyatçılarımızı öz sehrli fırçasının köməyilə canlandırmaq istədiyini bildirir. Balaca rəssamın digər arzusu isə dünyanı gəzərək gördüyü gözəllikləri yaddaşlara əbədi həkk etməkdir. Tanınmaq üçün rənglərin dili ilə insanların gözləri arasındakı sintezi düzgün tənzimləmək lazım olduğunu düşünür. Yaşının az olması səbəbi ilə hələki heç bir tədbirdə iştirak etməyib. Ancaq gələcəkdə onu böyük naliyyətlər gözlədiyinə inanır.

Biz də balaca rəssama uğurlar arzulayırıq.