DÜNYA ŞÖHRƏTİ QAZANMAQ İSTƏYİR (Rəhilə Əlizamin qızı Məmmədova)

Rəhilə Əlizamin qızı Məmmədova 1996-cı il yanvarın 12-də Bakı şəhərində dünyaya göz açıb. Anası Nəzakət xanım söyləyir ki, Rəhilə körpəlikdə çox sakit, şirin, toppuş uşaq olub. 3-4 yaşından şəkillər şəkər, çəkdiyi şəkilləri atasına göstərər, bu məşğuliyyətdən böyük zövq alardı.

Rəhilə məktəbə gedənə kimi yazıb-oxumağı 16 saylı uşaq bağçasındakı tərbiyəçidən və anasından öyrənib.

Hazırda Nəsimi rayonundakı 14 saylı orta məktəbin şagirdi olan Rəhilənin sevimli fənləri rəsm və coğrafiyadır. O, məktəbdə keçirilən bütün tədbirlərdə müntəzəm iştirak edir, şeirlər söyləyir və rəqs nömrələri ilə çıxış edir. Novruz bayramında “Bahar qız” olub.

Asudə vaxtlarını səmərəli keçirən Rəhilə təmiz havada gəzməyi, əsasən təbiət qoynunda dincəlməyi, televizorda intellektual verilişləri izləməyi, bilgisayarda müxtəlif oyunlar oynamağı xoşlayır.

Hər bir insanın həyatında əlamətdar və yaddaqalan günlər olur. Rəsmlərinin “Savalan” qəzetində çap olunduğu günü Rəhilə ən yaddaqalan və əlamətdar hadisə kimi dəyərləndirir.

Rəhilənin ən böyük arzusu gələcəkdə anasının yolunu davam etdirmək, onun kimi həkim olmaqdır. Təbii ki, sevimli məşğuliyyətini, rəsm çəkməyi kənara qoymamaq şərtilə.

İbtidai sinif müəllimi Esmira Sabirqızı istedadlı və tərbiyəli övlad böyütdükləri üçün Rəhilənin valideynlərinə minnətdar olduğunu gizlətmir və gələcək həyat yollarında ona uğurlar, müvəffəqiyyətlər diləyir.

Rəhilə xoşbəxtliyi valideynlərinin əhatəsində olmaqda, sağlam həyat sürməkdə və rəsm sahəsində daha böyük nailiyyətlər əldə etməkdə, dünya şöhrəti qazanmaqda görür.

Tarixin yaddaşında Azərbaycanın ən tanınmış, istedadlı gənclərindən biri kimi qalmağı arzulayan Rəhilə vətəninin adını başqa ölkələrdə, bütün dünyada yüksəldib vətəninə layiqli övlad olmağı arzulayır.