Uğurlu gələcəyin astanasında (Haqverdiyeva Səbinə Kamil qızı)

Səbinə körpəlikdə çevik, hazırcavab, diqqətli olub. Maraqlı oyuncaqları olub. Cizgi filimlərinə və idman verlişlərinə baxmağı xoşlayıb. Evdə dovşan saxlamağı sevərdi. Məktəbə gedənə qədər yazıb-oxumağı bilirdi. Şeirə qulaq asmağı xoşlayırdı. Hər gecə nənəsinə nağıl danışdırardı. Atası cəbhə bölgəsinə gedən zamanlarda şəklini götürüb xəlvətcə çarpayının altında ağlayardı.

Səbinə Kamil qızı Haqverdiyeva 1989-cu il sentyabrın 28-də anadan olmuşdur. 1990-cı ildən Ağcəbədi şəhərində yaşayır. 1995-ci ildə Ağcəbədi şəhəri M. F. Axundov adına 3 saylı orta məktəbin I sinfinə daxil olmuşdur. 2006-cı ildə həmin orta məktəbi fərqlənmə attestatı ilə bitirmişdir. Həmin ildə Azərbaycan Tibb Universitetinin stomotologiya fakültəsinə daxil olmuşdur. Həkimlik peşəsinə maraq onda 2000-ci ildə yaranıb. Səbəb atasının həkim olması və sənətinə vurğun olması olub.

Orta məktəbdə dərslərini əla oxumuşdur. Məktəbin bütün tədbirləində iştirak etmiş, sevimli fənləri kimya, fizika və biologiya olmuşdur. 22 mart 2006-cı ildə fizika fənni üzrə respublika olimpiadasının qaliblərindən olub. Mərhum prezident Heydər Əliyevin anadan olmasının 83-cü ildönümü münasibətilə rayonda keçirilmiş rəsm müsabiqəsində I yeri tutduğuna görə fəxri fərmanla təltif edilmişdir.

Ali məktəbdə dərslərini əla oxuyur. Bütün fənlərə marağı eyni dərəcədədir. Həyatda ən uğurlu gün ali məktəbə daxil olduğu gündür. Həkimlik sənətini sevməkdə atasına borcludur.

Qəbul imtahanlarında göstərdiyi nəticələrə görə Ağcəbədi şəhər M. F. Axundov adına 3 saylı orta məktəbin direktoru Tofiq Zeynalova, kimya müəllimi Əsgər Məmmədova, fizika müəllimi Fazil Alıyevə, ədəbiyyat müəllimi Mirvari xanıma, Qərənfil Rüstəmovaya minnətdardır.

Ali məktəbi bitirdikdən sonra müəllimlik etmək istərdi. O, xoşbəxtliyi əməlin düz olmasında və mənəvi təmizlikdə görür. Asudə vaxtlarında rəsm çəkməyi xoşlayır.

Ağcəbədi şəhər 3 saylı məktəbin direktoru Tofiq Zeynalov: “ - Səbinəni ilk gördüyüm gündən öyrənməyə, bilik əldə etməyə böyük maraq göstərən bir şagird kimi tanıdım. O, böyüdükcə ilk təəssüratımı doğrultdu. Onu həyatda ən çox maraqlandıran bilik əldə etmək həvəsi olmuşdur. Oxuduğu müddət ərzində həm hərəkət və davranışları ilə, həm də həssalığı ilə başqalarından seçilmişdir. Bir dəfə də olsun məktəbə hazırlıqsız gəldiyi müşahidə olunmamışdır. Atası kimi həkim olmaq məqsədini reallaşdırmaq üçün çox çalışırdı. Kimya, fizika, biologiya fənlərinə daha da maraq göstərirdi. Dəfələrlə rayon və respublika müsabiqələrində, olimpiadalarda fərqlənmişdir. Biz onu gələcəyin elm adamı kimi görürük. Hazırda Tibb Universtetində əlaçı tələbə kimi seçilir.

Səbinənin həmyaşıdlarından fərqli cəhətləri çox idi. Sadə, təvazökar, olduqca mehriban bir qızdır. Səbinə həm də diqqətli, qayğıkeş, həssas bir qızdır. O, məktəbimizin fəxridir. Onun kimi şagirdlərimiz bizi mənən ruhlandırır, işimizə həvəs və məhəbbəti gücləndirir. Biz Səbinənin uğurlu gələcəyinə inanırıq”.