Rzayeva Nərmin Ərəstun qızı

Nərmin Ərəstun qızı Rzayeva 2001-ci il iyunun 29-da Bakı şəhərində dünyaya gəlib. Nərminin adını ondan 10 il böyük olan qardaşı Adil qoyub.

Anası Sədaqət xanım Nərminin uşaqlığını belə xatırlayır: “ - Körpəlikdə sakit, həssas, sevimli, eləcə də çox şirin olan Nərmin daim şəkilli kitablara baxmağı xoşlayırdı. Hələ məktəbə getməmişdən ona şeirlər, yazıb-oxumağı, hesablamaq öyrədirdim. Uşaqlıqdan həkim olmaq arzusuna düşüb. Bu elə mənim də ürəyimcə oldu. Çünki mən də uşaqlıqda bu sənətə yiyələnmək istəyirdim. Lakin valideynlərim buna imkan vermədi. Ona görə də qızımın bu seçiminə çox sevindim.

Nərmin ilk təhsilini Xırdalan şəhər 1 saylı orta məktəbdə almağa başladı. Dərslərini yaxşı oxuyur. Əla qiymətlər alır. Sevimli fənləri riyaziyyat, ingilis və rus dilləridir. Təbiətlə də çox maraqlanır. Bitkilər, heyvanlar və insan orqanları haqqında biliklərə yiyələnmək üçün dərslikdən əlavə kitablar oxuyur. Məhz buna görə də sevimli fənləri arasında “Həyat bilgisi” də çox böyük rol oynayır. Kitabda verilən mövzular böyük olmadıqda kitabxanaya müraciət edir, daha çox biliklər əldə etməyə çalışır. Təhsildən əlavə ingilis və rus dillərini mükəmməl bilmək üçün kurslara gedib, sırf bu dillərlə geniş məşğul olur. Fəal iştirak etdiyi “Əlifba bayramı” və IV sinfi bitirən zaman buraxılış tədbiri olub. İntonasiya ilə şeir söyləmək qabiliyyəti ilə hamının rəğbətini qazandığından tədbirin çox hissəsində ona şeir demək imkanı verilmişdi. Bir çox səhnələrdə də rolu olmuşdur. Hətta rəqslərdə də özünü sınamışdır”.

Nərmin dərslərini yaxşı öyrənməkdə, dərin biliklərə yiyələnməkdə özünü müəllimlərinə və valideynlərinə borclu sayır. Xüsusən də ibtidai sinif müəllimi olan Aygün Aslanovaya minnətdardır. O, həmişə “Xeyir körpüsü” verilişini diqqətlə izləyir və həkim olmaq həvəsi daha da artır. Nərmində xəstə və çarəsizlərə yardımçı olmaq istəyi yaranıb.

Asudə vaxtlarını dostları ilə, mütaliə və rəsm çəkməklə keçirən Nərmin xoşbəxtliyini sağlamlıqda, arzularına çatmaqda, ailə üzvlərinin yanında olmaqda, valideynlərinin başını uca etməkdə görür. Ən çox bəyəndiyi rəsm işlərinin içində “Winx club” cizgi filmində “Bloom” adlı qızın şəkli, “Novruz bayramı”, “Cırtdan”, “Xocali” faciəsinə aid şəkillərdir. İlk uğuru ingilis dili imtahanından yüksək bal toplaması olub. Bu uğuru ilə valideynlərinə bəxş etdiyi sevinc Nərmində böyük ruh yüksəkliyi yaratmışdır. Dərslərini yaxşı oxumaq, məktəbi əla qiymətlərlə bitirmək, Tibb Universtetinə daxil olmaq, vətəninə lazımlı vətəndaş olmaq və peşəkar həkim kimi tarixin yaddaşında yaşamaq istəyir.