Eybullayeva Əfsanə Elçin qızı

Onun adını əmisi Eldəniz bəy qoyub. Əfsanənin dünyaya gəlişi ən çox nənə və babasını sevindirmişdi. Bu ailədə qız övladı olmadığı üçün onun dünyaya gəlişi özü ilə bərabər sonsuz istəklər və arzular da gətirdi. Əfsanələr əsrlər boyu yaşayır. Onun dünyaya gəlişi ilə uzun illər əfsanə görürən arzular reallaşdı.

Nağılları daha çox sevərdi. Uşaqlarla oynamağı elə də xoşlamırdı. Kiminsə onunla məşğul olmasına daha çox maraq göstərirdi. Bunu isə ailədə heç kəs ondan əsirgəmirdi. Axı o, ilk nəvə, həm də qız nəvə idi. Çoxlu şeirlər bilirdi. Təhsilə daha çox marağı var idi. Əfsanə iki yaşındaykən əmisi Elşən bəy ona dünya xəritəsini öyrətmişdi. İnanmayanlar evə gələndə dərhal xəritə üzərində onu yoxlayırdılar. Ölkələri və adlarını dəqiqliklə bildirirdi. Ancaq Avstraliya sözünü çətinliklə deyirdi. Nəzərə alsaq ki, Əfanənin anası Çiçək xanım həm də onun sinif müəllimi olub. Bu halda onun məktəbə qədər nə dərəcədə yazıb-oxumağı bacardığını təsəvvür etmək çətin olmaz.

Əfsanə Elçin qızı Eybullayeva 1988-ci il noyabrın 23-də Nefçala rayonunun Qədimkənd kəndində müəllim ailəsində anadan olmuşdur. 1995-ci il sentyabrın 1-də Qədimkənd məktəbinin I sinfinə qədəm qoyub. 2006-cı ildə həmin məktəbin XI sinfini bitirib. ADPU-nun tarix fakültəsinə qəbul olub. Orta məktəbdə oxuyarkən təhsildən əlavə məktəbin ictimai işlərində, tədbirlərdə yaxından iştirak edib. Həmçinin məktəblərarası bilik yarışmaları və fənn olimpiadalarında seçilib. Hələ orta məktəbdə oxuyarkən onda ixtisasına qarşı maraq oyanıb. Bunun əsas səbəbi atası, həm də sinif rəhbərinin məhz bu ixtisasın sahibi olmasıdır. Atası onda tarix fənninə qarşı maraq oyadıb. Atasının yolunu davam etdiməyi qarşısına məqsəd qoyub və onu özünə ideal seçib. Orta məktəbdə dərslərini çox yaxşı oxuyub və ən sevimli fənnləri tarix, Azərbaycan dili və ədəbiyyatı olub. Orta məktəbdə oxuyarkən elmi yarışlarda da fəal iştirak edib. IX sinifdə oxuyarkən Azərbaycan dili və ədəbiyyatı fənnindən olimpiadada qalib gələrək II diplomla təltif olunmuşdur. Həmin il “Mən rayonumun tarixi, coğrafiyası və təbiəti haqqında nələri bilirəm” mövzusunda inşa-yazı müsabiqəsinin I dərəcəli diplomuyla təltif edildi. IX sinifdə 22 aprel-Ümumdünya Yer gününə həsr edilmiş məktəblilərin “Bizim Xəzər” ekoloji müsabiqəsində  bədii-publisistik işlər üzrə fəal iştirak etdiyinə görə sertifikatla təltif olunub. X sinifdə Azərbaycan dili və ədəbiyyatı fənni üzrə rayon olimpiadasında II dərəcəli diplomla təltif olunmuşdur. XI sinifdə də “Mən rayonumun tarixi, coğrafiyası və təbiəti haqqında nələri bilirəm” mövzusunda inşa-yazı müsabiqəsinin qalibi olmuşdur.

Ali məktəbdə də dərslərini yaxşı oxuyub və ən sevimli fənni Azərbaycan tarixi fənni idi. Həyatında ən maraqlı və ən uğurlu gün ali məktəbə qəbul olunmağı barədə eşitdiyi gündür. Çünki bu onun ən böyük arzusu idi. İxtisasına yiyələnməkdə özünü müəllimlərinə borclu bilir. Amma hesab edir ki, bu sənəti seçməyində atasının daha böyük rolu olub. Atası onun idealıdır.

Onu ali məktəbə hazırlayan müəllimlərinə minnətdardır, çünki onların səyi nəticəsində bu səviyyəyə çatmışdır.

Xoşbəxtliyi bundan sonra əldə edəcəyi uğur və nailiyyətlərdə görür.

Asudə vaxtlarında daha çox musiqi dinləməyi və bədii kitablar oxumağı xoşlayır.

Riyaziyyat və informatika müəllimi Nəzakət Cəfərova: “ - Əfsanə haqqında fikirlərimi bir az qeyri-rəsmi şəkildə bildirmək istəyirəm. Çünki qəlbimdə Əfsanə haqqında olanları bölüşmək imkanını əldən vermək istəmirəm.

Əfsanəyə V sinifdən riyaziyyat fənnini, X-XI siniflərdə həm də informatikanı tədris etmişəm. İlk tanıdığımda  gördüyüm və qəlbinin saflığından xəbər verən məsum təbəssümü üzündən heç vaxt əksik olmayıb. Əfsanə bu gün gənclərimizdə çox arzulayıb az rastlaşdığımız, qiyməti ölçüyə gəlməyən daha bir keyfiyyətə malikdir -yüksək mənəviyyatlı, çox dəqiq ölçülmüş etik davranışlı, gözəl əxlaqlı əsl azərbaycanlı qızıdır. Böyüyə hörmət onun həyatının ideyasıdır. Amma maraqlıdır ki, həm də sözündən dönməz, məqsədinə inadkar, gedəcəyi yolda cəsarətli addımlarla irəliləyən biridir. Yəqin bu onun yaşlılar demişkən “qabiliyyətli qız” olmasından irəli gəlir.

Bilirəm ki, Əfsanə yüksəklikləri fəth etmək bacarığına malik biridir. Bu yolda ona uğurlar diləyirəm”.

Azərbaycan dili və ədəbiyyatı müəllimi Arif Həziyev: “ - Şagird adını şərəflə daşımaq, bu ada layiq olmaq hər bir insanın müqəddəs borcudur. Bu adı ucaldan hər bir şagird xoş sözlərə layiqdir. Belə şagirdlər haqqında hər hansı yazı hazırlamaq, onların fəaliyyət yollarını təbliğ etmək təqdirə layiqdir.

Qabaqcıl şadirdlərimdən biri Əfsanə haqqında söz açmaq istəyimiz elə bu ovqatdan yarandı.

Məktəbə getdiyi gündən çalışqanlığı, ciddiliyi, davranışı ilə seçilən şagirdlərdən oldu. Əfsanə işgüzar, yaradıcı təfəkkürlü, ziyalı qızlarımızdandır.

Arzum onu XXI əsrin intellektual səviyyəli insanları sırasında görməkdir”.