Kəlbəliyeva Əzizə Sənan qızı

Kəlbəliyeva Əzizə Sənan qızı 19 sentyabr 2003-cü ildə Bakı şəhərində anadan olub. Əzizə ilə müsahibə zamanı öncə valideynlərindən onun haqqında danışmağı xahiş etdik. Valideynləri Əzizə barədə bunları dedilər: "Övladımız körpəlikdən sakit, sözə qulaq asan olub. Uşaqlıqda şəkil çəkməyi çox sevərdi. Daha çox müxtəlif  formalı paltar şəkilləri çəkərdi. Məktəbə getməzdən əvvəl müəyyən qədər hərfləri və rəqəmləri tanıyırdı. Mən (anası) və müəlliməsi bunları Əzizəyə öyrətmişdik. 7 yaşından sonra şahmata böyük həvəsi yarandı. Bir neçə ildən sonra artıq peşəkar şəkildə öyrənməyə başladı."

İlk dəfə 133 saylı tam orta məktəbdə elm həyatına qədəm qoyan Əzizə hazırda Elitar Gimnaziyada təhsilini davam etdirməkdədir. Dərslərini yaxşı oxuyur. Tədris olunan fənlərin arasında onun ən çox sevdiyi fənn tarix fənnidir. Demək olar ki, məktəbin bütün tədbirlərində fəal iştirak edir. Tədbirlərdə onun iştirakı əsasən,  şeirlə və müxtəlif kəlamlarla olub.

Əzizədən ən uğurlu və yaddaqalan günləri haqqında soruşduqda bildirdi ki, ən uğurlu günü Milli Dirçəliş gününə həsr olunmuş dərəcə yarışında 4-cü dərəcə aldığı gün olub.

Gələcək fəaliyyətində ailə üzvlərini örnək alan müsahibimiz  1-ci dərəcəni qızıl medalla almağı arzulayır. Uşaqlıqdan dizayner olmaq istədiyini deyir. Asudə vaxtlarında əl işləri düzəltmək və şahmata dair məsələlər həll etməklə məşğul olur. Ən böyük hədəfi universitetə daxil olmaqdır. Daim öz üzərində işləməli olduğunu etiraf edir və bildirir ki, dərslərini yaxşı oxuyaraq, daha çox uğur qazanaraq tarixin yaddaşına adını yazdıra bilər.

Müsahibimizə uğurlarının davamlı olmağını arzulayırıq!