Əlibalayev Camal Vüqar oğlu

Əlibalayev Camal Vüqar oğlu 23 avqust 2006-cı ildə Bakı şəhərində anadan olub. 3 yaşından üzgüçülüklə məşğuldur. 5 yaşından rəsmə böyük həvəsi oyandığından rəsm dərsləri almağa başlayıb. Məktəbə gedənə qədər yazıb-oxumağı bacarmasa da, müxtəlif məntiqi tapşırıqları, 100 dairəsində toplama və çıxma əməllərini asanlıqla yerinə yetirirdi. 4-5 yaşından leqo oyuncaqlarını və çoxhissəli pazlları asanlıqla birləşdirirdi. 560 parçalı pazlları 15 dəqiqə ərzində birləşdirməyə qadirdir.

2015-ci ildə qabilliyyət imtahanı verərək 1 №-li incəsənət məktəbinin rəsm fakültəsinə qəbul olub. Hazırda rəsm dərsləri ilə bərabər heykəltəraşlıq və musiqi dərsləri də alır.

2012-ci ildə Yasamal rayon 53 №-li məktəbdə I sinfə qəbul edilmiş, 2014-cü ildən Xətai rayon 17 №-li məktəbdə təhsilini davam etdirir. Dərslərini yaxşı qiymətlərlə oxuyur. Ən sevdiyi fənn riyaziyyatdır. Məktəbdə keçirilən bütün tədbirlərdə fəal iştirak edir.

Əldə etdiyi nailiyyətlərə görə özünü valideynlərinə borclu bilir. Fəaliyyətindən dolayı özünə nümunə götürdüyü tanınmış insanlar çoxdur, lakin oxşamaq istədiyi insan yoxdur. İstəyir ki, insanlar onu özü kimi tanısınlar. Nə vaxtsa o da gördüyü işlərdən dolayı kimlərəsə nümunə olsun.

Gələcəkdə rəssam-heykəltəraş olmağı hədəfləyib.

Asudə vaxtlarında kitab oxuyur, rəsm çəkir, pazl və lego parçalarını birləşdirir. Çəkdiyi rəsmlərdə ən çox təbiəti təsvir etməyə, gildən heyvan fiqurları hazırlamağa üstünlük verir. Ən böyük arzusu çəkdiyi rəsm əsərlərinin və düzəltdiyi heykəllərin xaricdə sərgisinin keçirilməsidir. Doğma Azərbaycanımızı sərhədlərdən kənarda təmsil etmək ona ən böyük şərəf gətirəcəyini deyir. Vətənimizə layiqli övlad olmağa çalışır.

Arzularına çatasan, Camal.

Nərimanov Yusif İmran oğlu

Nərimanov Yusif İmran oğlu 01 oktyabr 1999-cu ildə Sumqayıt şəhərində anadan olub. Yusif körpəlikdən çox sakit uşaq olub. Lap körpə yaşlarından düşündürücü oyunlarla maraqlanıb. Artıq 2 yaşında nağıllar danışır, şeirləri əzbər söyləyirdi. Saatlarla konstruktorlarla, məntiqi oyunlar oynamaqdan yorulmazdı. Bu maraqlarını görən Sadıq babası onunla çox məşğul olurdu. 3 yaşında əlifbanı, rəqəmləri artıq bilirdi. Məktəbə gedənə qədər oxuyur, sadə riyazi məsələləri həll edə bilirdi.

2005-ci ildə Sabunçu rayonunu 71 №-li orta məktəbin I sinfinə daxil olub. 2011- ci ildə imtahan verərək Səbail rayon 6 №-li məktəb-liseyə daxil olub və 2016-cı ildə əla qiymətlərə bu məktəbin məzunu olub. Bütün dərsləri böyük həvəslə oxuyub. Babası Sadıq Quliyev tarix və coğrafiya müəllimi olduğundan Yusifə böyük həvəslə dünya tarixi və coğrafiyasını öyrədib. Kimya və fizika fənlərinin dərinliyini öyrənmək ona daha maraqlı gəlirdi. 4 yaşından ingilis dili ilə məşğul olmağa başlayıb. Xarici dillərə marağının erkən yaşlarında yaranmasında xaricdə yaşayan dayısının rolu böyük olmuşdur. Dayısı Əhməd hər gələndə əgər dilləri gözəl bilərsə, onun dünyanın ən öndə gedən universitetlərində oxumasına dəstək olacağını söyləyirdi. Dayısının faciəli şəkildə həlak olması Yusifi daha da təsirləndirdi və xaricdə təhsil almağı, müxtəlif dilləri öyrənməyi qarşısına məqsəd qoydu. O, təkcə xarici dilləri yox, bütün fənləri maraqla öyrənirdi. Tarix, coğrafiya, xüsusən də Azərbaycan tarixini həvəslə öyrənirdi. Dünya siyasətini araşdırır, onunla dərindən maraqlanırdı. Tarixi əsərlər oxumağı xoşlayırdı. Ümumiyyətlə, heç bir fənn arasında fərq qoymurdu. İxtisas seçimi vaxtı yaxınlaşanda ölkəmizə daha çox hansı sahədə yararlı kadr ola bilər deyə çox düşünürdü. Kimya və fizika mühəndisi olmaq qərarına gəldi. Hansı ölkədə təhsil alacağını düşünərkən qarşısına Reyhan xanım Hüseynovanın və Bela xanım Cəlilovanın rəhbərlik etdiyi UFC kursu çıxdı. Bu kursla tanış olmaq və orada oxumaq Yusifin həyatının ən gözəl dönüş nöqtəsi oldu. UFC kurslarında Yusif fransız dilini mükəmməl öyrəndi və müxtəlif səviyyələrdə diplomlar alaraq Fransanın Nitsa şəhərində Sofiya Antipolis universitetinə daxil oldu. Bununla yanaşı Azərbaycan Dövlət Neft və Sənaye universitetinin kompüter mühəndisliyi fakültəsinə daxil oldu.

Bir çox diplom və sertifikatla təltif olunub: “Amerikan Akademi” kurslarında ingilis dilindən 2012-ci ildə “Pre-İntermediate” və “İntermediate”, 2014-cü ildə isə “Uper-İntermediate” səviyyələri ilə təltif olunub. Daha sonra Reyhan xanım Hüseynovanın və Bela xanım Cəlilovanın rəhbərlik etdiyi UFC kurslarında oxuduğu müddətdə fransız dili üzrə 2015-ci ildə “DELF” imtahanlarından “A2” və “B1” , 2016-cı ildə isə “B2” səviyyələrini qazanıb. Səbail rayonu 6 №-li məktəb-liseydə məktəbdaxili “Xəmsə” intelektual oynunda komanda tərkibində iştirak edərək I yerə çıxmış və bu münasibətlə diplomla təltif olunumuşdur. Bütün bu nailiyyətlərinə görə valideynlərinə, müəllimlərinə, xüsusilə UFC kursunun direktoru Reyhan xanım Hüseynovaya, təhsil aldığı məktəbin direktoru Gülşən xanım Orucovaya və babası Sadıq Quliyevə borclu olduğunu deyir.

Yusifin uşaqlıq arzularından biri də “Nobel” mükafatı laureatı olmaqdır. Çalışır ki, ixtisası üzrə akademik səviyyəsinə qədər yüksəlsin və Azərbaycanın “Nobel” mükafatı alan ilk alimi olsun.

Asudə vaxtlarını səmərəli keçirməyə hər zaman üstünlük verir. Bəzən qardaşı ilə şahmat oynayır. Dedektiv və tarixi janrlarda bədii əsərlər mütaliə etməyi çox sevir.

Sərdarova Dəniz Ramal qızı

Sərdarova Dəniz Ramal qızı 17 sentyabr 2008-ci ildə Bakı şəhərində anadan olub. Dəniz ağıllı, sakit və sevimli uşaq olub. Yazıb-oxumağı 4 yaşından bilib. Bunu hazırlıqda öyrənib. Gözəl şəkillər çəkmək istedadı Dənizin həvəs və marağı sayəsində yaranıb.

Bakı şəhəri 6 №-li məktəbdətəhsil alır. Dərslərini əla oxuyur. Sevdiyi fənlər informatika, texnologiya və riyaziyyatdır. Məktəbdə təşkil edilən tədbirlərdə iştirak edib. Həyatında ən uğurlu günü məktəbə ilk getdiyi gün olub.

Əldə etdiyi uğurlara görə anasına minnətdardır. Anası Dənizin uğur qazanması, əla oxuması və savadlı olması üçün əlindən gələni edib. Gələcəkdə müəllimə olmaq istəyir. Boş vaxtlarında şəkil çəkir. Gələcək planları ingilis dilini mükəmməl öyrənməkdir. Eyni zamanda rəsmlə daha dərindən məşğul olmaq istəyir. Dəniz savadlı, ağıllı olması ilə yaddaşlarda qalmaq istəyir.

Arzularına çatasan, Dəniz.

Namazov Barat Vüqar oğlu

Hazırda respublikamızda təhsilə, gənc nəslin təlim-tərbiyəsinə müasir tələblər səviyyəsində xüsusi önəm verilir. Məlumdur ki, təhsil sisteminin bünövrəsi I sinifdən qoyulur. Təhsilin bütün sonrakı pillələri bu bünövrə üzərində ucalır. Bu dəfə haqqında danışacağımız Barat Namazov yaşının kiçik olmasına baxmayaraq çox ağıllı, istedadlı uşaqdır.

Namazov Barat Vüqar oğlu 2008-ci il yanvar ayının 18-də Bakı şəhərində anadan olmuşdur. Barat körpəlikdə sakit, ağıllı, aktiv uşaq olub. Ən çox şəkilli kitablara maraq göstərib. Plastilinlə müxtəlif əşyalar hazırlamağı da sevirdi.

5 yaşından misallar həll etməyə, hesablamağa başlamışdı. Yazıb-oxumağı da mükəmməl bilirdi. Ona görə də valideynləri onu “Menar” kursuna yazdırdı. Artıq məktəbə tam hazır idi. Baratın hazırda 132-134 saylı Beynəlxalq Təhsil Kompleksində təhsil alır. Dərslərini əla qiymətlərlə oxuyur. Məktəb tədbirlərində iştirak edir. 5 yaşı olanda uşaq bağçasında keçirilən bayram şənliklərində və tədbirlərdə iştirak edib. Ən çox yadda qalan “Ayı və siçan” nağılında aparıcı olduğu və səhnədə çox alqışlandığı gündür. Bundan başqa uğurlarından biri də Mental Arfimetik Zəkanın inkişaf proqramının turlarından müvəffəqiyyətlə keçməsidir. Buna görə sertifikatla təltif olunub.

Əldə etdiyi uğur və naliyyətlərinə görə öncə ailəsinə, bağça müəllimlərinə və məktəb müəllimlərinə özünü borclu bilir.

Təhsildə ən yüksək zirvəyə yüksəlmək, gələcəkdə mühəndis olmaq, yeni tikinti layihələri vermək və şəhərimizdə müasir, gözəl binalar ucalmasını istəyir. 8 yaşından bu qərara gəlib. 

Gələcək planları çoxdur. Təbii ki, bütün şagirdlər kimi bilik yolunda hər zaman uğurlar qazanmaq və ən önəmlisi ölkəmizi beynəlxalq arenada layiqincə təmsil etmək arzuzundadır. 

Tarixin yaddaşında qalmaq üçün ölkəmizdə, keçmişimizi və tariximizi əks etdirən heykəl və abidələr yaratmaq istəyir.

İbtidai sinifləri fəallıqla bitirib təhsilin yuxarı pilləsinə getdiyi ilk gün, 2014-cü ildə Az.TV telekanalının “Səhər” verilişində çıxış edib. Azərbaycan televiziyasında “Ənənə boğçası” adlı verilişdə çıxış edib. 

Biz də redaksiyamız adından gələcəyin mühəndisinə uğurlar arzu edirik.

UĞURLARIN BOL, YOLUN AÇIQ OLSUN, BARAT!

Hacıyev Ayxan Elxan oğlu

Hacıyev Ayxan Elxan oğlu 25 iyul 2005-ci ildə Bakı şəhərində dünyaya göz açmışdır. İlk təhsilini 258 №-li məktəbdə almışdır. Hazırda isə 320 №-li tam orta məktəbdə təhsil alır. Ayxanın məşğuliyyət sahələri olduqca genişdir. Hələ uşaq yaşlarından idmana – futbola, voleybola maraq göstərir, üzgüçülük, gimnastika, şahmat və rəqslə məşğul olur. Rəqs onun ən sevdiyi sahədir və olduqca istedadlı bir rəqqasdır. O, ilk dəfə “Əlifba” bayramında rəqs etmək üçün müəllimi tərəfindən keçirilən məşqlər zamanı özündə rəqsə olan marağı və istedadını aşkarlamışdır. İlk dəfə səhnədə iştirakı da elə “Əlifba” bayramında olmuşdur. Tədbirdə səhnələşdirilmiş “Qoğal” nağılında canavar obrazını canlandırmış və hamının alqışını qazana bilmişdir. Ayxan ilk dəfə məktəbə getdiyi günü həyatının ən unudulmaz günü kimi dəyərləndirir. O, həmin günü gələcək uğurlarının başlanğıc nöqtəsi kimi qiymətləndirir.

Məşğuliyyətlərinin çox olmasına baxmayaraq qəhrəmanımız dərslərindən də geri qalmır. O, məktəbdə orta səviyyədə oxuyur və daha yaxşı oxumağa çalışır. Gələcəkdə seçəcəyi peşədən asılı olmayaraq öz ixtisası üzrə savadlı kadr kimi formalaşmaq niyyətindədir. Ayxan böyüyəndə qanun keşikçisi - polis olan babasına bənzəmək, onun kimi millətinə xidmət göstərən bir peşə sahibi olmaq arzusundadır.

Biz də gələcəyin polisinə uğurlar arzu edirik. 

Səfiyeva Sevil Cabir qızı

Səfiyeva Sevil Cabir qızı 18 iyul 2003-cü ildə Bakı şəhəri Suraxanı rayonunda anadan olub. Anasının dediyinə görə, Sevil uşaqlıqda bəzən dəcəl, bəzən də sakit olub. Su ilə oynamağı xoşlayardı. Yayda dənizdə çimməyi sevir. Məktəbdə idman dərsində dama oynamaqdan zövq alır. İdmana böyük önəm verir. Gələcəkdə üzgüçülüklə də məşğul olmaq arzusundadır. Ancaq ən böyük məşğuliyyəti rəsm çəkməkdir. Ən çox gecələr rəsm çəkməyi sevir. Sevil məktəbə gədər yazıb-oxumağı bacarırdı. Evdə onunla anası və nənəsi məşğul olub. Sevildə şəkil çəkməyə həvəs 6 yaşında yaranıb. Anası hiss edir ki, övladı bu işə böyük həvəs göstərir. Uşağın istedadını üzə çıxarmaq ücün 2015-ci ildə qızını Hövsan qəsəbəsində yerləşən mədəniyyət sarayında rəsm dərnəyinə yazdırır. Orada çox savadlı və gənc Gilan müəllimənin sinfində oxuyur. Anası hiss edir ki, müəllim seçimində yanılmayıb. Sevil “Qönçələrin çiçək dünyası” sərgisində iştirak edib. Birinci dərəcəli diplom və hədiyyələrə layiq görülüb. Ondan sonra “20 Yanvar” adlı sərgidə iştirak edib. Əldə etdiyi nailiyyətlərə görə Gilan müəllimə təşəkkür edir və özünü ona borclu bilir. Əlbəttə ki, bu yolda onunla birgə əziyyət çəkən anasına da minnətdarlığını bildirir. O, peşəkar rəssam olmaq istəyir və bunu qarsına məqsəd qoyub.

Sevil birinci sinfə Hövsan qəsəbəsində yerləşən 76 saylı tam orta məktəbdə gedib. Hazırda həmin qəsəbədəki 281 saylı tam orta məktəbdə oxuyur. Dərslərini yaxşı oxuyur. Ən çox sevdiyi fənlər təsviri incəsənət və rus dilidir.

Asudə vaxtlarında şəkil çəkməyi xoşlayır. Sevil ancaq rəsmlə məşğul olmaq istəyir. Ən çox heyvanların şəkilini çəkməyi xoşlayır. O, rəssam olanda müxtəlif sərgilərdə iştirak edərək sənətini davam etdirmək istəyir.

İstedadı ilə bağlı 01 may 2016-cı ildə Azərbaycan televiziyzsında səhər musiqili informasiya proqramında müəllimi ilə birgə çıxış edib. O inanır ki, tarixdə qalmaq üçün öz sənətinə həvəslə yanaşmaq lazımdır.

Əsədzadə Jalə Vüqar qızı

Əsədzadə Jalə Vüqar qızı 17 sentyabr 2005-ci ildə Bakı şəhərində anadan olub. Jalə körpə vaxtından diqqət sevən, hər şeylə maraqlanan, çoxlu sual verən, bir qədər də ərköyün olmuşdur. Təbiəti, yaşıllığı çox sevir, ağacların yarpaqlarından mozaika düzəldirdi. Bəzən təbiətdə rast gəldiyi müxtəlif xırda ağac budaqlarını və daşları toplayırdı. Artıq 5 yaşında bütün hərfləri tanıyır, yazır və oxuyurdu. İlk müəllimi babası olmuşdur. Jalə çoxlu sayda uşaq şeirləri əzbərləyir və onları xüsusi intonasiya ilə söyləyirdi. Özündən müxtəlif tapmacalar düzüb qoşurdu. Həmişə babasından yeni nağıllar danışmasını tələb edirdi. Jalənin babasının rəsm çəkmək qabiliyyəti var. Jalə babasının çəkdiyi rəsmlərə baxar və onların eynisini çəkməyə çalışardı. Bu, onda yaxşı alındığından valideynlərini onda xüsusi həvəs yaratdılar.

Jalə hazırda H. Hüseynov adına 83 №-li məktəb liseydə təhsil alır. Bütün fənləri böyük həvəslə oxuyur və hamısından əla qiymətlər alır. Ən çox sevdiyi fənlər isə ingilis dili, təsviri incəsənət və tarixdir. Məktəbdə keçirilən əksər tədbirlərdə fəal iştirakı ilə fərqlənir. Həyatında ən maraqlı gün Silahlı Qüvvələr Günü münasibəti ilə təşkil edilmiş rəsm müsabiqəsində qalib olduğu, Azərbaycan telekanalına dəvət olunduğu və orada çıxış etdiyi günü hesab edir.

2012-ci ildə 1 İyun Uşaqların Beynəlxalq Müdafiəsi Gününə həsr olunmuş “Vergi uşaqların gözü ilə 10-cu yaradıcılıq müsabiqəsində iştirakına görə sertifikatla, 10-cu “Toyota arzuların maşını” rəsm müsabiqəsində iştirakına görə diplomla, 2013-cü ildə təsviri, tətbiqi sənət sahəsində qazandığı uğurlara görə diplomla, “Əlvida, payız” sərgisində iştirakına görə diplomla, Beynəlxalq Sülh Günü münasibəti ilə ombudsmanın təşəbbüsü ilə keçirilmiş “Sülh və tolerantlıq nümunəsi Azərbaycan” mövzusunda uşaq rəsm müsabiqəsində iştirakına görə sertifikatla, 2014-cü ildə Azərbaycanda qan donorluğunun inkişafına dair rəsm müsabiqəsində iştirakına görə sertifikatla, 2016-cı ildə Uşaq və yeniyetmələrin 4-cü “Saf rənglər” beynəlxalq rəsm yaradıcılıq festivalında qazandığı yaradıcılıq uğurlarına görə diplomla, “Mənim düşüncəm” adlı uşaq rəsm sərgi-müsabiqəsinin yekun sərgisində I yer tutduğuna görə diplomla, “Mənim rəsmim” müsabiqəsində fəal iştirakına görə təşəkkürnamə ilə təltif olunub. Əldə etdiyi nailiyyətlərə görə özünü valideynlərinə və babasına borclu bilir. Gələcək fəaliyyətində babasına oxşamaq istəyir. Rəssam-dizayner olmağı qarşısına məqsəd qoyub. Ən böyük arzusu gələcəkdə fərdi sərgisinin təşkil edilməsidir.

Asudə vaxtlarında rəsm çəkməyi, təbiət qoynunda olmağı xoşlayır. Rəssamlıqda xüsusi ilə təbiət mənzərələrinin təsvirinə üstünlük verir. Tez-tez rəsm müsabiqələrində iştirak etmək və bu sənət üzrə ali təhsil almaq gələcək planlarının əsasını təşki edir.

2016-cı ildə Silahlı Qüvvələr Günündə Azərbaycan televiziyasının “Səhər” verilişində iştirak edib. 

Cəfərzadə Leyla Əjdər qızı

Cəfərzadə Leyla Əjdər qızı 17 iyul 2008-ci ildə Bakı şəhərində anadan olmuşdur. Leyla körpəlikdən ağıllı, sakit, aktiv uşaq olub. Gimnastika və rəsmlə məşğul olmağı çox sevir. Leylanın rəsmə olan marağı 5 yaşında yaranıb. Məktəbə gedənə qədər yazıb-oxumağı bacarıb. Hazırda Tahir Həsənov adına 23 №-li tam orta məktəbdə təhsil alır. Dərslərini əla qiymətlərlə oxuyur. Ən çox sevdiyi fənlər təsviri incəsənət, ingilis dili və ana dilidir. Məktəbdə keçirilən tədbirlərdə fəal iştirak edir. Asudə vaxtlarında musiqiyə qulaq asır, kitab oxuyur.

“Mənim rəngli paltarım” uşaq bədii yaradıcılıq sərgisində Leylanın da çəkdiyi rəsmlər yer almışdır. Çəkdiyi rəsmlərin xarici ölkərdə sərgisini təşkil etmək istəyir. Qazandığı nailiyyətlərə görə özünü valideynlərinə və müəllimlərinə borclu bilir.

Orta məktəbi əla qiymətlərlə bitirib ali məktəbə qəbul olmaq ən böyük məqsədidir. Gələcəkdə savadlı pediatr olmaq arzusundadır.

Biz də redaksiyamız adından Leylaya uğurlar arzu edirik.