Ağabəyova Balacaxanım Baləmi qızı

Balacaxanım Baləmi qızı Ağabəyova 1996-cı il iyulun 13-də Bakı şəhərində dünyaya göz açıb. Qız olmasına baxmayaraq körpəlikdə çox nadinc olub. İdman etməyi xoşlayırdı. Hələ kiçik yaşlarından təhsilə maraq göstərməyə başlayıb. Bu səbəbdəndir ki, hələ məktəbə gedənə qədər yazıb-oxumağı öyrənmişdi. Azyaşlı uşaqlar üçün nəzərdə tutulan nağıl kitablarını oxuyurdu. Maraqlı orasıdır ki, Balacaxanım bütün bunlara kimsənin köməyi olmadan nail olmuşdu.

Balacaxanım ilk təhsilini 10 saylı Sanatoriya Tipli İnternat Məktəbində alıb. Burada təhsil aldığı dövrdə bilik yarışmalarında, məktəbin ictimai işlərində də fəal iştirak edib. 30 aprel 2012-ci ildə “Azərbaycan dili Azərbaycan xalqının varlığıdır” mövzusunda məktəbdə keçirilən inşa müsabiqəsində fərqləndiyinə görə diplomla təltif olunub.

Balacaxanım hazırda Pirşağı qəsəbəsindəki 112 saylı orta məktəbin şagirdidir. Burada da fəallığı ilə seçilən şagirdlərdən biridir.

Balacaxanım: “ - Dərslərimi yaxşı oxuyuram. Sevdiyim fənlər tarix və ədəbiyyat olub. Fizika fənni də məni çox maraqlandırır. Məktəbdə keçirilən tədbirlərdə aparıcılıq etmişəm, rol oynamışam.

Gələcəkdə jurnalist olmaq istəyirəm. Bu fikrə hələ aşağı siniflərdə oxuyanda düşmüşəm. Gənc aparıcılardan biri Günay Qələndərliyə oxşamaq istərdim. Ən böyük arzularımdan biri tanınmış, məşhur televiziya jurnalisti olmaqdır.

Asudə vaxtlarımda hind filmlərinə baxmağı xoşlayıram.”