Zeynalova Aylin Kamran qızı

Gənc və istedadlı şahmatçı Zeynalova Aylin Kamran qızı 7 may 2007-ci ildə Bakı şəhərində anadan olub. Hazırda 6 saylıi məktəb-liseyin IV sinif şagirdi olan Aylin 3 ildir ki, ardıcıl əlaçıdır və ən sevimli fənni riyaziyyatdır. Bir çox tədbirlərdə, bayramlarda fəal iştirak edən Aylin həmişə ön sıralarda olmağı sevdiyini, buna da müəfəqiyyətlə nail olduğunu deyir. Ən uğurlu günü doğum gününü hesab edir.

Aylin şahmat sahəsində olan birinciliyinə görə diplomlarla təltif edilib. Gənclər və İdman Nazirliyi tərəfindən keçirilən Dünya Azərbaycanlılarının Həmrəylik Gününə həsr olunmuş təsnifat turnirində I yeri tutduğu üçün diplomla təltif edilib. ”Yay kuboku “ təsnifat turnirində qizlar arasında I yeri tutduğuna görə daha bir diplom əldə edib, eyni zamanda Novruz bayramına həsr olunmuş tədbirdə II yeri tutduğuna görə fəxri fərman əldə edib. Aylin şahmatla yanaşı rəsm çəkmək bacarıqlarına görə də Baku Modern Art Gallery Club tərəfindən “Qış sürprizləri” layihəsində qış obrazının hazırlanması və nümayişində iştirakına görə diplomla təltif edilib. Toyota şirkəti tərəfindən verilən diplomları da Aylinin uğurlarına uğur qatıb.

Əldə etdiyi naliyyətlərə görə ilk növbədə valideynlərinə və daha sonra isə müəllimlərinə minnətdardı. Şahmat fəaliyyəti ilə Macarıstandan olan Polgar bacılarına oxşamaq istədiyini deyir, amma nədənsə ona ən yaxın gələn Jofidir. Hədəfi şahmatda əldə etdiyi uğurları ilə qroysmester dərəcəsinə çatmaqdır.

Gələcəkdə memar olmaq istəyir. Aylin rəsm çəkməyi çox sevir və inanır ki, bu işin də öhdəsindən gələcək. Asudə vaxtlarında kitab oxuyur və şəkil çəkir, heyvanlar və təbiət mövzusunda rəsmlər çəkməyə daha çox üstünlük verir.

Gələcək planlarına IV sinfi əlaçı kimi başa vurmaq, şahmat sahəsində yüksək pillələrə qalxmaq, ingilis, fransız, ispan dillərini öyrənmək daxildir. Aylinin əsas məqsədi tarixin yaddaşında istedadlı bir insan kimi qalmaq və ailəsinin onunla fəxr etməsidir.

Valideynləri Aylin haqında deyirlər ki, özü özünün müəllimi olub. Hər şeyi özü öyrənmək istəyib. Heç vaxt heç kimi incitməyib. 4 yaşında ingilis dili və bədii gimnastika ilə məşğul olub. Aylin üçün hər sahə maraqlıdır. 7 yaşında şahmatla məşğul olmağa başlasa da son 2 ildə bu işlə peşəkar məşğuldur. Dünyaca məhşur oyunşulara baxıb anasına onlar kimi şahmatçı olmaq istədiyini deyirdi.