Mehtiyev Nicat Nemət oğlu

Nicat Nemət oğlu Mehtiyev 1991-ci il iyulun 31-də Bakı şəhərində anadan olub. Həmin dövrdə populyar olduğuna görə valideynləri ona bu adı veriblər. Onların dediklərinə görə artıq 3-4 yaşlarında oxuyub-yazmağı bacarıb. “Əlifba”nın bütün hərflərini öyrənmiş, hətta rus dilində bəzi sözləri də öyrənmişdir.

Orta təhsilə 1997-ci ildə Xətai rayonunda yerləşən 287 saylı “Zəkalar” liseyində başlayıb. Savadlı, zəhmətkeş müəllim heyəti sayəsində mükəmməl bilik bazası qazanıb. Məhz bu səbəbdən bütün orta təhsilini bu məktəbdə keçirib. Orta məktəbdə dərslərindən yüksək qiymət almış və 2008-ci ildə məktəbi əla qiymətlərlə bitirmişdir. Dəqiq fənlərə daha çox üstünlük verib. Ən sevdiyi fənn riyaziyyat fənni olmuşdur. Riyaziyyatın məntiq və dərin düşüncə tələb etməsi onda xüsusi maraq oyatmışdır. Həmçinin liseyin o zamankı direktoru Fikrət Xəlilovun riyaziyyat fənnini nümunəvi tədris etməsi bu fənnə marağını daha artırmışdır.

VIII sinifdə məktəbdə keçirilən müsabiqənin sonunda müəllimlərin rəyi ilə məktəbin ən istedadlı 10 şagirdindən biri olaraq mükafatlandırılıb. Orta məktəbi bitirərkən təhsildə qazandığı uğurlara və nümunəvi davranışına görə fəxri fərmanla təltif olunub. Həmin il Azərbaycan Dövlət Neft Akademiyasının " İstehsalat proseslərinin avtomatlaşdırılması" fakültəsinin "Avtomatika və idarəetmə" ixtisasına daxil olub. 2012-ci ildə həmin istiqamətin "Texniki sistemlərdə idarəetmə və informatika" ixtisasını fərqlənmə diplomu ilə bitirmişdir. Nicat: “ - Bu ixtisası seçməyimin əsas səbəbi texniki elmlərə və müasir idarəetmə sistemlərinə olan marağım olmuşdur. Bu ixtasası hələ IX sinifdə olarkən hədəfləmişdim. Məktəbdə aldığım təhsil bazası səbəbilə bu ixtisasa qəbul olacağıma inanırdım. Hələ X sinifdə oxuyarkən sınaq imtahanlarında yüksək nəticələr göstərmişəm. Qəbul imtahanında göstərdiyim nəticələrə görə “Zəkalar” liseyinin müəllim heyətinə, həmçinin əsas fənlərə hazırlaşmağımda verdiyi töfhələrə görə BDU-nun əməkdaşı, fizika-riyaziyyat elmlər doktoru Fərhad Rüstəmova minnətdaram.

Ali məktəbdə də eyni uğuru davam etdirmişəm. Artıq ilk kursdan elmi məqalələr hazırlamağa və elmi araşdırmalara başlamışam. 2009-cu ildə ADNA-da Konstitusiya Gününə həsr olunmuş 58-ci elmi-texniki konfransda çıxış edib, münsiflər heyətinin müsbət rəyini aldığıma görə ali riyaziyyatdan hazırladığım məqalə çap olundu. Həmin il Azərbaycan Respublikası Dövlət Neft Şirkətinin elan etdiyi təqaüd müsabiqəsinin hər iki turundan uğurla keçib təqaüdçü olmuşam. İlk turda məntiq imtahanından yüksək nəticə göstərmiş, ikinci turda isə Neft Şirkətinin mütəxəssislərindən təşkil olunmuş komissiyanın müsahibəsindən uğurla keçib 30 təqaüdçüdən biri olmuşam. Təqaüdçü olmağımın üstünlüyü və ali məktəb imtahanlarda göstərdiyim yüksək nəticələrin sayəsində 2010-cu ildə, hələ II kursda oxuyarkən yay müddətində ARDNŞ-nin nəzdində Balaxanı Neft-Qaz Çıxarma İdarəsində “İstehsalatın avtomatlaşdırıması” şöbəsində IX dərəcəli mühəndis kimi işləmişəm. Bu mühəndisliyə doğru atılan ilk addım idi.  2011-ci ildə BDU-nun əməkdaşları ilə birgə hazırladığımız və “Günəş batareyalarında heterokeçidlərin tədqiqi” adlı elmi-məqaləni Fransanın Strasburqda keçirilən elmi konfransa göndərdik və müsbət cavab aldıq. Nəticədə, məqalənin çap olunmağına nail olduq. “Paylanmış İdarəetmə Sistemləri” adlı məqaləm Sumqayıt Dövlət Universitetində keçirilən konfransda çap olundu. Həmin il British Petrolium (BP) şirkətinin yay təcrübəsi keçmək üçün elan etdiyi müsabiqəyə müraciət etmişəm. 4 mərhələli və rəqabətli olan bu müsabiqədə ingilis dili, məntiq və şirkətin mütəxəssisləri tərəfindən götürülən müsahibədən uğurla keçib yay təcrübəsi keçməyə haqq qazandım. Həmin müddətdə ARDNŞ-nin təşkil etdiyi yay təcrübəsinə seçilməyimə baxmayaraq, BP şirkətinə üstünlük verdim. Dünyanın ən böyük neft-qaz şirkətində müxtəlif millətlərdən və ölkələrdən olan insanlarla işləmək, yüksək səviyyəli mütəxəssislərlə təcrübə keçmək mənim üçün böyük üstünlük təşkil edir. Burada qrup halında işləmək, təqdimat etmək qaydaları və s. barədə xeyli təcrübələr əldə etdim. Bu məlumatlar mənə daha sonralar dərslərə hazırlaşmağıma xeyli köməklik etmişdir.

Ali məktəbdə də dərslərimi yaxşı oxuyub, bütün imtahanlarıma yaxşı hazırlaşmışam. Təhsil müddətində verdiyim bütün imtahanlardan əla qiymət almışam. Bunun məntiqi nəticəsidir ki, bakalavr dərəcəsini mümkün ən yüksək orta balla (5.0), fərqlənmə diplomu ilə bitirdim. Hazırda isə Almaniyada magistr təhsilimi davam etdirirəm.  Buna görə təhsil aldığım Avtomatika, Telemexanika və Elektronika (ATE) kafedrasının professor və müəllim heyətinə dərin minnətdarlığımı bildirirəm. Məhz onların səyi və zəhməti nəticəsində lazım olan biliklərə yiyələnmişəm. Həmin il kafedra tarixində ilk dəfə olaraq kurs layihələrini təqdimat şəklində təqdim etdik və çox yüksək nəticələr əldə etdik.

Asudə vaxtlarımda ixtisasımla bağlı məlumatlar toplayır, biliklərimi daha da dərinləşdirirəm. Bu məqsədlə internetdən istifadə edir, kitablar əldə edir və yeni məqalələrlə maraqlanıram. Həmçinin Xəzər Mühəndislər Cəmiyyətinin (CES) təşkil etdiyi konfranslarda iştirak edirəm.

Fəaliyyətimlə bağlı ilk dəfə Neft Şirkətində mühəndis seçildiyim zaman “İki sahil” qəzetində məlumat yayımlandı. Bu layihənin ilk seçilən tələbələrindən biri olmağım yayımlanmasına səbəb olmuşdur”.

E-mail : nicat-nm@mail.ru