Harunova Turan İlham qızı

Turan qədim türk tayfalarının adıdır və mənası gözəl deməkdir.

Turan körpəlikdə çox gözəl, ağıllı, tərbiyəli uşaq olub. Kiçik yaşlarında piano çalır, idmanın bütün növləri ilə maraqlanır, hətta futbola baxmağı çox sevirdi. Yaşıdlarından fərqli olaraq xəbər proqramlarına baxır, baş vermiş hadisələrə çox maraqlı fikirlər yürüdürdü.

Məktəbə gedənə qədər yazıb-oxumağı ona nənəsi Fatma müəllimə öyrətmişdi.

Turanda həkimliyə maraq kiçik yaşlarından olub. Oyun oynayarkən həmişə həkim olur, hamı üçün reseptlər yazardı. Elə uşaqlığı ilə bağlı ən maraqlı hadisələr bununla bağlıdır. Bir dəfə kiçik bacısına tapşırıb ki, mən həkim olacam, sənsə xəstəxanaya gələn ağıllı bir xəstə ol. Mən sənə iynə vuracam sən isə ağlamamalısan, axı sən ağıllı xəstəsən. Xoşbəxtlikdən su ilə dolu iynəni ona vurmaq istəyəndə valideynləri gəlib çatdılar.

Körpəliyində atasının Turan üçün yazdığı şeiri təqdim etmək istərdik:

Dəyişdi dünyanı sənin gəlişin,

Ay mənim körpəcə Turan qızım.

Bürüsün aləmi incə gülüşün,

Tez böyü, tez boyat, yeganə quzum.

Arzumuz budur ki, daim həyatda

Səadət, xoşbəxtlik nəsibin olsun.

Fərəhli dövr sür, xoş dövran keçir,

Ürəyin sevinclə, nəşəylə dolsun.

Arzun çiçək açsın, min bir gül açsın,

Ömrünün baharı xəzan görməsin,

Gülüşün aləmə incilər saçsın.

Qəm-qüssə qəlbində dövran sürməsin.

Beşiyin başından ana laylası,

Üzündən təbəssüm əksik olmasın.

Ay qızım, qəlbinin körpə dünyası,

Qoy duman almasın, çiskin almasın.

Solmasın gül rəngin, dolmasın gözün,

Dolsa da, ay quzum, sevincdən dolsun.

Olmasın başında deyirəm ağ saç,

Olsada, ay qızım, yüzündə olsun.

Turan İlham qızı Harunova 3 sentyabr 1984-cü ildə Qax rayonunda anadan olub. 1991-ci ildə Zaqatala şəhər Ş. Qurbanov adına 3 saylı orta məktəbə daxil olmuş, 2001-ci ildə həmin məktəbi bitirib. I sinfində müsabiqə yolu ilə sinif nümayəndəsi seçilmişdir. 1992-ci ildə Zaqatala şəhər Uşaq İncəsənət Məktəbinin fortepiano bölməsinə daxil olmuşdur.

Həkim ixtisasına maraq onda kiçik yaşlarında yaranıb. O vaxtlardan heç vaxt ixtisas seçimini dəyişməyib. Bu fikrini ailəsi, xüsusilə də anası dəstəkələyib.

Orta məktəbi əla qiymətlərlə oxuyub, bir sıra olimpiadalarda iştirak edib. 2001-ci ildə keçirilən biologiya üzrə olimpiadada I yeri tutub və fəxri fərmanla təltif olunub.

Ali məktəbdə də yaxşı oxuyub. İnsan anatomiyası və ixtisası olan şüa dioqnostikasına böyük marağı olub.

Həyatında ən maraqlı və ən uğurlu gün 2001-ci ilin avqust ayında universitetə qəbul olduğunu öyrəndiyi gün olub. O gün keçirdiyi sevinc hissini hələ də unutmayıb. Qəbul imtahanlarında göstərdiyi nəticələrə görə müəllimləri Sevil xanıma, Kəlimət xanıma, Səfər müəllimə borcludur.

Kliniki Tibbi Mərkəzdə işləmək onun ən böyük arzusudur. Təbii ki, hər kəs öz ixtisası və işi üzrə ən yüksək zirvəyə çatmaq üçün çalışır, onun da arzusu budur.

Asudə vaxtlarında piano çalmağı, musiqi dinləməyi, kitab oxumağı sevir. İndi ailə qurub, asudə vaxtlarını oğlu və ailəsi ilə keçirir.