Novruzov Aleksandr Mehman oğlu

Novruzov Aleksandr Mehman oğlu 29 iyul 2002-ci ildə Moskva şəhərində dünyaya göz açıb. Uşaqlıqda Aleksandr quraşdırıcı leqolardan müxtəlif qurğular (malikanələr, qalalar, gəmilər, təyyarələr) yığmağı xoşlayırdı. Eyni zamanda musiqi və nağıllar dinləməyi xoşlayırdı. Məktəbə getməzdən əvvəl yazıb-oxumağı və saymağı bacarırdı. Dörd yaşında onda ədəbiyyata, tarixə və kompyüter oyunlarına maraq oyanmış, yaddaşı inkişaf etmiş və ona danışılan hər şeyi yadda saxlayıb söyləməyi bacarırdı.

Aleksandr I-IV siniflər 169 saylı məktəbdə oxuyub. V sinifdən təhsilini Maştağa qəsəbəsindəki C. Cabbarlı adına 187 saylı orta məktəbdə davam etdirib. Hazırda VII sinif şagirdidir.

Aleksandr: “ - 187 saylı məktəbə keçəndən sonra əla qiymətlərlə oxuyuram. Xüsusilə ədəbiyyata, tarixə, riyaziyyata və ingilis dilinə marağım var. Şeir yazmağa cəhd göstərirəm. Bağçada və məktəbdə bütün bayram şənliklərində iştirak etmişəm, şeirlər söyləmişəm. Karate üzrə nümayiş olunan çıxışlarda iştirak etmişəm. Üzgüçülük üzrə yarışlarda iştirakıma görə fəxri fərman almışam. İdman sahəsində anam mənə böyük diqqət yönəltmiş, dərslərimdə isə nənəmə borcluyam.

Ali təhsil almaq, ingilis dilini öyrənmək, dili yaxşı öyrənmək üçün İngiltərəyə gedib, orda təhsilimi davam etdirmək istəyirəm. İqtisadiyyatla bağlı peşəyə yiyələnmək istəyirəm.

Asudə vaxtlarımda futbol və kompyüter oyunları ilə məşğul oluram, kitab oxuyuram. Ədəbiyyata marağım çoxdur və şeir yazmağa həvəsim var.

Gələcək planlarım: məktəbi əla qiymətlərlə bitirib, ali təhsil almaq, sayılıb-seçilən şəxsiyyət olmaq, maraqlı işə və kifayət qədər maddi gəlirə nail olmaq istəyirəm. 10-11 yaşlarında başa düşdüm ki, insanların hörmətini qazanmaq lazımdır. Bu sahədə qohumum Ağa Dadaşovu nümunə göstərə bilərəm. O, SSSR Ali Sovetinin deputatı, neftçi, sosialist əmək qəhrəmanı olub. Belə insan olub tarixin yaddaşına düşmək, əlbəttə hər bir kəsin arzusu olar.”