Hamının hörmət və sevgisini qazanacaq (Əhmədova Nərgiz Rövşən qızı)

Nərgiz körpəlikdə musiqi səsi eşidən kimi oyuncaqları yerə qoyar, diqqətlə qulaq asar, rəqs edərdi. Məktəbə gedənə qədər anası və ondan əvvəl məktəbə gedən bacısı tərəfindən yazıb-oxumağı öyrənmişdi. I sinifdə dərsləri ilə xalası məşğul olurdu.

Anası Nuriyyə xanımın dediklərindən: “ - Əslində musiqiyə çox həvəsi olub. Musiqi duyumu, ritmi, bir qədər də səsi olduğundan musiqiyə çox marağı vardı. Ancaq musiqi oxumağı təsadüfən oldu. Bacısının sənədlərini musiqi məktəbinə verəndə Nərgizin də sənədlərini verməyi məsləhət gördülər. Məktəbə qəbul üçün keçirilmiş imtahanda musiqi duyumu hamını heyrətləndirmişdi”.

Nərgiz Rövşən qızı Əhmədova 1992-ci il martən 1-də Bakı şəhərində anadan olub. 3 yaşından 5 yaşına kimi 272 saylı uşaq bağçasında oxuyub. 1998-ci ildən Ə. Ələsgərov adına 244 saylı orta məktəbdə oxumağa başlayıb. 1999-cu ildə 11 saylı Uşaq Musiqi Məktəbinə daxil olub. Xalq çalğı alətləri öbəsinin kamança sinfində oxuyub. 2004-cü ildə bu musiqi məktəbini bitirib, həmin ildə də Leopald və Mistislav Rostropoviçlər adına 21 saylı 11 illik musiqi məktəbinə daxil olub. Azərbaycanda ilk dəfə olaraq kamança üzrə muğamda not məktəbi yaradan pedaqoq, ifaçı, dosent, şənətçünaslıq namizədi Arif Əsədullayevin sinfində oxuyur.

Təhsildən əlavə rəsmlə maraqlanır. Gözəl rəsmləri var. Musiqi və idmanla maraqlanır. Voleybol, basketbol və əsasən futbolu çox sevir.

Dərslərini əla oxuyur. Ən sevimli fənləri - Azərbaycan tarixi, Azərbaycan dili, ədəbiyyatdır. Nərgiz bir sıra uğurlar əldə edib.

15 noyabr 2007-ci ildə tarix olimpiadasının məktəb turunda I yeri tutub Bakı şəhər Baş Təhsil İdarəsinin fəxri fərmanıyla təltif olunmuşdu. 23 noyabr 2007-ci ildə Binəqədi rayon Gənclər və İdman İdarəsinin keçirdiyi “Azərbaycan gəncləri narkotiklər əleyhinə” inşa müsabiqəsində iştirak edib, 30 noyabr 2007-ci ildə “Narkotiklər əleyhinəyik” adlı seminarda yazdığı inşaya görə rayon üzrə III yeri tutub. Rayon üzrə keçirilən olimpiadada I yeri tutduğuna görə fəxri fərmanla, 25 fevral 2008-ci ildə keçirilən “Xocalı faciəsi xalqımızın qan yaddaşıdır” inşa müsabiqəsində I yeri tutduğuna görə diplomla təltif olunmuşdur.

14 vfhn 2008-ci ildə keçirilən H. Əliyev haqqında inşalar müsabiqəsində iştirak etmişdir. Orta məktəbdə Müəllimlər günü, Xocalı faciəsi, 20 Yanvar, Novruz bayramı və. s mədəni kütləvi tədbirlərdə milli musiqimizi, muğamlarımızı, rəqslərimizi ifa etmişdir. Azərbaycan Xalq Cümhuriyyətinin 90 illiyinə həsr olunmuş respublika musiqi müsabiqəsində II yerin laureatı olmuş, H. Əliyevin 85 illiyinə həsr olunmuş müsabiqədə diploma layiq görülmüşdür.

Ən uğurlu günləri elə nailiyyət əldə etdiyi günlərdir. Seçdiyi sahə üzrə müəllimi A. Əsədullayev, xalq artisti Şəfiqə Eyvazova, respublika və beynalxalq müsabiqələr qalibi Mehri Arifqızını özünə ideal seçib.

Əldə etdiyi uğurlara görə isə A. Əsədullayevə bocludur. Bu sahəni seçməyində isə anasının böyük rolu olub. Bu sənəti sevməkdə ilk müəllimi Mehriban Qasımovaya minnətdadır.

Hələ uşaqlıqdan Nərgizdən böyüyəndə hansı peşəni seçəcəyini soruşduqda o, həm musiqiçi, həm də tarixçi olmaq istədiyini deyirdi. Tariximizi bilməyənlərə öyrətməkdən ötrü fəaliyyət göstrmək istəyirdi. Lakin həyatının 11 ili musiqi ilə bağlı olduğundan sonda musiqiçi olmağı qərara aldı. Ədəbiyyatla isə o, sanki nəfəs alır. Asudə vaxtlarını kitab oxumaqla, musiqiyə qulaq asmaqla keçirir. Pop, rep, texno, rok musiqiləri dinləməyi sevir. “Strategiya” jurnalının 2007-ci ildə nəşr olunan nömrəsində onun istedadı ilə bağlı hərtərəfli məlumat verilmişdir.

Nərgiz xoşbəxtliyi əbədi saymır. Xoşbəxtlik bir saatlıq, bir dəqiqəlik, bir anlıq ola bilər. Sevdiyi insanların yanında olması, çoxlarının səni sevməsi, zəhmətinin bəhrəsini görmən Nərgizin fikrincə elə xoşbəxtlikdir. Ən çox sevdiyi musiqi əsərləri Ç. Danklyanın “Variasiya”, İ. Bizenin “Varmen”operasından antakt, ”Xabanera”, C. Hacıyev “Karvan” və. s əsərləridir.

Tarix müəllimi M. Ləman: “ - Nərgiz ilk gündən özünü məsuliyyətli, çalışqan, tarixinini və vətənini sevən bir şagird kimi tanıtmışdır. Onda həm də bir təmkinlik, kübarlıq da var ki, fikrimcə bu da ailədən irəli gəlir. Geniş dünyagörüşü vətənini sağlam məhəbbətlə sevməsinə şərait yaradır. Təbii ki, musiqi təhsili onun həm də daxilən zəngin, yüksək mənəviyyatlı və zövqlü bir insan kimi formalaşmasına təsir edən amillərdəndir. Fikirləşirəm ki, Nərgiz gələcəkdə çox təşəbbüskar, vicdanlı, dərin intellektə malik olan vətənpərvər bir tarixçi ola bilər. Lakin hansı peşəni seçməsindən asılı olmayaraq gözəl mütəxəssis kimi ictimaiyyətin hörmət və sevgisini qazanacağına əminəm”.

Azərbaycan dili və ədəbiyyat müəllimi, sinif rəhbəri K. Məmmədova: “ - Nərgiz Əhmədova oxuduğu müddət əzrində özünü bacarıqlı, tərbiyəli bir şagird kimi tanıtmışdır. İntizamı ilə həmişə yoldaşlarına nümunə olmuşdur. Nərgiz bütün fənlərə məsuliyyətlə yanaşsa da ədəbiyyata, tarixə daha çox üstünlük verir. Oxuduğu saysız-hesabsız kitablar onun dünyagörüşünün zənginləşməsində çox böyük rol oynayır. Gözəl nitq qabiliyyətinə malik olan bu qız olimpiadalarda, inşa müsabiqələrində iştirak edərək biliyini daha da artırmağa nail olub.

Nərgiz dərs əlaçısı olmaqla yanaşı, həm də gözəl musiqi duyumuna malik bir qızdır. İfası ilə müəllimlərini, məktəb rəhbərliyini, eləcə də haqqında eşidən hər kəsi heyran qoymuşdur. Musiqiyə marağı onu dərslərindən bir an belə yayındırmamışdır. Güclü qavrayışa, dərin zəkaya, səlist nitqə mailk olan Nərgiz Əhmədova heç vaxt uğurları ilə kifayətlənməyib, daim irəliyə doğru can atır. Gələcəyini həm təhsilə, həm də musiqiyə bağlamaq istəyində olan Nərgizə bu yolun hər ikisində uğurlar arzulayırıq”.

İnanırıq ki, Nərgiz xalqına, vətəninə layiqli vətəndaş olacaqdır.

Dosent, sənətşünaslıq namizədi Arif Əsədullayev: “ - İlk günlərdən verilən tapşırıqları layiqincə yerinə yetirməsi Nərgizin gələcəkdə istedadlı bir musiqiçi kimi yetişməsindən xəbər verirdi. Ona dərs dediyim illər ərzində gəldiyim qənaətə görə o, gələcəkdə çox bacarıqlı müəllim, ifaçı və zövqlü musiqiçi kimi özünü tanıdacaq. Kamançanın məhz Nərgiz kimi gözəl təlim-tərbiyəyə malik olan, savadlı və istedadlı bir Azərbaycanlı qızının əlində olması məni çox sevindirir. Mən onun gələcəyinə çox inanır və böyük ümüdlərlə sabahlara baxıram”.