Mirqərib Məzahir qızı Hüseynzadə

Mirqərib adını bu qıza nənəsi verib. Körpəlikdə çox sakit, ağıllı, sözə baxan uşaq olub. Şəkilli kitabları çox sevirdi. Mirqəribin məşğuliyyəti ancaq şəkil çəkmək idi. Məktəbə gedənə qədər yazıb-oxumağı anasının və uşaq bağçasındakı müəllimlərin sayəsində öyrənmişdi. Mirqərib gəlinciklərlə oynamağı da sevirdi. Gəlinciklərinə çoxlu paltarlar tikərdi. Elə paltar tikirdi ki, özündən başqa onu heç kəs gəlinciyə geyindirə bilmirdi.

Qəhrəmanımızın özü barədə dedikləri: “ - Mən Mirqərib Məzahir qızı Hüseynzadə 17 oktyabr 1989-cu ildə Bakı şəhərində anadan olmuşam. 1997-ci ildə Sabunçu rayonundakı 215 saylı orta məktəbin I sinfinə getmişəm. 1998-ci ildə orta məktəbdən əlavə 4 saylı Uşaq Musiqi Məktəbinin I sinfinə daxil olmuşam. 2005-ci ildə həmin musiqi məktəbini əla qiymətlərlə bitirib Georgi Şaroyev adına on bir illlik musiqi məktəbinin skripka bölməsinə daxil olmuşam. 2008-ci ildə təhsil aldığım 215 saylı orta məktəbi bitirmişəm. Elə həmin il Bakı Slavyan Universitetinin beynəlxalq münasibətlər fakultəsinə daxil olmuşam. Hazırda həmin universtetin IV kurs tələbəsiyəm. 2009-cu ildə isə musiqi məktəbini bitirdim. Uşaqlıqda nə vaxtsa diplomat olacağımı heç fikirləşmirdim. Skripkaçı olmaq istəyirdim. Siyasət, diplomatiya məni XI sinifdə cəlb etdi. Maraqlı sənətdir. Bütün dövlətlərin beynəlxalq vəziyyəti, tarixi, keçmişi, bu günü, gələcəyi bu sənət sahiblərinin adı ilə bağlıdır. Sülh tərəfdarıyam. Bütün dünya xalqlarının xoşbəxt, müharibəsiz yaşamasını, hər şeyin ədalətli olmasını istəyirəm.

Orta məktəbdə dərslərimi əla oxumuşam, sinfimizin ən fəallarından idim. Sevimli fənlərim fizika, cəbr həndəsə olsa da, mənim üçün hər bir fənnin əvəzedilməz yeri var idi. Orta məktəbdə oxuyarkən müxtəlif fənlər üzrə olimpiadalarda iştirak etmişəm. Ən yüksək nəticəni VIII sinifdə kimya fənni üzrə şəhər turunda I yeri tutmaqla əldə etmişəm. Məktəbimizdə keçirilən tədbirlərdə də böyük maraqla iştirak edirdim.

Ali məktəbdə də əlaçıyam. Sevimli fənlərim beynəlxalq münasibətlər nəzəriyyəsi, beynəlxalq münasibətlər tarixi, diplomatiya və konsulluq xidmətidir. Universtetdə də ictimai işlərdə iştirak edirəm. Tələbə Gənclər Təşkilatının İdarə Heyətinin üzvüyəm. Vaxtaşırı müxtəlif  QHT-lərin təşkil etdikləri kurslarda iştirak edirəm. 2009-cu ildə ali məktəb tələbələrinin XIV fənn olimpiadasında Azərbaycan dili fənni üzrə həvəsləndirici mükafata layiq görülmüşəm.

Qəbul imtahanında 594 bal toplamışdım ki, buna görə də valideynlərimə və müəllimlərimə borcluyam. Ali məktəbi bitirdikdən sonra ixtisasımla bağlı istənilən yerdə işləyərdim. Harada işləməyimdən asılı olmayaraq ölkəmiz üçün bir şey edə bilərəmsə, bu mənə yetər. Uğurlu karyera, ətrafımda sevdiklərimin olması mənim üçün xoşbəxtlikdir.

Asudə vaxtlarımda skripkada, pianoda ifa etməyi, rəsm çəkməyi həddindən artıq sevirəm. Tarixin yaddaşında qalmağı çox istərdim. Azərbaycanda qadın diplomat demək olar ki yoxdur. Niyə də biz qadınlar ölkəmizin problemlərini həll etməyək”.