Hüseynzadə İlahə Məzahir qızı

İlahə ailənin ikinci övladıdır. Onun adını bibisi qoyub. Hələ kiçik yaşlarından təhsilə böyük maraq göstərib. Zəlzələ idi. Hamı həyətə qaçmışdı. İlahə isə çantasına kitablarını, hətta bir alma, peçenye, iki dilim çörək qoyub palto və papağını geyinib evdən çıxdı. Onu görüb hamı qəmli vaxtında gülümsəməyə başladı.

İlahənin söylədiklərini sizlərə də təqdim edirik: “ - Mən İlahə Məzahir qızı Hüseynzadə 1990-cı il oktyabrın 25-də Bakı şəhərində anadan olmuşam. 1997-ci ildə 215 saylı orta məktəbin I sinfinə, 1998-ci ildə 4 saylı Uşaq Musiqi Məktəbinin fortepiano sinfinə, 2005-ci ildə musiqi təhsilimi davam etdirmək üçün Georgi Şaroyev adına 35 saylı 11 illik musiqi məktəbinin arfa sinfinə daxil olmuşam. 2008-ci ildə 215 saylı orta məktəbin XI sinfini bitirmişəm. Həmin ildə Bakı Musiqi Akademiyasının ifaçılıq fakultəsinə arfa ixtisası üzrə qəbul olmuşam. Musiqini uşaq vaxtlarımdan sevirdim, zaman keçdikcə mən musiqiyə daha da bağlanmağa başladım. İndi bir günümü belə musiqisiz təsəvvür edə bilmirəm. Əvvəllər məşhur pianoçu olmaq istəyirdim, lakin arfa aləti ilə tanış olandan sonra məni özünə cəlb etdi. Ona görə də bu ixtisası seçdim.

Orta məktəbdə dərslərimi yaxşı oxumuşam. Ən sevimli fənlərim rus dili və Azərbaycan dili idi. Orta məktəbdə elmi yarışlarda iştirak etmişəm. Məktəbdə keçirilən fənn olimpiadalarında, ictimai işlərdə fəal iştirak etmişəm. Musiqi fənlərindən də ən çox sevdiyim fənlər harmoniya, musiqi ədəbiyyatı və ixtisas idi. Musiqi fənlərini də yaxşı oxumuşam. Konsertlərdə, musiqi müsabiqələrində iştirak etmişəm. 2007-ci ildə simli alətlərin II respublika müsabiqəsində iştirak etmişəm, diplom və həvəsləndirici mükafatla təltif olunmuşam. 2008-ci ildə Heydər Əliyevin 85 illik yubileyinə həsr olunmuş I respublika müsabiqəsinin diplomantı olmuşam.

Ali məktəbdə də dərslərimi yaxşı oxuyuram. Əlaçıyam. Ən sevimli fənnim ixtisasım arfa, təhlil və Azərbaycan xalq musiqisinin əsaslarıdır. Ali məktəbdə də ictimai işlərdə fəal iştirak edirəm. Sevdiyim ixtisasa yiyələnməkdə G. Şaroev adına 35 saylı musiqi məktəbinin direktoru Yusif məllimə borcluyam. Mənə arfa seçməyi o məsləhət görüb. Bu ixtisası mənə ixtisas müəllimim Yeganə Tapdıqova sevdirib və onun rolu böyükdür. Azərbaycanda arfa məktəbinin banisi olan Aida Abdullayevaya oxşamaq istərdim. Çox təəssüflər ki, Aida xanım artıq dünyasını dəyişib.

Ali məktəbi bitirdikdən sonra musiqi məktəblərində, bitirdiyim akademiyada, orkestrdə işləməyi arzulayıram. Xoşbəxtliyi ixtisasıma mükəmməl şəkildə yiyələnməkdə görürəm. Ən yaxşıların sırasında adımın çəkilməsi məni xoşbəxt edər.

Asudə vaxtlarımda musiqiyə qulaq asmağı, şüşədən şəkillər düzəltməyi və toxumağı xoşlayıram. Mən istərdim ki, bir şəxsiyyət kimi tarixin yaddaşlarında yaşayım. Bunun üçün səylə çalışmağı, yüksək təhsil almağı fikirləşirəm. Fəaliyyətimlə bağlı musiqi məktəbimizlə bağlı kitablarda, iştirak etdiyim müsabiqələrdə və konsertlərdə məlumat verilib”.

e-mail: harper_90@mail.ru