ŞABANOVA MİNAGÜL AYAZ QIZI

 

Müəllim gənc nəslin mənəvi aləminin memarı, cəmiyyətin etibar etdiyi şəxsdir. Müəllimlik çox şərəfli peşədir - vəzifədir, şərəfli olduğu qədər də mürəkkəb, məsuliyyətli vəzifədir.

Dahi Üzeyir Hacıbəyov müəllimlərlə bağlı belə deyirdi: “Müəllimlik vəzifəsi çox çətin və ən məsuliyyətli vəzifədir. Hər adam onun öhdəsindən gələ bilməz və hər bir adama müəllim deyib, uşaqları ona tapşırmaq böyük xətadır. ”

Ümummilli lider Heydər Əliyev müəllimlərin əməyini hər zaman yüksək qiymətləndirmiş və belə demişdir: “Mən yer üzündə müəllimdən yüksək ad tanımıram. Hər birimizdə müəllimin hərarətli qəlbinin bir zərrəciyi vardır. ”

Əbəs yerə müəllimlərdən söhbət açmadıq. Sizə haqqında danışmaq istədiyimiz 10 yaşlı qəhrəmanımız bu şərəfli peşənin sahibi olmaq və tutduğu yolda yüksək pilləyə ucalmaq arzusundadır. 10 yaşında bu peşənin məsuliyyətini dərk edir və ona can atırsa, bizə yalnız bu yolda ona uğurlar diləmək düşər. Təhsil sahəsində bir sıra yeniliklərə imza atmaq arzusu olan Minagülü sizlərlə tanış edirik.

Şabanova Minagül Ayaz qızı 22 yanvar 2005-ci ildə Bakı şəhərində anadan olub.

Minagül sakit, sözəbaxan uşaq olub. Musiqiyə və rəqsə maraq göstərib.

Məktəbə getməmişdən əvvəl yazmağı və oxumağı öyrənib . Hal-hazırda Türkan qəsəbəsində, Dərdayıl Cəbrayılov adına 119 saylı orta məktəbdə təhsil alır. Dərslərində çox çalışqan qızdır. Əlaçıdır. Sevimli fənlərinin arasında riyaziyyat, musiqi də var.

Minagül məktəbdə keçirilən tədbirlərin aktiv iştirakçılarından biridir. Onun yer aldığı tədbirlərin sırasında 21 fevralda keçirilən “Ana dilim, şirin dilim” adlı tədbir də var. Minagül həmin tədbirin aparıcısı olub. Bundan başqa Novruz Bayramına görə təşkil edilən tədbirdə “Bahar qızı” rolunda çıxış edib.

Minagül gələcəkdə ibtidai sinif müəlliməsi olmaq istəyir. Məktəbə gedəndən onda bu istək yaranıb. Müəlliməsi Zərnişan Əliyevanın sayəsində bu sənətə marağı oyanıb.

Minagül bütün Azərbaycana səs salmaq istəyir. Orta məktəbi başa vurandan sonra ali təhsil almaq, yüksək savadlı müəllimə olmaq, ziyalı kimi bütün Azərbaycanda tanınmaq istəyir. Təhsil sahəsinə yeniliklər gətirmək arzusundadır.

Asudə vaxtı olanda Minagül musiqi dinləməyi, şəkil çəkməyi çox xoşlayır.

Musiqiyə və rəqsə böyük marağı olan Minagül deyir ki, əgər hansısa incəsənət sahəsi ilə məşğul olsaydı, rəqsə daha çox üstünlük verərdi. Xüsusilə milli rəqslərimizə qarşı həvəskardır. Musiqiyə olan həvəsi körpəlikdən yaranıb . Nə vaxt musiqi səsi eşitsə oynayarmış . Bu həvəs ona anasından keçib.  

Minagül uşaq jurnalı olan “Bizim Super Klub” jurnalının keçirdiyi müsabiqələrdən birində iştirak etmiş və qalib olmuşdur. Buna görə də həmin jurnalda Minagül haqqında məlumat verilmişdir.