Mirxaslı Zəhra Mirsüleyman qızı

Nə qədər qəribə görünsə də Zəhranın adı anasına yuxuda deyilib və bunu cənabı Haqqın bir lütfü, bir ilhamı kimi qəbul edib riayət ediblər.

Zəhra son dərəcə fəal, şox surətli inkişaf edən bir uşaq olub.  7-8 aylığından danışmağa, 9 aylığından etibarən isə birdən-birə qalxıb (iməkləmədən) yeriməyə başlayıb.  Həddən artıq sual verməyi xoşlayıb, “ilan boğan vaxtı” deyilən vaxtda quşları, heyvanları tutmağa cəhd etməkdən çəkinməyib.  Kitab, jurnal vərəqləməkdən, şəkillər cızma-qara etməkdən zövq alıb.  Böyüklərdən, televizordan eşitdiyi və anlamadığı bütün sözlərin mənasını israrla öyrənməyə çalışıb və elə ertəsi gün də həmin sözlərin bir çoxunu leksikonuna daxil edib.

3 yaşında, hələ yazıb-oxumaq bilmədiyi halda, sadəcə bir neçə dəfə müşahidə etmək və dinləməklə ərəbcə namazı hafizəsinə həkk etmiş, bir neçə gündən sonra isə bunu olduğu kimi, heç bir artıq və əksiyə yol vermədən təqlid etməyə başlamışdır.  Yaşı irəlilədikcə (4-5 yaşlarında) valideynlərinə məktublar yazmağa, açıqcalar tərtib edib, şeirlər həsr etməyə başlayıb. 

Səyahət etməyi həddən artıq sevir. Tarixi məkanlar, qədim sivilzasiyalar, Yaradan, bu dünya, o dünya haqqında suallar verməyi xoşlayır.  Səlist danışmağı, gözəl nitqi, intonasiyanı çox dəyərləndirir və özü də bu bacarığa nail olmağa çalışır.  Yəqin bu özəlliyinə görədir ki, uşaq bağçasında keçirilən bütün tədbirlərdə ona aparıcı, diktor rolları, səhnəciklərdə əsas obrazlar tapşırılıb.  İstər intellektual, istərsə də əyləncə xarakterli yarışmalarda iştirak etməyi çox sevir. Həmyaşıdlarından fərqlənməyə, onlardan bir addım öndə olmağa can atır.  Məğlubiyyəti heç sevmir və belə bir sonluqla qarşılaşdıqda nəticəsini uzun müddət həzm edə bilmir, bu prosesi çox ağrılı keçirir.  Məntiqə və təhlilə çox meyllidir.  Ətrafında baş verən bütün prosesləri düşüncə süzgəcindən keçirməyi və mövqe formalaşdırmağı sevir. Bir qədər laqeyd, etinasız və soyuqqanlı uşaq təsiri bağışlasa da, əslində daxili aləmi son dərəcə sentimental, həssas və romantik bir uşaqdır.

Zəhra yazıb-oxumağı əvvəlcə ailədə, sonra isə məktəbəqədər tərbiyə müəssisəsində (uşaq bağçasında) öyrənmiş və məktəbədək artıq sərbəst yazıb-oxumağı mənimsəmişdi. 

İstedadın Allahın bəxş etdiyi və ancaq onun istəyi ilə oyanan nemətdir.  Digər ünsürlər sadəcə bu mexanizmin işə keçməsi üçün vasitələrdir. Bu mənada Zəhranın da istedadı ancaq aləmlərin Rəbbinə aid olan bəxşiş, valideynlərinin təşviqi isə kiçik və mütəvaze bir vasitədir.  Lakin ulularımız “nəzarətsiz güc, güc deyil” deyiblər. İstedad da bir üstünlük, bir gücdür.  Ona görə də unutmaq olmaz ki, istedad doğru istiqamətə yönəldilmədikdə və yaxud da nəzarətsiz buraxıldıqda əks effekt yarada, cəmiyyət üçün fəsad törədəcək tendensiyalara təhrik edə bilər. 

Peyğəmbərimizə (s.ə.s) - uşağa neçə yaşdan etibarın tərbiyə verilməsi məqsədəuyğundur - sualı verildikdə, övladınızın neçə yaşı var deyə soruşur. 1 yaş - cavabını eşitdikdə, artıq 1 il gecikmisiniz  deyir ki, bu hikmətin özü də valideynləri artıq beşikdən etibarən uşaqlarına nəzarət etməyə mükəlləf edir.

Zəhra 13 yanvar 2001-ci ildə Bakıda dogulmuşdur. Beynəlxalq Universitetin nəzdindəki məktəbəqədər təhsil müəssisəsində ilkin tərbiyə aldıqdan sonra Bakı Avropa Litseyinə daxil olub və hazırda da təhsilini orada davam etdirir.

Zəhra: “ - Mən də hər uşaq kimi yaxşı oxumağa çalışıram.  Ən sevimli fənnlərim isə - riyaziyyat və musiqidir.

Mən məktəbdəki tədbirlərdə və Heydər Əliyev sarayında məktəbimizin yubileyinə həsr edilən tədbirdə iştirak etmişəm. 

Böyüyəndə arxeoloq olmaq arzusundayam. Çünki ən çox qədim Misirlə və qazıntılarla maraqlanıram.  Mifologiyaya cox marağım var.  Bu sahələrə marağım əsasən Misirlə maraqlandığıma görədir.

Asudə vaxtlarımda şəkil çəkməklə, şeir yazmaqla, özümdən mahnılar və rəqslər uydurmaqla məşğulam.

Xoşbəxtliyi ailəmə, soykökümə, vətənimə və bəşəriyyətə yararlı insan olmaqda görür, bu istiqamətdə fəth edə biləcəyim istənilən zirvəni xoşbəxtlik zirvəsi sanıram.

Atama və anama ad günlərində şerlər həsr edir, şahmat, rəsm, üzgüçülük, rəqslə məşğul olur, pianoda ifa etməyi sevirəm.

Hələlik arzum ibtidai təhsilimi uğurla başa vurmaq, ərəb və ingilis dillərinə mükəmməl yiyələnməkdir. 

Cox böyük, əlçatmaz şeylər arzusunda deyiləm.  Ərəblər deyir “əl xeyru fi ovsatuha” (ən xeyirli şey ortada durmaqdır). Ortada qala bilmək üçün isə daim irəli getməlisən”.