Qurbanzadə Ağazeynal Ceyhun oğlu

Babasının adı Ağazeynal olduğuna görə adını nəvəsinə vermişik. Körpəlik yaşlarından çox fəal, ətraf mühitdə olan hər şeylə maraqlanırdı. Yaşının az olmasına baxmayaraq məntiqli sulalları çox idi. Ən çox xoşladığı məşğuliyyəti rəsm şəkmək, musiqiyə qulaq asmaq və şahmat oynamaq idi. Adətən 3-4 yaşlarında oğlanların oyuncaqlara marağı olduğu halda, Ağazeynalın meyli dəftər-kitaba idi. Artıq 5 yaşında onun xeyli maraqlı kitabları var idi. O, bunlardan çox həvəslə istifadə edirdi. Birlikdə kitab oxuyurduq, şəkil çəkirdik. Məktəbə gedəndə isə o artıq yazmağı-oxumağı bilirdi. Ağazeynal uşaq vaxtı çox dəcəl olub. O, öz yaşıdları ilə heç yola getmirdi. Ancaq böyüklərlə söhbət etmək, oynamaq, suallar verib informasiya toplamağı xoşlayırdı. 4-5 yaşlarında özünəməxsus danışığı ilə seçilirdi. Kosmosla, planetlərlə yaşına uyğun olmayan hər şeylə maraqlanırdı. I sinifdə müəllimi yaxşı oxumağına, savadlı danışıq qabiliyyətinə görə onu ən üstün sayırdı. Hətta müəllimi onu zarafatca professor deyə çağırırdı. Hazırda bir əlaçı kimi şərəf lövhəsinə layiq görülüb.

Ağazeynal Ceyhun oğlu Qurbanzadə 2000-ci il avqustun 17-də Bakı şəhərində anadan olmuşdur. Hazırda 310 saylı orta məktəbin V sinfində oxuyur. Təhsil ilə yanaşı şahmat oynamağa, şəkil çəkməyə marağı böyükdür. Basketbol oynamağı sevir.

Təbiətşunaslıq müəllimi Esmira Babayeva: “ - Ağazeynal ağıllı, tərbiyəli, sakit, dərslərində fəal şagirdlərdən biridir. Ağazeynalın dərsə davamiyyəti, müəllimlərə hörmət etməsi onun gözəl tərbiyəyə malik olmasını göstərir. Mən onu bu bir il ərzində necə fəal, çalışqan, dərsə böyük həvəsi olduğunu görurəm, əlbəttə bu məni çox sevindirir. Ona uğurlar arzu edirəm və əminəm ki, o həmişə belə həvəskar olacaq”.

Riyaziyyat müəllimi Nigar Həsənova, sinif rəhbəri Rəna Əhmədova da onun haqqında müsbət fikirlər söylədilər.

Ağazeynal dərslərinə həmişə hazır gedir. Riyaziyyat, təbiət və ingilis dili fənlərinə marağı böyükdür. Məktəbdə keçirilən tədbirlərdə iştirak edir. Ən maraqlı günləri atası ilə İstanbul şəhərinə səfər zamanı “Soltan Əhməd”, “Topqapı” saraylarını gəzdiyi günlərdir.

Ağazeynal: “ - Gələcəkdə babam Ağazeynal müəllimə oxşamaq istəyirəm. Babam alimdir, çoxlu kitablar yazmışdır. Onunla söhbət etməyi sevirəm. Çünki babam digər böyüklərdən fərqli olaraq insana öz fikrini açıqca söyləməyə imkan verir. Bu da məndə həvəs yaradır. Arzum astronomiya ilə məşğul olmaqdır. Dörd yaşım olanda atam mənə teleskop almışdı. Göy cisimlərini müşahidə etməyə başladım. Gecələr ulduzları çox seyr edirəm. Onlar necə əmələ gəlməsi məni daim düşündürür.

Akvarel ilə mənzərə çəkməyi xoşlayıram. Hər bir işi səbrlə və sakit görmək istəyirəm. Az danışmağı xoşlayıram. Valideynlərim məni memar görmək istəyirlər. Gələcəkdə ixtiraçı olmaq, ölkələri gəzmək istərdim. Arzum kosmosu öyrənmək, bir planet yaxud ulduz kəşf edib onun adını “Azərbaycan” qoymaqdır”.