Baxşəlizadə Emil Aydın oğlu

  

Azərbaycan hər zaman olduğu kimi bilikli, özünə inamlı  gənclər yetiştirməkdə davam edir. Belə demək mümkündürsə,  getdikcə gənclər daha çox uğurlar qazanmaq üçün bir-birləri ilə yarışırlar. Bu “yarış” həm məktəbdə, həm tələbə həyatında müşahidə edilir. İlk yarış ibtidai sinifdə başlayır, müəllimimizin sevgisini qazanmaqdan ötrü yaşıdlarımızla yarışırıq: tapşırığı hamıdan birinci həll etməyə çalışırıq, müəllimə kömək lazım olanda hamıdan birinci biz ona kömək etməyə can atırıq, bizi sinifdə nümunə göstərsin deyə əlimizdən gələni edirik. Bu yarış getdikcə rəqabətə çevrilsə də, bu xoş rəqabətin sayəsində əslində hamımız dərslərimizi öyrənmiş oluruq, hamımızın qiymətləri yüksəlir, əlaçılığa qədər yüksəlirik. Sözə əlaçılıqdan başladıq, indi sizi daha bir əlaçı şagirdlə tanış edək : Emil Baxşəlizadə.

Baxşəlizadə Emil Aydın oğlu 1 aprel 2008-ci ildə Bakı şəhərində anadan olub.  Körpəlikdə aktiv,  şıltaq uşaq olub. Rəsm çəkmək, plastilinlə oynamaq onun sevimli məşğuliyyətləri idi .

Hələ məktəbə getməmişdən əvvəl - 5 yaşından başlayaraq onda məktəb həyatına və dərslərə  maraq hiss olunmağa başlayıb,  valideynlərinin və müəlliminin sayəsində yazmağı və oxumağı öyrənib.  Hal-hazırda 267 saylı orta məktəbin ibtidai sinif şagirdidir. Dərslərindən əla qiymətlər alır, sinifin seçilən əlaçı şagirdlərindən biridir. Azərbaycan dili və riyaziyyat fənlərini daha çox sevir.

Uşaqlığından məktəbəqədər hazırlıq kursunda və həmçinin məktəbdə  təşkil olunan tədbirlərdə iştirak edib. Məktəbəqədər hazırlıq kursuna getdiyi müddətdə şənliklərdə   “dovşan” , “Şaxta baba” rollarında çıxışları olub.

Valideynləri onları gəzintiyə, Kukla Teatrına, Gənc Tamaşaçılar Teatrına aparıblar. Bu günlər Emil üçün yaddaqalan günlər olub.

Emil danışır : “Əldə etdiyim uğurlara görə müəllimimə borcluyam. O, mehribandır, mən onu çox istəyirəm.”

Emil gələcək fəaliyyətində atası kimi olmaq istəyir, uşaqlığından atasının uğurlu fəaliyyətini gördükcə düşünüb ki, gələcəkdə müstəntiq olsun.

Gələcəkdə ən yüksək pilləyə qədər ucalmaq istəyir. Ən mühüm planı  cəmiyyətdə mötəbər, savadlı, seçilən şəxslərdən biri olmaqdır. Dərslərini sona qədər əla qiymətlərlə oxuyub, yüksək bal toplayaraq universitetə qəbul olmağı, gələcəkdə sayılıb-seçilən insanlardan olmağı arzulayır.

Asudə vaxtlarında riyazi məsələlər həll edir, həyətdə uşaqlarla futbol oynayır.  İncəsənətlə məşğul olmağı xoşlamır.

Tarixin yaddaşında yaşamaq üçün çoxlu xeyirli işlər görməyi düşünür, kimsəsiz uşaqlara və qocalara kömək etmək, vətənin keşiyində dayanan şərəfli Azərbaycan əsgərləri ilə görüşlər təşkil etməklə tarixdə qalmaq istəyir.