Leyla Elxan qızı İbrahimova

Daha bir istedadlı yeniyetməmiz Leyladır. Leyla Elxan qızı İbrahimova 17 iyun 2004-ci ildə Bakı şəhərində anadan olub. Onun bütün ad günləri böyük bir bayram kimi qeyd edilir. Leyla körpəlikdən çox ağıllı bir uşaq olub. Hər şeyə maraq göstərib. 1 yaş 5 aylığında o, artıq çoxlu şeirlər bilir, rəsmlər çəkirdi. O, 3 yaşında yazıb-oxumağı bacarıb. Ailə xarici dilləri mükəmməl bildiyinə görə Leyla ilə xarici dillərdə danışırdılar. Buna görə də Leyla uşaq yaşlarından Azərbaycan dili ilə yanaşı rus və ingilis dilində də sərbəst danışırdı. İndi isə o, artıq alman dilində də çox gözəl danışmağı bacarır. Dərsləri ilə özü sərbəst məşğul olur. Rəqs, üzgüçülük, rəsm kurslarına gedir. Kiçik yaşlarından rəsmə xüsusi maraq göstərib. Bu həvəsi onda görən valideynləri ona barmaq boyaları almışdılar. Leylanı 4 yaşından Tofiq İsmayılov adına Uşaq Gənclər Yaradıcılıq Mərkəzinə yazdırıblar. İlk rəsm müəllimi Rəhilə xanım olub. Rəssamlığın incəliklərini Leylaya Rəhilə xanım öyrədib. Leyla 11 yaşına kimi qaleriyada yaradıcılıqla məşğul olub. Ölkəmizdə və ölkəmizdən kənarda keçirlən onlarla sərgi, müsabiqələrin qalibi və iştirakçısı olmuşdur.

Tahir Həsənov adına 23 №-li tam orta məktəbdə təhsil alır. Leyla dərslərini əla qiymətlərlə oxuyur. Riyaziyyat, fizika, biologiya, coğrafiya və xarici dil fənlərini daha çox sevir. Məktəbin fəal şagirdlərindəndir. Demək olar ki, məktəbdə keçirlən bütün tədbirlərdə iştirak edib.

Həyatında çox sayda uğur qazanıb. Bakıda təşkil edilən ilk fərdi sərgisi, Parisdəki sərgisi, ombudsman Elmira Süleymanovanın, məşhur rəssam Ömər Eldarovun, Arif Hüseynovun, Ağəli İbrahimovun, Fərhad Xəlilovun və Fövqəladə hallar naziri Kamaləddin Heydərovun onu təltif etdikləri günlər Leylanın yaddaşından silinməyəcək günlərdir. Onun əl işləri bir çox kataloqlarda nəşr edilib.

Yaradıcılıqda özünəməxsus fantaziyası olan qızdır.

Əldə etiyi bütün nailiyyətlərə görə özünü üzərində əməyi olan insanlara, ilk növbədə valideynlərinə və müəlimləri Kəmalə xanıma, Ağabacı xanıma, Nərmin xanıma, Rəhilə xanıma borclu bilir.

Valideynləri ilə səyahət etməyi çox sevir. O, bir sıra ölkələrdə olmuşdur. Almaniya, Fransa, İspaniya, İtaliya, Manacco, Luksemburq, BƏƏ, Türkiyə, Macarıstan və Rusiyanın özünəməxsus xüsusiyyətləri onun yaradıcılığında öz əksini tapmışdır. İstedadı ilə bağlı Azərbaycan televiziya kanalının “MAG” verilişində və Azad Azərbaycan televiziya kanalının səhər verilişində qonaq olub.

Asudə vaxtalarında kitab oxuyur, hekayələr yazır.

Gələcəkdə həkim olmaq istəyir. Əvvəllər plastik cərrah olmağa maraq göstərsə də, indi endokrinoloq olmaq istəyir. Təkcə Azərbaycanda yox, dünyada sayılıb-seçilən həkim olmağa çalışacağını deyir.

Uğurların bol, yolun açıq olsun, Leyla.