Salahov Cəmil Məmməd oğlu 2010-cu il yanvarın 27-də Bakı şəhərində dünyaya göz açıb. Cəmil adının mənası gözəl deməkdir. Onun adını anası Nurlanə xanım gördüyü bir yuxuya əsasən qoyub. Cəmil körpəlikdə ağıllı, sakit və təmkinli bir uşaq olub. İntellektual səviyyəsinə, hazırcavablığına, aktivliyinə görə yaşıdlarından hər zaman seçilib. Cəmilin bir çox sevimli məşğuliyyətləri var. Bunlardan ən çox sevdiyi məşğuliyyəti şəkil çəkmək və rəqs etməkdir. Yaşının az olmasına baxmayaraq Cəmil hesab əməllərini yerinə yetirməyi, rus dilində yazıb-oxumağı bacarır. Uşaq bağçasına getdiyi vaxtlarda da qeyri-adi bacarığı sayəsində müəllimlərinin sevimlisinə çevrilib. Müəlllimləri tərəfindən onun aktyorluq qabiliyyəti də üzə çıxıb. O, çoxlu şeirlər, nağıllar bilir və bütün tədbirlərdə də fəal iştirak edir. Bağçada keçirilən şənliklərdə müxtəlif rollarda oynayıb və öz rolunun öhdəsindən böyük məharətlə gəlib. Onun ən çox sevdiyi rolu isə dovşan obrazı olub.

 Cəmil çox vətənpərvər, mehriban və qayğıkeş bir uşaqdır. Vətənini bu qədər sonsuz məhəbbətlə sevməsi səbəbsiz deyil. Çünki Cəmil hərbçi ailəsində böyüyür. Atasının vətənimizin keşiyində durması, torpaqlarımızın bütövlüyünün qorunması uğrunda göstərdiyi mərdliklərin şahidi olan Cəmilin vətənpərvərlik hisləri buradan qaynaqlanır.

 Ürəyiyumşaq, mərhəmətli olan Cəmil babası Aydın müəllim kimi heyvanları çox sevir. O, küçədə gördüyü sahibsiz heyvanlara kömək edir, onlara yemək, su verməkdən xüsusi zövq alır.

 Cəmil milli adət ənənələrimizə çox bağlıdır. O, milli rəqslərimizi peşəkarcasına öyrənməyə çalışır. Bu yolda ona Tural müəllim böyük köməklik göstərir. Cəmil Uğur məktəbəqədər təhsil mərkəzinin şagirdidir. Onun ən sevimli fənni məntiq fənnidir. Asudə vaxtlarında cizgi filmlərinə baxmağı, rəqs etməyi sevir.

 Əldə etdiyi nailiyyətlərə görə öncə valideynlərinə, daha sonra müəllimlərinə borclu olduğunu bildirir. Cəmilin ən böyük arzusu həkim olmaqdır. O, həkim olub xəstələrə şəfa vermək, vətəninə, millətinə yararlı bir vətəndaş olmaq istəyir.